ကောန်ဒပ်ပဳဒဳအာဖ် လုပ်စိုပ်ကၠုၚ် နကဵုလွဟ်လက်နက်မကမ်တံ နွံကၠုၚ် (၈) တၠယျဂှ် ကံၚ်ဇြဳပၞာန် တြးဝါဒ

ယှိုဲကူ၊ မေ (၂၅)

ကြဴနူကော်ဘိက် ကောန်ဒပ်စဵုဒၞါညးဍုၚ်ကွာန် (PDF) တံ သွက်ဂွံကလေၚ်လုပ်စိုပ်ကၠုၚ် အပ္ဍဲဗွိုၚ်သၞောဝ် မွဲကရောံကဵုလွဟ်လက်နက်မကမ်တံတုဲ ဂွံၜါသတ္တာဟဂှ် ကောန်ဒပ်ပဳဒဳအာဖ် နူကဵုရးဒေသ ကေုာံ တွဵုရး (၄) တံ နွံကၠုၚ် (၈) တၠယျဂှ် ကံၚ်ဇြဳပၞာန် လလောၚ်ပ္တိတ်ကၠုၚ် ပ္ဍဲလိက်ပရိုၚ်တံရ။

ပ္ဍဲဂိတုမေ (၁၀) တေံဂှ် ကောန်ဒပ်ပဳဒဳအာဖ် နူကဵုအပ္ဍဲပွိုၚ်ဍုၚ်အံၚ်မျေတာသာန် ကေုာံ ပွိုၚ်ဍုၚ်မဟာ အံၚ်မျေ ရးမာန္တလေဝ်ဂှ် (၃) တၠ၊ ကောန်ဒပ်ပဳဒဳအာဖ် အပ္ဍဲပွိုၚ်ဍုၚ်ကဂဝ် တွဵုရးချေၚ်ဂှ် (၃) တၠ ကေုာံ ကောန်ဒပ်ပဳဒဳအာဖ် နူကဵုအပ္ဍဲပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် (၁) တၠ လုပ်စိုပ်ကၠုၚ် အပ္ဍဲဗွိုၚ်သၞောဝ် သီုကဵုလွဟ်လက်နက်မကမ်တံရောၚ် သ္ဂးရ။

ကရောံကောန်ဒပ်ပဳဒဳအာဖ်တံဂှ် ဂကူ BAREDDA ပေဿတိုဝ် မွဲဇကိုအ်၊ ပေဿတိုဝ်တဲ ၂ ဇကိုအ် ကေုာံ သွက်လွဟ်လက်နက်မကမ်တံဂှ် ညးမၞုံတာလျိုၚ်တံ ကဵုလဝ်သြန်ထံက်ပၚ်ရောၚ် ဟီုဂးလဝ် ကီုလေဝ် စဵုကဵုပမာဏၜိုတ်လဵု ကဵုလဝ်ရောဟီုဂှ် ဟွံထ္မံက်ထ္ၜးလဝ်ရ။

ပ္ဍဲဂိတုမေ (၂၂) ဂှ်လေဝ် ကောန်ဒပ် PDF နူဍုၚ်ယှိုဲကူ၊ တွဵုရးကချေၚ်ဂှ် (၁) တၠ လုပ်စိုပ်ကၠုၚ် အပ္ဍဲဗွိုၚ် သၞောဝ်တုဲ လွဟ်လက်နက်ပါကၠုၚ်ကရောံညး KA-22 မွဲဇကိုအ်၊ ဗဳအေ ၉၁ ဗုမ်တဲမွဲမ၊ အာမ်ဂျဳ−၁ ဗုမ်တဲ မွဲမ ကေုာံ မကမ်ဂမၠိုၚ်တံဂှ် ပအပ်ကဵုလဝ် ဇရေၚ်ညးတာလျိုၚ် ဒပ်ဗာန်မဝ်တံရောၚ် သ္ဂးလဝ်ရ။

လ္ပာ်ကံၚ်ဇြဳပၞာန်တံဂှ် သွက်သေနာတ် ၁ ဇကိုအ်ဂှ် သြန် ၅၀ ကိုဋ်၊ သွက်ဗုမ်တဲ ၂ မဂှ် ၃ ကိုဋ် ကေုာံ သွက်ကပေါတ်ဆက်စပ် မကမ်ဂမၠိုၚ်ဂှ် ၃ ကိုဋ် အပံၚ်ဖအိုတ် ၅၆ ကိုဋ် ကဵုလဝ်နဒဒှ်လာပ်ဗဇဴရောၚ်ဂှ် ထ္မံက်ထ္ၜးလဝ် ပ္ဍဲလိက်ပရိုၚ် ဂိတုမေ (၂၄) တေံရ။

ညးဒုၚ်တာလျိုၚ် ဂကောံပၠန်ဂတးသၟဝ်တိ (နတ်ဆိုး) ဖျေံသ္ဇိုၚ်မတ္တရာ ရးမာန္တလဝ်ဂှ် ပြဝကံၚ်ဇြဳပၞာန်ဂှ်ဝွံ ဒှ်ဒၟံၚ်သဘဴတြးဝါဒတုဲ အပ္ဍဲကဵုဂကောံညးတံကဵု ဂကောံမဟာမိတ်ညးတံဂှ် ပွမလုပ်စိုပ်ဖျေံလွဟ် နုက်တိတ်အာတံ ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အရာတံဏံဂှ် ဒှ်အရာတြးဝါဒရဏောၚ်။ ဒဵုကဵုအကာဲအရာလၟုဟ်ဂှ် ပ္ဍဲကဵုဂကောံမဟာမိတ်တံ၊ ဂကောံမချဳဒရာၚ်ဒၟံၚ် ပ္ဍဲဗလးတိတံဏံ သီုဖအိုတ်ဂှ် အခိၚ်လၟုဟ် အရာမလုပ်စိုပ်ဖျေံလွဟ်တံ၊ နုက်တိတ်အာ နူကဵုဂကောံတံဂှ် ဒဵုကဵုအခိၚ်လၟုဟ် ဟွံဂွံတီကေတ် ချိုတ်တ်ပၠိုတ်တ်ဏီရ၊ ဟွံမွဲလေဝ် ဟွံမွဲဏီပုဟ်။ နကဵုလညာတ်ပိုယ်တံဂှ်တှ်ေ တြးလဝ်ဝါဒဏောၚ်ဂှ် ထေၚ်ကေတ်ရ။ အကာဲအရာ လၟုဟ်ဏံဂှ် ဂကောံမွဲကုမွဲဂှ် အဆက်နွံဒၟံၚ်တွဵုရဏောၚ်။ နူကဵုဂကောံညးတံ ယဝ်ရလုပ်ဖျေံလဝ် လွဟ်ဗီုဏံတံ၊ နုက်တိတ်အာတံ စနူသောဲသောဲဗြဲဗြဲဂှ် ဂွံတီကေတ်ဖအိုတ်ရ။ ကိစ္စဇၞော်ဇၞော်သာ် ဏံတံဂှ်တှ်ေ အပ္ဍဲကဵုဂကောံဂမၠိုၚ်ဂှ် ပရိုၚ်ဇၞော်မံၚ်ဟဂှ်ရ။ အပ္ဍဲကဵုဂကောံဂမၠိုၚ်ဂှ် ၜိုတ်သြိုဟ်ညိၚ် ဝတ်ဒၟံၚ်ရ၊ စပ်ကဵုပရိုၚ်ဏံတုဲ မုမှမိၚ်လဝ်ဟွံမွဲဏီပုဟ်” သာ်ဝွံ ညးသ္ဂးရ။

ကံၚ်ဇြဳပၞာန်ဂှ် ကောန်ဒပ်စဵုဒၞါညးဍုၚ်ကွာန် မလုပ်စိုပ်ကၠုၚ် အပ္ဍဲဗွိုၚ်သၞောဝ် သီုကဵုလွဟ်လက်နက် မကမ်တံဂှ် လာပ်အောန်အိုတ် နူကဵု (၂) ကိုဋ်ဒ္ကေဝ် စဵုကဵု (၇၅) ကိုဋ်ဒ္ကေဝ် ထံက်ပၚ်ကဵုအာဏောၚ် ပ္ဍဲဂိတုမေ (၉) တေံ လလောၚ်တြးလဝ်ရ။

နကဵုညးမလုပ်စိုပ်ကၠုၚ် သီုလွဟ်လက်နက်မကမ်တံဂှ် ယဝ်ရဒှ်မၞိဟ်ကလိလောန်လဝ် အမှုဂစိုတ်မၞိဟ်၊ အမှုသ္ပကောန်သမ္ဘာတံ၊ ယဝ်ရဒှ်မၞိဟ် ကလိလောန်လဝ် ဒုဟ်ဒဏ်သ္ကဵုဇီုကပိုက်တဴ ညးတၞဟ် သ္အာၚ်မွဲမွဲ တံဂှ်မ္ဂး ဒးသောၚ်ကလးတိုန်အာရုၚ်ဂဗုတ် ပ္ဍဲကဵုရုၚ်သၞောဝ်ဓဝ်ဏောၚ်ဂှ် သ္ဂးလဝ်ရ။ပ္ဍဲကဵုသောၚ်ကလးသာ်ဏံဂှ်လေဝ် ကံၚ်ဇြဳပၞာန်ဂှ် တန်တဴကဵုဒုဟ်ဒဏ်ဂမၠိုၚ်တုဲ ကၠောန်သ္ပအာကဵု ပရေၚ်ဖအောန်ဖျေံ မၞုံပၟိက် လ္ဂောံကဵုသၞောဝ်တံဂှ်တုဲ အရီုဗၚ်ထံက်ပၚ်မၞုံပၟိက်တံဂှ်လေဝ် ရေၚ်တၠုၚ် ကဵုအာဏောၚ်ဂှ် လလောၚ်တြးလဝ် ပ္ဍဲကဵုလိက်ပရိုၚ် နူဂိတုမေ (၉) စဵုကဵုဂိတုမေ (၁၆) တေံရ။

ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် (MSRF) နာဲနဂါဂှ်လေဝ် ပရေၚ်စန်ဒက်တံၚ်ဂြဲ ကံၚ်ဇြဳပၞာန်တံဂှ် ဓဝ်ပတှ်ေဟွံမွဲတုဲ သွက်ဂကောံဒပ်ပၞာန် ဂွံသရိုဟ်စှ်ေအာဂှ်ဟေၚ် ဆက်လုပ်အာပေါဲဗ္တိုက်ဏောၚ်ဂှ်ကဵု အရာမကော်ဘိက် သွက်ဂွံဖျေံလွဟ်ဂှ်ဝွံ ဒှ်ကလောန်ဟွံသေၚ်ပုဟ်ဂှ် ဟီုကဵု ဌာန်ပရိုၚ် သြၚ်လောန်တိုၚ်(မ်) ရ။

“ကောန်သ္ဂံၚ်ပၠန်ဂတးပိုယ်တံဂှ်ဝွံ သၠးကၠေံဂြောဝ်ဂတာ၊ မသကလောကောဒေံ၊ တွဳဗွိုၚ်၊ ပိုန်ဒြပ် အရပ်ရာအိုဿီုတုဲ သၠးကၠေံဒတုဲဖဵုဇကုတုဲ သွက်ဂွံပလှ်ဖျေံဂကောံပၞာန် မအုပ်ဓုပ်ဒၟံၚ်အတေၚ် အဓမ္မဂှ်တုဲ ဗ္တိုက်ဒၟံၚ်ဂှ်ရ တံၚ်ဂြဲကေတ် နကဵုလာပ်သကာဍေံတံတုဲ ပြဝကဵုဖျေံလွဟ်ဂှ်ဝွံ ဍာံဍာံဂှ် ဒှ်သ္ဇက်ဒးဂြိုၚ်ရဏောၚ်ဂှ် အဲညာတ်ရ။ ပၞာန်တံဏံဂှ် အခိၚ်လဵု ကတိကေၚ်ဗိုန်လဝ်ကီုရော။ အတိုၚ်ဟီု လဝ်ဂှ် ဆောဝ်လအ်ကေၚ်ကၠောန်လဝ်ကီုရော။ ပိုယ်တံ ဖျေံထောံလွဟ်သာ်ဏံမ္ဂး ကၟိန်ဍုၚ်ဖေဝ်ဒရာ ဒဳမဝ်ကရေဇြဳ မၜိုဟ်လလမ်မွဲ ပိုယ်တံစၟဳစလဝ်တံဂှ် ဒက်ပ္တန်မာန်ဟာ။ အခေါၚ်အရာမၞိဟ်ဂှ် ပိုယ်တံ ကလိဂွံဍိုက်က်ပေၚ်ၚ်မာန်ဟာ။ ကလေၚ်ချပ်ဗ္စာကေတ် အရာတံဏံမ္ဂး ကဵုလာပ်သကာတုဲ ပြဝကဵုဖျေံ လွဟ် ကုကောန်သ္ဂံၚ်ပၠန်ဂတးတံဂှ် သာ်လဵုမှ ဒှ်အာကလောန်ဟွံသေၚ်ပုဟ်ဂှ် ပိုယ်တံထေၚ်ကေတ်ရ” သာ်ဝွံ သ္ဂးရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ကိစ္စဂကောံပၞာန်တံ ကဵုဖျေံလွဟ်၊ ဖျေံလာပ်သကာ ဂှ်ဝွံ ဂကောံဇြဟတ်ပၠန်ဂတးတံဂှ် တံၚ်ဂြဲဟွံမာန်တုဲ အခိၚ်ကၠောန်ကၠုၚ် နကဵုနဲကဲကြမ်ကြဓဇန်တံဂှ် စိုတ်ဓာတ်ပၠန်ဂတးညးဍုၚ်ကွာန်တံ သာတုဲ သၠုၚ်တိုန်ကၠုၚ်ဏောၚ် သ္ၚဳဂၠိပ်လဝ်ရ။

“ဟိုတ်နူပရေၚ်ဗ္တိုက်ပကီုပရာပ် ဂကောံပၞာန်တံတုဲရ ဒှ်ကၠုၚ်လဝ်ဏောၚ်။ ဟိုတ်ဂှ်ရ အခိၚ်ပြဝပကီု ပရာပ် ကံၚ်ဇြဳပၞာန်တံ ဆက်နွံဒၟံၚ် ဒဵုကဵုအခိၚ်လၟုဟ်ဂှ် စိုတ်ဓာတ်ကလေၚ်ပၠန်ဗ္တိုက်အာ နကဵုလွဟ် လက်နက် မဂဗမရပ်တံဂှ် ဂၠိုၚ်တိုန်ကၠုၚ်ဒၟံၚ် အပ္ဍဲသန္ထာန်ညးဍုၚ်ကွာတ်တံဏောၚ်။ ပ္ဍဲကဵုအကာဲအရာ သာ်ဏံဂှ် ကိစ္စကံၚ်ဇြဳပၞာန်ဟီုဂးကၠုၚ် ကၠုၚ်ဖျေံလွဟ်တံ ကဵုလာပ်သကာတံဟီုဂှ် သာ်လဵုမှတံၚ်ဂြဲ ဂကောံဇြဟတ်တံဏံ ဟွံမာန်ပုဟ်။ ဒဵုကဵုအခိၚ်လၟုဟ် ကၠောန်ကၠုၚ်ဒၟံၚ်ပၞာန်ထ္ပက်တရဴကျာတံ နဲကဲမကြမ်ကြဓဇန်တံဂှ် စိုတ်ဓာတ်တဝ်စၞေဟ်ညးဍုၚ်ကွာန်တံ သာတုဲသၠုၚ်တိုန်ကၠုၚ်ဏောၚ်။ နကဵုပရေၚ်ပၞာန်ဂှ် ဗ္တိုက်ပ္တိတ်ကံၚ်ဇြဳပၞာန်ဏံ လုကဴပလှ်ဖျေံဟွံမာန်မ္ဂး ညးဍုၚ်ကွာန်တံဂှ် ကလိဂွံပရေၚ်ၜိုဟ်လလမ်ဟွံမာန်ပုဟ်၊ ပရေၚ်ဗၠးၜးဟွံမာန်ပုဟ်၊ ကလိဂွံဒဳမဝ်ကရေဇြဳဟွံမာန်ပုဟ် ပ္ဍဲအကာဲအရာကၠိုဟ်လဝ်သာ်ဏံဂှ် ဗီုဍေံတံစၟဳစလဝ် ဖျေံလွဟ် ဂွံလုပ်စိုပ်ကၠုၚ်ဂှ် ဒှ်ဟွံမာန်လးလရ” သာ်ဝွံ ညးသ္ဂးရ။

ပ္ဍဲသၞာံ ၂၀၂၁ ဂိတုဖေဖဝ်ဝါရဳ (၁) အခိၚ်ညးဍုၚ်ကွာန်ကောန်အရာပ် မၞုံပၟိက်ကဵုဒဳမဝ်ကရေဇြဳ မဒစဵုဒစးပရေၚ်ပၞာန်သီအဝဵုတံ ထ္ၜးဒၟံၚ်ဆန္ဒ ဗွဲမၜိုဟ်လလမ်ဂှ် ပွမပါ်ထ္ကးပန်ပှော်တံ၊ ဍဵုဍိုက်ပျဲပျာံ ဂစိုတ်ဂယိုၚ်တံ ကေုာံ ရပ်ဒက်ဖျေံထံၚ်တံဂှ် ကၠောန်လဝ်အဆက်က်ရ။

ဟိုတ်ဂှ်ရ ညးသၟတ်ချဳဒရာၚ်ကတိုၚ်ကၟဟ် ပရေၚ်ဒဳမဝ်ကရေဇြဳတံဂှ်ဝွံ အာစိုပ်ပ္ဍဲတိဍာ်ဗၠးၜး ဒေသကောန်ဍုၚ်အရၚ်မကြပ်တံဂှ်တုဲ ရုဲစှ်လဝ် သွက်ဂွံကွာ်ဂၠံၚ်တရဴပၠန်ဂတးရပ်လွဟ်အိုတ်တုဲ အခိၚ်လၟုဟ်ဂှ် ဂကောံဒပ်ရပ်လွဟ် (၅၀၀) ပြၚ် နွံကၠုၚ်လဝ်ရ။

အလဵုအသဳညဳသၟဟ်ဂကူ NUG ဂှ်လေဝ် ဇြဟတ်ဂကောံဒပ်ပၠန်ဂတးတံဂှ်ဝွံ ခိုဟ်နူကံၚ်ဇြဳပၞာန်ယျဂှ် လလောၚ်ပ္တိတ်ဟီုဂးကၠုၚ်လဝ် ပ္ဍဲကဵုတ္ၚဲပၠန်ဂတးက္ညၚ် ပေၚ် (၂) သၞာံတေံဂှ်ရ။

အခိၚ်လၟုဟ်ဂှ် ဂကောံဒပ်စဵုဒၞါညးဍုၚ်ကွာန် (PDF) တံဝွံ မ္ၚးနူပရေၚ်ထပိုတ်ရိုဟ်ကၞက် သၞောတ်တၠအဝဵု ပၞာန်ဂှ် ရန်တၟံလဝ် စဵုကဵုတိုၚ်ပ္ကဴ သ္ဂောံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ အရာကောန်ဍုၚ်အရၚ်တံ မၞုံပၟိက်တံဂှ်တုဲ လုပ်ဒၟံၚ်ပေါဲဗ္တိုက်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−MOI