ကျာ်ထဝ်၊ မေ (၂၆)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ဂကောံကွာန်အဗိုၚ်၊ ပ္ဍဲကွာန်တယိတ်ကုန်ဂှ် ပ္ဍဲဂိတုမေ (၂၅) အခိၚ်နူဂယးတေံ ဟိုတ်နူဂဂဵုတးပန်ဒးအာလဝ်ဂှ်ရ ညးဒေသမွဲတၠ ချိုတ်တုဲ မွဲတၠ ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် အခိၚ်နူဂယး ၜိုတ် (၇) နာဍဳ သမ္ဘာတၠသ္ၚိ ကိုဝ်နာၚ်လေန်တံ (၂) တၠ မမံၚ်ဒၟံၚ် အပ္ဍဲကၠအ်ထၜိုတ် ဗ္ဒါဲကျာ်ဂ္ဇအ် ကွာန်တယိတ်ကုန် အခိၚ်နွံဒၟံၚ်အပ္ဍဲသ္ၚိဂှ် ဂဂဵုတးပန်ဒးလဝ်ရ။
ဒၟါနူဂဂဵုတးပန်ဒးအာလဝ်ဂှ်ရ ကိုဝ်နာၚ်လေန် ညးမဒှ်တၠသ္ၚိဂှ်ဝွံ ပ္ဍဲကဵုဒၞါဲဒှ်ပရူဂှ်ဟေၚ် ချိုတ်အာလဝ်တုဲ ညးမဒှ်သမ္ဘာဂှ် တူပၟတ်ကလိဂွံလဝ်ဝပ်ရ။
နကဵုအရီုဗၚ်ဂကောံဟံၚ်ပြာ်မှာဇန်တံဂှ် ပလံၚ်ဗစိုပ်လဝ် ညးမဒှ်သမ္ဘာ မဒးအာလဝ်ဗွိုၚ်ဂဂဵုတးပန်ဂှ် ပ္ဍဲရုၚ်ဂဥုဲညးဍုၚ်ကွာန် ပွိုၚ်ဍုၚ်ကျာ်ထဝ်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုမေ သတ္တာဟပထမဂှ်လေဝ် ပ္ဍဲတွဵုရးဍုၚ်မန်၊ ဍုၚ်သဓီု၊ အရာပ်နာန်ခေဝ်တၟိ သ္ကုတ်သၟဝ် ဗ္ဒါဲဂၠံၚ်ကွဳပၟတ်ဂှ် မၞိဟ်တြုံမွဲတၠ အခိၚ်နွံဒၟံၚ်အပ္ဍဲဝါဂှ် ဂဂဵုတးပန်ဒးအာလဝ်တုဲ ချိုတ်အာလဝ်ရ။
ဌာနစမ်ၜတ်အကာဲအရာဗြဲကျာဂှ် အပ္ဍဲဂိတုဨပရဴ ကေုာံ ဂိတုမေ အခိၚ်တမ်သၞာံဂှ် အပ္ဍဲအခိၚ်တ္ၚဲစေၚ်ကဵု ဇိုၚ်သဝ်တ္ၚဲတံဂှ် ဗြဲကျာ လေပ်က္တဵုဒှ်တုဲ ယဝ်ရဂၠိုၚ်တိုန်ကၠုၚ်မ္ဂး ဂဂဵုဂတးပန် ဒှ်လေပ်တုဲ သွက်ဂွံမံၚ်စံၚ် သ္ပသတိကဵုအန္တရာယ် နူကဵုပွမဒးဒုၚ်ဂဂဵုဂတးပန်အိုတ်ဂှ် ဆဝ်မ္ၚုဟ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai