အပ္ဍဲလၟေၚ်တရဴမိုဝ်ဒဳဂှ် အိန္ဒိယ ကေုာံ အဝ်သတြေလျ လလောၚ်တြးလဝ် တၚ်တုပ်စိုတ် စပ်ကဵုပရေၚ် ဆုဲပြံၚ်သ္ပဒတဴ

သေဒ္ဒနဳ၊ မေ (၂၅)

နဒဒှ်မွဲဒကုတ်မွဲဒကဴ လၟေၚ်တရဴ သ္ကိုပ်ဝန်ဇၞော်အိန္ဒိယ နာရာန်ဒရာမိုဝ်ဒဳဂှ် အိန္ဒိယ ကေုာံ အဝ်သတြေ လျတံ လလောၚ်တြးလဝ် တၚ်တိုပ်စိုတ် စပ်ကဵုပရေၚ်ဆုဲပြံၚ်မံၚ်စံၚ် ကေုာံ ဂကောံကမၠောန်ဗွဲတၟေၚ် ဟိုတ်ဒရိုဝ်ဂျေန်သာ်သ္ၚေက်မွဲရ။

မေဿတာမိုဝ်ဒဳ ကေုာံ သ္ကိုပ်ဝန်ဇၞော်အဝ်သတြေလျ အာန်တိုဝ်နဳ အေဝ်လ်ဗာနဳတံ ကၞောတ်သၞာံဏံ ဒဒှ်ရစၟဳစလဝ် သွက်ဂွံပတုဲထောံ ပရေၚ်ပ္ညဳပ္ညပ် သွက်တၚ်တုပ်စိုတ် ပရေၚ်ကူသာန်သွံရာန် ဗွဲမဗၠးၜးဂှ် ဟီုဂးလဝ်ရ။

သမ္မတအမေရိကာန် ဂျဵုဗိုၚ်ဒေန် ကေုာံ သ္ကိုပ်ဝန်ဇၞော်ဂျပါန် ဖူမဳယိုဝ်ကဳယှဳဒါတံ ကြဴနူပလီုကၠေံ လၟေၚ်တရဴတုဲဂှ် မေဿတာမိုဝ်ဒဳ မဒှ်က္ဍိုပ်သ္ကိုပ်ဍုၚ် Quad မွဲ မစဳဇန်လဝ် သွက်ဂွံအာစိုပ် အဝ်သတြေ လျဂှ် ကြဴနူဟီုမြော်ဂလာန် ကုပုရိသာတ်ညး ဗၞတ် (၂) ဠက် ပ္ဍဲကဵုသေဒ္ဒနဳတုဲဂှ် ညးတံမၞိဟ်ၜါ ဆဵုဂဗလဝ်ညးသ္ကအ်ရ။

အလဵုအသဳမိုဝ်ဒဳဝွံ ဒဒှ်ရပိုၚ်ခြာသၞောတ်ဗ္ၜတ်လဝ် အခေါၚ်အရာမွဿလေမ် ကေုာံ ဂကောံမၞိဟ်အောန် တၞဟ်ဟ်တံသၟးဟွံက သီုကဵုအခေါၚ်ဗၠးၜးပရိုၚ်တံဏောၚ်ဂှ် ညးချဳဒရာၚ်ကတိုၚ်ကၟဟ်တံဂမၠိုၚ် စောတ်စောဲလဝ်တုဲ ဒစဵုဒစးလဝ် လၟေၚ်တရဴညးဂှ်ရ။

ပ္ဍဲမွဲဒမြိပ်ဍုၚ်သေဒ္ဒနဳဂှ်လေဝ် မွဲကရောံပိုဝ်သတာဒစဵုဒစး မိုဝ်ဒဳတံဂှ် ဂကူသေတ်(ခ်)တံ အာတ်မိက်ထ္ၜး လဝ်ဆန္ဒ တွဵုရးတၞဟ်ခြာမွဲရ။

မေဿတာမိုဝ်ဒဳဝွံ စပ်ကဵုဘာကျာ်ဟိန္ဒူ မၞုံဍုၚ်သေဒ္ဒနဳ ဒးဒုၚ်ဗ္တိုက်ဂှ်တုဲ ထ္မံက်ထ္ၜးလဝ် ဒဒှ်ရဒှ်ဓဝိၚ်စံၚ် တူဂှ်တုဲ ကုညးတၠဒုဟ် မကလိလောန်လဝ်တံဂှ်လေဝ် ဒဒှ်ရကၠောန်အာပရေၚ်ကေတ်ဒုဟ် မသ္ကာတ်မြဟ်တံဏောၚ်ဂှ် ဟီုဂးလဝ်ရ။

“ပရေၚ်ဆက်ဆောံ ဍုက်ကေဝ်ဒဒှ်ေဒယှ် အကြာအိန္ဒိယ ကေုာံ အဝ်သတြေလျတံဂှ် ဒၟါနူပြဝဍေံတံ ဟွံသေၚ်မ္ဂး ဒၟါနူလညာတ်ဂမြၚ်ညာဏ်ဍေံတံတုဲ အရာမသ္ကဵုဇီုကပိုက်တဴသာ်လဵုမှ ပိုယ်တံ ဒုၚ်အာတဲဟွံ သေၚ်ပုဟ်” ဂှ် မိုဝ်ဒဳ ဟီုဂးလဝ် ပ္ဍဲကဵုပေါဲသောၚ်ကလးလိက်ပရိုၚ်ဂှ်ရ။

ပ္ဍဲကဵုပရေၚ်ဆဵုဂဗ ညးတံမၞိဟ်ၜါ ပ္ဍဲကဵုတ္ၚဲဗုဒ္ဓဝါဂှ်ဝွံ သွက်ဒေသအေန်ဒိုဝ်−ပသိဖေခ် မၜိုဟ်သြိုဟ် သာယာ၊ မၞုံကဵုပွကၠးမှး မဂီုကၠီုတံဂှ် ဗပေၚ်လဝ်ဇြဟတ် ကုကတိညးတံရောၚ်ဂှ် ရုၚ်သ္ကိုပ်ဝန်ဇၞော် အဝ်သတြေလျ ဟီုဂးလဝ်ရ။

တၚ်တုပ်စိုတ်တၟိ စပ်ကဵုပရေၚ်ဆုဲပြံၚ်သ္ပဒတဴဂှ်ဝွံ သၠုၚ်ပ္တိုန်အာ ပရေၚ်ရေၚ်တၠုၚ်ၜါသာ် သၟာပရေၚ်ပိုန်ဒြပ်တံ ကေုာံ ကွးဘာ၊ ညးတၠတဆိပ်ကြာတံ၊ သုတေသဳပရေၚ်ပညာတံရောၚ် သ္ဂးလဝ်ရ။

ကၠေၚ်စၞပၟတ်ဇြတၟံတံဂှ် ဟွံသုၚ်စောဲမွဲသာ် နိဿဲကေတ် ဂကောံကမၠောန်ဗွဲတၟေၚ်ၜါဍုၚ် ဟိုက်ဒရိုဝ်ဂျေန် သာ်သ္ၚေက် မသၠုၚ်ပ္တိုန်အာ ပရေၚ်ပံၚ်တောဲရေၚ်တၠုၚ် ပရေၚ်ကၠောန်ပ္တိတ်သၟုဟ် ဓာတ်တံဂှ်တုဲ လ္တူစေဝ်ပၞောန်တံဏံဂှ် သ္ကိုပ်ဝန်ဇၞော်ဂမၠိုၚ် တုပ်လဝ်စိုတ်တုဲ သွက်ဂွံလလောၚ်တြး ဒၞါဲဌာနန္တရတၟိ ကေၚ်ကာကလုတ်တမာန် ပ္ဍဲကဵုဗေန်ဂါလူရူ၊ အိန္ဒိယ ကေုာံ အဝ်သတြေလျ၊ ဘရေဿဗုၚ်တံဂှ်လေဝ် တုပ်လဝ်စိုတ်အိုတ်ရ။

မေဿတာမိုဝ်ဒဳဝွံ ကြဴနူဂွံဒုၚ်ရုဲစှ် အလန်ကိုပ်ကၠာအိုတ် နဒဒှ်အလဵုအသဳညးတုဲ လအ်ဂွံမွဲၜါဂိတု ပ္ဍဲကဵုဂိတုနဝ်ဝေမ်ဗာ သၞာံ ၂၀၁၄ ဂှ် အာစိုပ်လဝ် အဝ်သတြေလျ အလန်လက္ကရဴအိုတ်ရ။

Ref: LBC News