ကလေၚ်ဗလးကဵု အ္စာချူလိက်ဝေဟေန်အောၚ် ဒးဒုၚ်ရပ်လဝ်ဂှ် ဟိုတ်နူကၠောန်ပရေၚ်ရီုဗၚ်ဟံၚ်ပြာ် ညးဒးလဝ်ဘဲဒဏ်လဗိုတ်ကျာ ဏောၚ်ဂှ် ကံၚ်ဇြဳပၞာန်ဟီု

သေတ်တွေ၊ မေ(၂၅)

အ္စာချူလိက်ဝေဟေန်အောၚ် ကၠောန်ရေၚ်တၠုၚ်ကဵုလဝ် ကမၠောန်ရီုဗၚ်ဟံၚ်ပြာ်မၞိဟ် ညးဍုၚ်ကွာန် ဒးလဝ်ဘဲဒဏ်လဗိုတ်ကျာ မၞုံတွဵုရးရခေၚ်ဂှ် ကံၚ်ဇြဳပၞာန်ရပ်လဝ် ပ္ဍဲဂိတုမေ စၟတ်တ္ၚဲ (၂၃)တုဲ ပ္ဍဲဂိတုမေ စၟတ်တ္ၚဲ(၂၄) တ္ၚဲဏံ ကလေၚ်ဗလးကဵုရောၚ်ဂှ် ဟီုသ္ဂးလဝ် ပ္ဍဲချာန်နေဝ်တေဝ်လဳဂရာမ် ထံက်ဂလာန်ကံၚ်ဇြဳပၞာန်ရ။

ပ္ဍဲဂိတုမေ စၟတ်တ္ၚဲ (၂၃)အခိၚ်သဝ်တ္ၚဲ ကံၚ်ဇြဳပၞာန်ရပ်ကေတ်လဝ် မၞိဟ် (၅)တၠ ပါလုပ်သီု အ္စာချူလိက် ကေုာံ ညးမဒှ်ကောန်ဝုတ်ညးရ။

ဂကောံညးတအ် သွက်ဂွံထံက်ပၚ်ရီုဗၚ်ကဵု ပွိုၚ်ဍုၚ်ယျတေံတံၚ် ဇီုကပိုက်ဒးလီုလာ်လဝ် ဟိုတ်နူ လဗိုတ်ကျာမိုဝ်ခါဂှ် အကြာဂၠံၚ်ဍုၚ်ယျတေံတံၚ် နူဍုၚ်သေတ်တွေဂှ် ဒးဒုၚ်ရပ်လဝ် ပ္ဍဲပွိုၚ်ဍုၚ်ယျ တေံတံၚ် မွဲကရောံကဵုကွဳစက်ပ္ဍိုက်လဝ်ကပေါတ်ပန်ဖ္ဍိုက်ရဂှ် ဂွံတီကေတ်ရ။

အခိၚ်သၟာန်သၟုက်စၟဳစၟတ် အ္စာချူလိက်ဝေဟေန်အောၚ် ကေုာံကောန်ဂကောံ ညးဒးဒုၚ်ရပ်လဝ် တအ်တုဲမ္ဂး ကလေၚ်ဗလးကဵုရောၚ် က္ဍိုပ်သ္ကိုပ်လလောၚ်ပရိုၚ်ကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန် ဟီုသှ်လဝ်ကဵု မဳဒဳယာ ပ္ဍဲဂိတုမေ စၟတ်တ္ၚဲ(၂၃)တ္ၚဲတုဲကၠုၚ်တေံရ။

ဂိတုမေ စၟတ်တ္ၚဲ (၂၄)ဏံမ္ဂး ကလေၚ်ဗလးကဵု ဥူဝေဟေန်အောၚ်ဟေၚ်ရောၚ်တုဲ ကလေၚ်ဗလးကဵု ဂကောံပရဟိတ စိုပ်ကၠုၚ်နူလဂုၚ် ဒးဒုၚ်ရပ်လဝ်မွဲစွံၜါတၠတအ် ဟွံသေၚ်ရောၚ်ဂှ် ဟီုသ္ဂးလဝ်ရ။

စဵုကဵုအခိၚ်ဏံ ဟွံဂွံတီကေတ် ပရောပရာဟိုတ်ကံၚ်ဇြဳပၞာန် ဂွံရပ်လဝ်ဂှ်ဏီကီု ညးဒးဒုၚ်ရပ်လဝ်တအ် ဟွံဂွံအဆက်ကဵု ဂကောံသ္ၚိကၟိန်ညးတအ်ဏီရဂှ်လေဝ် ဂွံတီကေတ်ရ။

အ္စာချူလိက်ဝေဟေန်အောၚ်ဂှ် ပ္ဍဲသၞာံ ၂၀၁၈ တေံလေဝ် ဟိုတ်နူကၠောန်သ္ပလဝ်ပရေၚ်ဟီုတွံ တ္ၚဲစၟတ်သမ္တီဗှ်ဗၞုဟ်အောန်စိုတ် တ္ၚဲအခေါၚ်အဝဵုရခေၚ်ဒးဆောံလေၚ်ဂှ်တုဲ ကေၚ်ဒးဒုၚ်စောဲလဝ် ဂဗုတ်ကဵုအလဵုအသဳတွဵုရးရခေၚ် နကဵု (ဂဗုတ်ဆက်စၠောံဂကောံဟွံဗဗွဲဓဝ်) ၝောံပိုဒ် ၁၂၂ (၁)၊ ၝောံပိုဒ် ၅၀၅ (ခ)၊ ၝောံပိုဒ် ၁၇/၁ ရ။

ပရိုၚ်-သြၚ်လောန်တိုၚ်(မ်)

ဗီုရုပ်-ဗီုရုပ်တြေံ