ကံၚ်ဇြဳပၞာန်ဂြာတ်ထောံဖျေံဗုမ် ပ္ဍဲဗဒိုပ်ပါဲပၞာန်မိုဝ်ဗျာ ကဵုက္ၜၚ်ကျာ

မိုဝ်ဗျာ-မေ(၂၆)

တွဵုရးကရေၚ်ဍာဲ၊ ဗဒိုပ်ပါဲပၞာန် မၞုံဗ္ဒာဲဍုၚ်မိုဝ်ဗျာ မွဲဗဒိုပ်ဂှ် ဒၟာနူကံၚ်ဇြဳပၞာန် ဂြာတ်ထောံဖျေံဗုမ် နကဵု ဂျေတ်ဖိုက်တာဂှ်ရ ညးဗြဴမွဲတၠ ဇီုကပိုက်ဒးလဝ်ဘဲဝပ်ရဂှ် PDF မိုဝ်ဗျာ ဟီုကဵု ဌာန်ပရိုၚ် သြၚ်လောန်တိုၚ်ရ။

ပ္ဍဲဂိတုမေ စၟတ်တ္ၚဲ (၂၃)တုဲကၠုၚ်တေံ အခိၚ်ဗ္တံ ၜိုတ်(၁၀)နာဍဳဂှ် ပေါဲဗတိုက်ဟၟဲမွဲသာ် ကံၚ်ဇြဳပၞာန် ကၠုၚ်ဂြာတ်ထောံဖျေံဗုမ် ပ္ဍဲမွဲဗွိုၚ်မိုဝ်ဗျာ နကဵုက္ၜၚ်ကျာ(၂)ဝါကီု နူဒပ်အမၠံက်လေဝ် ပန်ဖျေံလဝ် နကဵုလွဟ်ဇၞော်ဂမၠိုၚ်ရ။

ဟိုတ်နူပန်ဖျေံလဝ်လွဟ်လက်နက်တအ်တုဲ သ္ၚိဒၟံၚ် ပ္ဍဲဗဒိုပ်ပါဲပၞာန်လ္ၚဵုကီု သ္ၚိညးဍုၚ်ကွာန် လ္တူဍုၚ်မိုဝ် ဗျာလ္ၚဵု ဒးလီုလာ်လဝ်ကီု ညးဗြဴပါဲဘဲပၞာန်မွဲတၠ ဇီုကပိုက်ဒးလဝ်ဝပ်တုဲ ၜိုန်ရပလံၚ်ဗစိုပ်လွဳလွတ်လဝ် ပ္ဍဲရုၚ်ဂဥုဲကီုလေဝ် အကာဲအရာသောဲသောဲဗြောဲဂှ် ဟွံဂွံတီကေတ်ဏီရ။

ပွမပန်ပှော်ဖျေံလွဟ်ဇၞော် ပ္ဍဲဗဒိုပ်ပါဲပၞာန် ညးဍုၚ်ကွာန်တအ် မံၚ်တန်တဴဒၟံၚ် ဗီုဏံဂှ် ဒှ်တံဒပ်ၚိုဲတောၚ် (၁၀၂) ဖျေံသ္ဇိုၚ်ဒဳမအ်ဇြောရဂှ် ၜိုန်ရဟီုဂးဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာ ဟွံမာန်ဏီရ။

အခိၚ်လၟုဟ်ဏံ ညးပါဲဘဲပၞာန်တအ်ဂှ် ဟိုတ်နူဘဲကံၚ်ဇြဳပၞာန်တုဲ ဒးပြံၚ်ဆုဲမံၚ်ဒၟံၚ် ပ္ဍဲဒၞာဲသာသ္ၚောဲတအ်ရဂှ် ကောန်ဒပ် PDF မိုဝ်ဗျာမွဲတၠ ဟီုသ္ဂးလဝ်ရ။

ပ္ဍဲပယျဵုသေံဇၞော်-ကရေၚ်ဍာဲ ကြပ်ညောန်ဒၟံၚ်ကဵု မိုဝ်ဗျာဂှ်မ္ဂး သ္ပတမ်နူတုဲကၠုၚ် ၜိုတ်(၃)ဂိတုတေံတုဲ ပေါဲဗတိုက်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တအ် သာတုဲသ္ကာတ်မြဟ်ကၠုၚ်ရ။

သ္အာၚ်နူဂှ်ပၠန် ပ္ဍဲမွဲဗွိုၚ်မိုဝ်ဗျာဂှ် ခလရ-၁၀၊ ၁၂၊ ကေုာံ ၁၄ သၟဝ်တဲၝောံဒပ်-၆၆ ကံၚ်ဇြဳပၞာန်တအ် သွက်ဂွံထ္ပက်လုပ်ကရောၚ်ပၞာန် ပံၚ်ကောံကၠောန်သ္ပဒၟံၚ်ရဂှ် ဂွံတီကေတ်ရ။

ပ္ဍဲမိုဝ်ဗျာဂှ် ဂိတုမေ စၟတ်တ္ၚဲ(၂၄) တ္ၚဲဏံ စဵုကဵုအခိၚ်နူဂယးဂှ် အကြာကံၚ်ဇြဳပၞာန်ကဵု ဒပ်စဵုဒၞာညးဍုၚ် ကွာန်တအ် ၜိုန်ရပေါဲဗတိုက်ဟၟဲဏီကီုလေဝ် ဟိုတ်နူဒှ်ဒၟံၚ်အကာဲအရာ မၚ်ရံၚ်ကျောဝ်ဒၟံၚ် သီုၜါလ္ပာ်ဂှ်ရ အခိၚ်ဟွံရုဲ ပေါဲဗတိုက်ဒှ်ကၠုၚ်မာန်ဒၟံၚ်ရဂှ် ညးတာလျိုၚ် PDF မိုဝ်ဗျာ ဟီုသ္ဂးလဝ်ရ။

ပ္ဍဲတွဵုရးကရေၚ်ဍာဲဂှ် ဟိုတ်နူဒပ်ကံၚ်ဇြဳပၞာန် ပ္တဝ်လဝ်ကဵုညးဍုၚ်ကွာန်တုဲ ဗတိုက်ကၠုၚ်ဒၟံၚ်ဂှ်ရ ညးဍုၚ်ကွာန် ဒးပါဲဓလေတ်ဒၟံၚ်ဘဲပၞာန် (၂)ကိုတ်ပြၚ်တအ် ဒးဆုဲပြံၚ်မံၚ်တန်တဴဒၟံၚ် ပ္ဍဲဂြိုပ်ဇၞော် ဒၞာဲလွဟ်ဇၞော်စိုပ်ဟွံမာန်သိုက်က်ရဂှ် ဂွံတီကေတ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – CJ(ပ္ဍဲဍုၚ်မိုဝ်ဗျာ မွဲဒၞာဲ)