ထ္ၜးဟိုတ်ကဵုလဗိုတ်ကျာမိုဝ်ခါတုဲ သ္ကိုပ်ပရေၚ်အုပ်ဓုပ် ပ္ဍဲမတ်မလီု ဗက်ကံၚ်ကေတ်ဒၟံၚ်သြန်ဒါန်

မတ်မလီု၊ မေ (၂၄)

တွဵုရးဍုၚ်မန်၊ ပ္ဍဲဍုၚ်မတ်မလီု သ္ကိုပ်ပရေၚ်အုပ်ဓုပ်ကံၚ်ဇြဳပၞာန်ခါန်ကၞက်လဝ်တအ်ဂှ် ဗက်ကံက်ကေတ် ဒၟံၚ်သြန်ဒါန် နကဵုတၚ်ထ္ၜးဟိုတ် သွက်ဂွံကဵုဒါန်ထံက်ပၚ် ညးဍုၚ်ကွာန်ဒးလဝ်ဘဲဒဏ် မိုဝ်ခါဇြိုၚ်ကလုမ် ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သ္ကိုပ်ပရေၚ်အုပ်ဓုပ်အရာပ်ကွာန် ကံၚ်ဇြဳပၞာန် ခါန်ကၞက်လဝ်တအ်ဂှ် ပ္ဍဲအရာကံက်ကေတ်သြန်ဒါန်ဏံ သ္ပအဓိကကဵုဆေၚ်ဖျာ ပံက်သွံဒၟံၚ် ပါလုပ်သီုဖျာသတိုဝ်၊ ဆေၚ်ဂၠိက်ယာတ်၊ ဆေၚ်ဗၞိက်စုၚ် မၞုံပ္ဍဲအရာပ်တအ်တုဲ ဗက်ကံက်ကေတ်ဒၟံၚ်ရ။

ပ္ဍဲအရာကံက်ကေတ်သြန်ဒါန်ဂှ်လေဝ် မွဲဆေၚ်မ္ဂး အောန်အိုတ်မွဲလက်ဒကေဝ် ဒေါံဟွံဂွံ ဒးစုတ်ကဵု ဏောၚ်ဂှ် ၜိုန်ရဗ္တိုက်ဖ္အောဝ်လဝ်ကီုလေဝ် အခိၚ်ကဵုဒါန်ဂှ် ကံက်ဒုၚ်ကေတ်ဒါန် နကဵုစရၚ်အၚ် ဟွံသေၚ်တုဲ ၜိုတ်ဒှ်ကဵုဒှ် ကံက်ကေတ်ဒၟံၚ်ရဂှ် ညးဒေသတအ် ဟီုသ္ဂးလဝ်ရ။

ဟိုတ်နူကံက်ကေတ်ဒၟံၚ်သြန်ဒါန် ၜိုတ်ဒှ်ကဵုဒှ်ဂှ်ရ သြန်ဒါန်တအ် စိုပ်ဇရေၚ်ဒေသ ဒးလဝ်ဘဲဒဏ် လဗိုတ်ကျာမာန်ညိဟာဂှ် တီကေတ်ဟွံမာန်တုဲ သြန်ဒါန်တအ်ဂှ် သုၚ်စောဲအာ ဗီုပြၚ်လဵုရောဂှ်လေဝ် ဟီုသ္ဂးလဝ် ဟၟဲရဂှ် ဂွံတီကေတ်ရ။

သ္အာၚ်နူဏံပၠန် သ္ကိုပ်ပရေၚ်အုပ်ဓုပ်အရာပ်ကွာန် ကံၚ်ဇြဳပၞာန်ခါန်ကၞက်လဝ်တအ်ဂှ် ကံက်ကေတ် ဒၟံၚ်သြန်ဒါန် ပ္ဍဲအရာပ်ကီု ဌာနမဆေၚ်စပ် ပါလုပ်သီုသ္ကိုပ်ဝန်ဇၞော်တအ်လေဝ် ကၠောန်သ္ပကံက်ကေတ် ဒၟံၚ်သြန်ဒါန် နူတၠကမၠောန်တအ်ရ။

သ္ကိုပ်ဝန်ဇၞော်ကံၚ်ဇြဳပၞာန်ခါန်ကၞက်ဂှ်မ္ဂး သွက်ဂွံထံက်ပၚ်ကဵုဒါန် ဒေသဒးဒုၚ်လဝ် ဘဲဒဏ်လဗိုတ်ကျာ မိုဝ်ခါဂးတုဲ အခန်ကၞာအပ်ပြာပ်ကဵုဒါန်သြန် ကံက်ကေတ်လဝ် နူတၠကမၠောန်တအ် အလန်ပထမဂှ် ကၠောန်ဗဒှ်လဝ် ပ္ဍဲၝောံခန်တွဵုရး ပ္ဍဲဂိတုမေ စၟတ်တ္ၚဲ (၁၉)တေံရ။

ပ္ဍဲအခန်ကၞာဂှ် သွက်ညးဍုၚ်ကွာန် ဒးလဝ်ဘဲဒဏ်လဗိုတ်ကျာ တွဵုရးရခေၚ်၊ တွဵုရးချေၚ်၊ ရးသေတ်ဂါၚ်၊ ကေုာံရးဒေသဇၞော်မဂွေတအ်ဂှ် က္လိဂွံလဝ်သြန် အပံၚ်လၟိဟ်(၄၃၀၀)ကိုတ်ဒကေဝ်ပြၚ်ကီု၊ ၚုဟ်မးက ပေါတ်စၞစ ပါလုပ်သီုသ္ၚု၊ ကၠေၚ်၊ ၜဵု၊ ဖၞံကြုက် ကေုာံ ကပေါတ်ထံက်ပၚ် ၚုဟ်မး (၅၀၀)ကိုတ်ဒကေဝ်ပြၚ်လေဝ် က္လိဂွံလဝ်ရဂှ် ဂွံတီကေတ်ရ။

ဟိုတ်နူလဗိုတ်ကျာမိုဝ်ခါလုပ်လဝ် ကၟိန်ဍုၚ်ဗၟာ ပ္ဍဲဂိတုမေ စၟတ်တ္ၚဲ (၁၄)တေံတုဲ ညးမမံၚ်တန်တဴဒၟံၚ် ပ္ဍဲတွဵုရးရခေၚ် ကေုာံ ဒိုဟ်ဗာယပ်ကၟိန်ဍုၚ်ဗၟာ ပ္ဍဲမွဲဂၠံၚ်လဗိုတ်ကျာလုပ်အာလဝ် လၟိဟ်မၞိဟ် ၜိုတ်(၅)ပြကောဋိကိုတ်ပြၚ် ဒးလဝ်ဘဲဒဏ်လဗိုတ်ကျာရဂှ် (UNOCHA) လလောၚ်တြးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် -CJ