ဗဒိုပ် BGF ခရိုၚ်ဘာပန် ဒးဒုၚ်ဗတိုက်လဝ်တုဲ သီုသ္ကိုပ်ဒပ်လ္ပာ် ဒးချိုတ်လဝ် (၅)တၠ

ဘာပန်၊ မေ(၂၅)

ပ္ဍဲတိဍာ်အုပ်ဓုပ် ဗော်သွးကောန်ဂကူကရေၚ် KNU ခရိုၚ်ဘာပန် ဗဒိုပ်ဒပ်မၚ်ပယျဵု ကရေၚ် BGF ကံက်ကေတ်ဒၟံၚ်သြန် လ္တူညးဍုၚ်ကွာန်မွဲဗဒိုပ် ဒးဒုၚ်ဗတိုက်လဝ်တုဲ သီုသ္ကိုပ်ဒပ်လ္ပာ် ဒးချိုတ်လဝ် (၅)တၠရဂှ် ဒပ်မဟာ (၅) လလောၚ်တြးလဝ်ရ။

ဗဒိုပ် BGF သၟဝ်တဲကံၚ်ဇြဳပၞာန် ဖျေံလဝ်ဗဒိုပ် အကြာဒေသကတေဝ်တိကဵု ထဳကသဝ် တိဍာ်ဒပ်မဟာ(၅) ခရိုၚ်ဘာပန် ကံက်ကေတ်ဒၟံၚ်သြန်ဂှ် ဂိတုမေ တုဲကၠုၚ်စၟတ်တဲ (၂၀)အခိၚ်ဇိုၚ်သဝ်တ္ၚဲ (၃)ကဝက်ဂှ် တံဒပ်(၁၀၂) ကေုာံဒပ်လ္ပာ် သၟဝ်ဒပ်ပၞာန်ဗၠးၜကောန်ဂကူကရေၚ် KNLA တအ် ပံၚ်တောဲတုဲလုပ်ဗတိုက်လဝ်ရ။

ပ္ဍဲပရေၚ်ဗတိုက်ဂှ် လ္ပာ် BGF ဒးချိုတ်လဝ်(၅)တၠ ပါလုပ်သီုသ္ကိုပ်ဒပ်လ္ပာ် (၁)တၠတုဲ ကွဳစက် BGF မွဲဖ္ဍိုက်ဂှ်လေဝ် စံၚ်ပလီုမာန်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ဒပ်မဟာ(၅)ရ။

သ္အာၚ်နူဂှ်ပၠန် ဂိတုမေ စၟတ်တ္ၚဲ (၁၉) အခိၚ်နူဂယး (၁၀)နာဍဳကဵု (၄၀)မိနေတ်ဂှ်လေဝ် ပန်ဖျေံနၚ် လွဟ်ဇၞော် ပ္ဍဲကဵုကွာန်ဖိုဝ်ဃေဝ်ထာ တိဍာ်ဒပ်မဟာ(၅)ခရိုၚ်ဘာပန် နူဗဒိုပ် BGF ဂှ် ညးတြုံ အာယုက် (၂၁)သၞာံ (၁)တၠ ဒးလဝ်ဘဲဝပ်တုဲ သ္ၚိဒၟံၚ် (၂)မလေဝ် ဇီုကပိုက် ဒးလီုလာ်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပ္ဍဲဒေသပရေၚ်အုပ်ဓုပ် KNU ခရိုၚ်ဘာပန် ဒပ် BGF ကဵု ဒပ်ကံၚ်ဇြဳပၞာန် ကၠုၚ်ဖျေံလဝ်ဗဒိုပ်တအ်ဂှ် ဇၟာပ်ဒဒှ်တ္ၚဲ ကၠတ်ဂၠံက် ပၠံၚ်ၜး စသုၚ်ဒၟံၚ် လမျီုသ္ၚိဌာန်ပိုန်ဒြပ်ညးဍုၚ်ကွာန်တုဲ ပြိုက်ဂစိုတ်ဒၟံၚ် ညးဍုၚ်ကွာန် ဟၟဲကဵုဒုဟ်ဒဏ်ဖိုဟ်ရဂှ် ဒပ်မဟာ(၅) လလောၚ်တြးလဝ်ရ။

ပ္ဍဲခရိုၚ် ဘာပန် KNU အကြာဒပ်သၟဝ်တဲဒပ် KNLA ဒပ်မဟာ(၅) ကဵု ဒပ်ကံၚ်ဇြဳပၞာန်တအ် နူဂိတုမေ စၟတ်တ္ၚဲ(၁) စဵုကဵုစၟတ်တ္ၚဲ(၁၅)ဂှ် ပံၚ်လၟိဟ်ပေါဲဗတိုက် (၆၃) ဝါက္တဵုဒှ်လဝ်တုဲ လ္ပာ်ကံၚ်ဇြဳပၞာန် သီုသ္ကိုပ်ဒပ်လ္ပာ် ဒုသ္ကိုပ်ဒပ်လ္ပာ် မၞိဟ်(၂၆)တၠ ဒးချိုတ်လဝ်တုဲ ဒးလဝ်ဘဲဝပ် (၁၀)တၠကီု လ္ပာ်ဒပ်မဟာ (၅)လေဝ် ဒးပြဟ်လလုဲလဝ် (၂)တၠတုဲ ဒးလဝ်ဘဲဝပ် (၆)တၠရဂှ် ဂွံတီကေတ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – KNU