ပ္ဍဲဇြပ်ဗု ဟိုတ်နူကျာလပှ်စိၚ်လုပ်တုဲ သ္ၚိဒၟံၚ် ၂၀ မပြၚ် ဇီုကပိုက်လီုလာ်လဝ်

ဇြပ်ဗု၊ မေ (၂၅)

တွဵုရးဍုၚ်မန်၊ ပ္ဍဲကွာန်ဒဵုဣသိ ဂကောံကွာန်စက်စာဲ ပွိုၚ်ဍုၚ်ဇြပ်ဗုဂှ် ဂိတုမေ စၟတ်တ္ၚဲ (၂၅) အခိၚ်နူဂယးပြဟ် ဟိုတ်နူကျာလပှ်စိၚ် လုပ်တုဲ ကပိုက်ကဝဲဏာလဝ်ဂှ်ရ သ္ၚိဒၟံၚ် (၂၁)မ ဇီုကပိုက်ဒးလီုလာ်လာ်လဝ်ရဂှ် ဂွံတီကေတ် နူညးဒေသတအ်။ 

တ္ၚဲဂှ် အခိၚ်နူဂယး ၜိုတ် (၅)နာဍဳကဝက် ဗြဲဂူတုဲ ဟိုတ်နူကျာလပှ်စိၚ် လပိုက်လွိၚ်လဝ်တုဲ သ္ၚိဒၟံၚ်တအ် ခရိုဟ်လီုလဝ်၊ ကၟဳကယျာလဝ်ကီု၊ တၞံဆုဒေါံကၟိုၚ်၊ တိုၚ်ပၟတ်ဒေါံ က္တဵုဒှ်လဝ်ရ။ 

ပ္ဍဲပရေၚ်ကျာလပှ်စိၚ်ကပိုက်လွိၚ်လဝ်ဂှ် ၜိုန်ရသ္ၚိဒၟံၚ်မၞိဟ်ခရိုဟ်လီုလာ်လဝ်ကီုလေဝ် ပရေၚ်ဇီုကပိုက် မၞိဟ်ဒးလဝ်ဘဲဝပ်ဟၟဲရဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။ 

ဟိုန်တူကျာလပှ်စိၚ်ကပိုက်လွိၚ်တုဲ သ္ၚိဒၟံၚ်(၁၉)မ ကၟဳကယာလီုလာ်လဝ်တုဲ သ္ၚိဒၟံၚ် (၂)မ ဒးခရိုဟ်စှ်ေလဝ်ကီု ကာလၚုဟ်သြန် ကိုတ်ကဵုကၠံ ဒးဆောံလေၚ်လဝ်ရ။   

ဟိုတ်နူကျာလပှ်စိၚ်တုဲ ဂကောံသ္ၚိကၟိန် (၂၅)ဂကောံ၊ လၟိဟ်မၞိဟ်ဗ္ဒာဲ (၈၀) ဒးလဝ်ဘဲဒဏ်ကျာတုဲ ညးတအ်ဂှ် ကၠောံပြံၚ်အာမံၚ်ဒၟံၚ် ပ္ဍဲသ္ၚိဗ္ဒာဲဗ္ဒာဲတအ် သ္ၚိမသကလောကောဒေံညးတအ်ရဂှ် ဂွံတီကေတ်ရ။ 

ဟိုတ်နူကျာလပှ်စိၚ် ကပိုက်လွိၚ်လဝ် ပ္ဍဲကွာန်ဒဵုဣသိတုဲ ပရေၚ်ဇီုကပိုက်ဒးလီုလာ်လဝ်ဂှ် ဒပ်ပလိုတ်ပၟတ်၊ ဂကောံပရဟိတ ကေုာံ ညးဒေသတအ် ဘိုၚ်ပသောၚ်သ္အးကဵုလဝ်ရ။ 

ပ္ဍဲဂိတုမေ စၟတ်တ္ၚဲ(၂၃) အခိၚ်ဗ္တံ (၁၀) နာဍဳဂှ်လေဝ် ပ္ဍဲကွာန်နာတ်မှဝ် ပွိုၚ်ဍုၚ်ၜါသွာၚ်ဂှ် ဟိုတ်နူကျာလဗိုတ်သ္ကာတ်ကပိုက်လွိၚ်လဝ်တုဲ ဒဒန်ဒုၚ်သၞေံ (ဆိပ်ခံတံတာ) ဂှ် ဒးခရိုဟ်လီုလာ်စှ်ေလဝ်ရ။ 

ပရိုၚ်-သြၚ်လောန်တိုၚ်(မ်)

ဗီုရုပ် – ဒပ်ပလိုတ်ပၟတ် တွဵုရးဍုၚ်မန်