သွက်သွာၚ်ကမၠောန်ရတ်တိ အဝ်သတြေလျ ပၟိက်ဇၞော်တံဂှ် ကလိဂွံဇြဟတ်လက္ကရဴ နူကဵုအမေရိကာန်

မေဝ်လ်ဖုၚ်၊ မေ (၂၄)

ဍုၚ်အဝ်သတြေလျဝွံ သွက်ကဏ္ဍကမၠောန်ရတ်တိပၟိက်ဇၞော် သွက်ကၟိန်ဍုၚ် ဂွံဖောအ်ဗြေဝ်တိုန်ဂှ် ကလိဂွံလဝ် ဇြဟတ်လက္ကရဴ နူကဵုကၟိန်ဍုၚ်အမေရိကာန်တုဲ တၚ်တုပ်စိုတ်ဏံဝွံ ကြဴနူဆက်စၠောံ မူဝါဒအကြာၜါဍုၚ်ကဵု ပရေၚ်ဓလိုက်တမ်ရိုဟ်တံတုဲဂှ် မံက်တိတ်ကၠုၚ်လဝ်ရ။

ဍုၚ်အဝ်သတြေလျဝွံ သွက်လက်ထဳယာမ် မသုၚ်စောဲဒၟံၚ် ပ္ဍဲဂၠးတိဏံ ၜိုတ်ကဝက်ဂှ်ကီု၊ သွက်ဗာတ်ထရဳ မသုၚ်စောဲဒၟံၚ် သွက်ကမၠောန်ပရေၚ်စဵုဒၞါ၊ သွက်ကွဳစက်ဓာတ်လလဳတံဂှ် ထံက်ပၚ်ကဵု ဂကူသတ္တု (rare earth) တံဂှ်တုဲ ကၟိန်ဍုၚ်ဂၠးတိဂမၠိုၚ် ဒှ်အခိၚ်ရေၚ်တၠုၚ်ဒၟံၚ် ညံၚ်ဂွံသ္ၚောဲအာ နူကြုက် ရဲပ္တိတ်သတ္တုတံဏံ အဓိကလေဝ် မဒှ်ရ။

နကဵုဍုၚ်အဝ်သတြေလျဂှ် ဒှ်ကၠုၚ်မၞိဟ်ကၠောန်ပ္တိတ် ဟိုတ်ဒရိုဝ်ဂျေန် ကေုာံ အမိုဝ်နဳယာမ် အဓိကတုဲ လ္ဂောံကဵုတၚ်တုပ်စိုတ်မ္ဂး သွက်ပရေၚ်ကၠောန်ပ္တိတ် ဇြဟတ်ဓာတ်သ္အးဇ္ၚးတံဂှ်လေဝ် တာလျိုၚ်နွံ ကၠုၚ်ကီုရ။

ကိတ်ညဳကဵုရာသဳဥတုတုဲ ပရေၚ်ခိုက်ကၠိုက် ကပေါတ်ရတ်တိပၟိက်ဇၞော်တံဂှ်ကဵု ဇြဟတ်ဓာတ် သ္အးဇ္ၚးတံဂှ်ဝွံ ဒှ်တၚ်တုပ်စိုတ် တၚ်ရန်တၟံခိုဟ်မွဲဂှ် သ္ကိုပ်ဝန်ဇၞော်အဝ်သတြေလျ အာန်တိုဝ်နဳ အေဝ်လ်ဗာနဳ ဟီုဂးလဝ်ရ။

သ္အာၚ်နူဂှ်ပၠန် ဟိုတ်နူတၚ်တုပ်စိုတ်ဂှ်တုဲ ပရေၚ်ဓလိုက်တမ်ရိုဟ် ဇရေၚ်ကမ္ပဏဳအဝ်သတြေလျပိုၚ်တံ သၠုၚ်တိုန်ကၠုၚ်မာန်ရောၚ်ဂှ် ဂွံတီကေတ်ရ။

ဝန်ဇၞော် နူကဵုကံၚ်ဇြဳဂီုကၠီုအမေရိကာန်တံကဵု ဌာနက္ဍိုက်ပ်ကမၠောန်ကွတ်စက် အဝ်သတြေလျတံဂှ်ဝွံ ညံၚ်ပရေၚ်ပံၚ်တောဲရေၚ်တၠုၚ် ကမၠောန်ကွတ်စက်တံ ဇြဟတ်ဂွံခိုဟ်ကၠုၚ်ဂှ် သွက်ဂွံထံက်ပၚ်ကဵုဂှ်ကီု၊ သွက်ဂွံသၠုၚ်ပ္တိုန် ပရေၚ်ဖောအ်ဗြေဝ်တောတက်တံမာန် ကၞောတ်သၞာံဏံ ကၠောန်အာအစဳဇန်မွဲ ဏောၚ်ဂှ်လေဝ် ထ္မံက်ထ္ၜးလဝ် ပ္ဍဲကဵုတၚ်လလောၚ်တြး က္ဍိုပ်သ္ကိုပ်ၜါဍုၚ်ဂှ်ရ။

Ref; Reuters