ဗော်သေံဒ္စာံဗော် ပံက်တောဲထ္ပက်လဝ်စၟတ်တဲ တၚ်တုပ်စိုတ်ဒ္တန် အလဵုအသဳတိုန်တၟိ ကၠောန်ရေၚ် တၠုၚ်ကဵု ပါလုပ်(၂၃)တၚ်

က္ၜၚ်ကံက်၊ မေ (၂၄)

ဗော် Move Forward ဇၞးလဝ်မာဲကၟိန်ဍုၚ်သေံကဵု ဗော်တၞဟ် (၇) ဗော်တအ်ဂှ် ဒက်ပ္တန်အလဵုအသဳ ပံၚ်ကောံတုဲ ဒဒှ်ရထ္ပက်လဝ်စၟတ်တဲ လိက်တုပ်ကသုက် တၚ်တုပ်စိုတ်ဒ္တန် ကမၠောန်ဆက်ရေၚ် တၠုၚ်ကၠောန်အာအဓာန်ဂတရ ပါလုပ် (၂၃)တၚ်ရဂှ် ဓမံက်ထ္ၜးလဝ် ပ္ဍဲအေဂျေန်ဇြဳဒေသဂမၠိုၚ်ရ။

ထ္ပက်လဝ်စၟတ်တဲ တၞးလိက်ကသုက် တၚ်တုပ်စိုတ်ပါလုပ် (၂၃)တၚ် ပ္ဍဲဂိတုမေ စၟတ်တ္ၚဲ(၂၂)တေံတုဲ သွက်ဂွံဖန်ဗဒှ်ကဵု မူသ္ဇိုၚ်အလဵုအသဳကၟိန်ဍုၚ်သေံအနာဂတ်ဂတဏံကီု သွက်ဂွံဖျေံအာ သ္ဂုတ်သွာတ် လၟေၚ်ကမၠောန် အတိုၚ်တၚ်တုပ်စိုတ်ဒ္တန် အကြာဗော်(၈)ဗော်ဂှ်လေဝ် နွံရ။

မာဿတာပဳတာ က္ဍိုပ်သ္ကိုပ်ဗော် Move Forward လေဝ်ဒှ်၊ အကာဲအရာသွက်ဂွံဒှ်ကၠုၚ် သ္ကိုပ်ဝန်ဇၞော်သေံ အလဵုအသဳတၟိ ကၟိန်ဍုၚ်သေံလေဝ်ဒှ်မာန်ဒၟံၚ်ဂှ် “အဲထေၚ်ကေတ်တှ်ေ ကာလစိုပ်ကၠုၚ် အခိၚ်ဒးသဳကၠဳအရာဏံဂှ် ဗော် Move Forward မွဲဗော်ဓဝ် မံၚ်ဒၟံၚ်ကြၚ်ကြၚ်ကြောဝ်ဝ်ဟွံသေၚ်ရဂှ်”ဂှ် ဟီုသ္ဂးလဝ်ရ။

ပၞောဝ်ကဵုတၚ်တုပ်စိုတ် (၂၃)တၚ် တၚ်ပြာကတ်ဂှ်မ္ဂး တၚ်မပ္တံကဵု ဒေါံဟွံဂွံ ဒးယိုက်ဂၠေၚ်တာလျိုၚ်ပၞာန်ဂှ် ၜိုန်ရပြံၚ်သၠာဲကဵုသၞောတ် အတိုၚ်ပၟိက်ဆန္ဒကီုလေဝ် ယဝ်ပေါဲဗတိုက်က္တဵုဒှ်ကၠုၚ်မ္ဂး သွက်ဂွံဆက် ထိၚ်ဒဝ်အာ တၚ်ပိုၚ်ခြာ ပရေၚ်ယိုက်ဂၠေၚ်တာလျိုၚ်ပၞာန်ကီု၊ ဂဥုဲဘၚ်(ဆေးခြောက်)ဂှ် သွက်ဂွံကလေၚ်ပၠုပ်စုတ် ပ္ဍဲစရၚ်ဂဥုဲၜူမာဲကီု၊ သွက်ဂွံကလေၚ်ပတဴပတိုန် အခန်ကဏ္ဍကၟိန်ဍုၚ်သေံ က္ဍိုက်က္ဍိုပ်အာဇြဳယာန် ကေုာံ မူဝါဒပရေၚ်ဍုၚ်သ္အာၚ် ထိၚ်ဒဝ်ကေဝ်ကၠေဝ်အာ ပရေၚ်ဍုၚ်ကွာန် အကြာကၟိန်ဍုၚ်ဇြဟတ်ဇၞော်ကီု ပါလုပ်ဒၟံၚ်ရ။

သ္အာၚ်နူဂှ်ပၠန် မူအခေါၚ်အရာမၞိဟ်ဂှ် ချပ်ပၠုပ်စုတ်တုဲ ပ္ဍဲဂကောံမၞိဟ် ယေန်သၞာၚ်ပံၚ်ကောံ သွက်ဂွံမံၚ် တန်တဴအာမွဲစွံမာန် သွက်ဂွံကလေၚ်သ္ၚဳဂၠိပ်တာလျိုၚ်အေဂျေန်ဇြဳအလဵုအသဳ သွက်ပရေၚ်ပံၚ် တောဲပါလုပ် ကေုာံ သွက်ပရေၚ်ကိစ္စဆေၚ်စပ်ကဵု ပရေၚ်ဂီုကၠီုကီု သီုကဵုတၚ် သွက်ဂွံဂီုကၠီု သၞောဝ်ဥဒေလေဝ် ပါလုပ်ဒၟံၚ်ရ။

နကဵုဗော် ၈ ဗော်တအ်ဂှ် မ္ၚးနူတၚ်ပၟိက်ဇၞော် (၂၃)တၚ်ဏံတုဲ အခေါၚ်ဒုၚ်စသိုၚ် ကောန်ဍုၚ်သၟး ဟေၚ်ဟွံသေၚ် သ္အာၚ်နူပရေၚ်စဵုဒၞာ အခေါၚ်ဗၠးၜးညးဍုၚ်ကွာန် နကဵုကောန်ဗော်သ္အာၚ်ဂမၠိုၚ် သွက်ဂွံကဵုဖျုန် ကုပၟိက်ဆန္ဒညးဍုၚ်ကွာန်ဂှ်လေဝ် တုပ်လဝ်စိုတ်ညးသ္ကအ်ဏီရ။

ပ္ဍဲတၚ်ထ္ပက်လဝ်စၟတ်တဲလၟုဟ်ဏံ လၟေၚ်ကမၠောန်ဒက်ပ္တန်ပရေၚ်ၜိုဟ်လလံဍာ်ဇမၠိၚ် သွက်ဂွံကဵုအာ ဇြဟတ်ဓရိုဟ် ပ္ဍဲဗစပ်ပယျဵုသ္ကုတ်သၠုၚ်ကျာကီု၊ သၞောဝ်ဥပဒေ ပရေၚ်ပြု ပြေၚ်ပြံၚ်သၠာဲတိဍာ်ဂှ် သွက်ဂွံဗစိုပ်ဒတုဲကီု သီုကဵုအခေါၚ်ပိုၚ်ပြဳတိကၠအ်ဂှ် ပွမပါ်ပရအ်ကဵုဗွဲမညဳသၟဟ်၊ သွက်ဂွံသောၚ်ကလးကဵု ပြသၞာတိဍာ်ပယျဵုဒၞက်ဂြိုပ်ဆုကဵု တိဍာ်ညးဍုၚ်ကွာန် ကေုာံပြသၞာတိဍာ် တွဵုရပ်ထပ်တီုက္ဍတ်ဒၟံၚ်ဂှ်လေဝ် ပၠုပ်စုတ်လဝ်ရ။

ပ္ဍဲ MOU အလဵုအသဳပံၚ်ကောံသေံတၟိဂှ် ၜိုန်ရမူဝါဒဗော် Move Forward မိက်ဂွံပလေဝ်သၞောဝ်ဥပဒေ ဆေၚ်စပ်ကဵု ဂဗုတ်ဖျေံသိက္ခာ လ္တူပွဳဗွိုၚ်ဝၚ်နန်သေံဂှ် ၜိုန်ရဟွံပါလုပ်ကီုလေဝ် က္ဍိုပ်သ္ကိုပ်ဗော်က ဆံၚ်လ္တူဇၞးလဝ်ပေါဲရုဲမာဲတအ်ဂှ် ကဵုအာဇြဟတ်ဓရိုဟ် သွက်ဂွံဒှ်ပရေၚ်အပြံၚ်အလှာဲ ပါလဳမာန်ရောၚ်ဂှ် ပရေၚ်ဟီုသ္ဂးလဝ်လေဝ် နွံကၠုၚ်ရ။

Ref,CNA