မတ်မလီု – မေ(၂၅)
ဂကောံပၞာန်သီအဝဵု သုၚ်စောဲပၞာန်ကျာတုဲ ဟိုတ်နူပရေၚ်ဗတိုက်ပန်ပှော် ညးဍုၚ်ကွာန်တုဲကောန်အရာပ် (၆၃၄)တၠ ဒးချိုတ်အာလဝ်ရဂှ် ဂကောံသုတေသန ဉာဏ်လေန်တေတ် လလောၚ်တြးလဝ် ပရိုၚ်ရ။
အလုံမွဲကၟိန်ဍုၚ်ဗမာ ဟိုတ်နူပရေၚ်ဗတိုက်ပန်ကဵုပၞာန်ကျာတုဲ စပ်ကဵုပရေၚ်ကောန်အရာပ်ဒးချိုတ်လဝ် “ပွဂကောံပၞာန်ပ္ကီုပရာပ် သုၚ်စောဲပၞာန်ကျာ ပြိုက်ဂစိုတ်ဒၟံၚ် ကေုာံ တၚ်ဒတူလာၚ်ကၟိန်ဍုၚ်နာနာ”ဂးဂှ် ဓမံက်ထ္ၜးလဝ် ပ္ဍဲလိက်စံၚ်ဂကောံသုတေသန ဉာဏ်လေန်တေတ်ရ။
ဂကောံသုတေသနဉာဏ်လေန်တေတ်ဂှ် ဒှ်ဂကောံသုတေသနညးအရာပ် လ္ၚတ်သ္ၚဳဂၠိပ် မၚ်ရံၚ်ကျောဝ် ဒၟံၚ် ပရေၚ်ဍုၚ်ကွာန် ကေုာံ ပရေၚ်ဒဒှ်မၞိဟ် အဆက်ဟွံပိုတ်သ္ကုတ် မွဲဂကောံရ။
ပ္ဍဲလိက်ဒုၚ်စဳရေၚ်ဂှ် နူဂိတုဖေဖဝ်ဝါရဳ သၞာံ ၂၀၂၁ ဒပ်ပၞာန်သီလဝ်အဝဵုကၟိန်ဍုၚ်ဗၟာတုဲ စဵုကဵုသၞာံ ၂၀၂၃ ဂိတုဨဗြဴဏံ ပရေၚ်ဂကောံပၞာန် ပန်ဗတိုက်လဝ်ဂမၠိုၚ် ပါလုပ်ဒၟံၚ်ရ။
စပ်ကဵုပရေၚ်ဂကောံပၞာန် ပန်ဗတိုက်လဝ်တုဲ လစွံစိုတ်တၚ်ဒတူလာၚ်၊ မူဝါဒ ကေုာံတၚ်ကၠောန် ရေၚ်တၠုၚ် ကၟိန်ဍုၚ်နာနာတအ်လေဝ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ်တၟေၚ်ဏံရ။
ပ္ဍဲကဵုပရေၚ်ဒပ်ပၞာန်သီအဝဵု ဗတိုက်လဝ်ကဵုပၞာန်ကျာဂှ် တွဵုရးကရေၚ် (၃၂၂)ဝါ၊ ရးသေတ်ဂါၚ် (၂၉၅)ဝါ၊ တွဵုရးကရေၚ်ဍာဲ (၁၃၄)ဝါ၊ ရးဗဂေါ (၆၈)ဝါ၊ ရးမဂွေ (၆၆)ဝါ၊ တွဵုရးရခေၚ် (၂၁)ဝါ၊ တွဵုရးဍုၚ်မန် (၁၀)ဝါ ကေုာံ ရးအၚ်ဝ (၉)ဝါ ပံၚ်ဖအိုတ် စဵုကဵုလၟိဟ် (၁၄၂၇)ဝါ ကၠောန်သ္ပလဝ်ရ။
သ္ပတမ်နူအခိၚ်ကံၚ်ဇြဳပၞာန်သီအဝဵုတုဲ ပ္ဍဲပွိုၚ် (၈၅၀)တ္ၚဲဂှ် နကဵုဗ္ၜတ် (၃)တ္ၚဲ (၁)အလန် ကၠောန်သ္ပလဝ် ပရေၚ်ဗတိုက်ပန်ပှော်ညးဍုၚ်ကွာန် နကဵုပၞာန်ကျာရ။
ပရိုၚ်-သြၚ်လောန်တိုၚ်(မ်)
ဗီုရုပ် – NLTA
sanlontai