ပလဝ်၊ မေ(၂၆)
ရးဒေသဇၞော်တၞၚ်သြဳ၊ ပွိုၚ်ဍုၚ်ပလဝ်၊ ပ္ဍဲပေါဲဗတိုက်ၜါလ္ပာ် က္တဵုဒှ်လဝ် ဗ္ဒာဲကွာန်မဂျဳကုမ်ဂှ် ကောန်အရာပ်ညးဍုၚ်ကွာန်(၂)တၠ ဒးလွဟ်မကမ်တုဲ ဒးချိုတ်လဝ်ရဂှ် ဂွံတီကေတ် နူညးဒေသကီု သီုဂကောံရီုဗၚ်ဟံၚ်ပြာ်တအ်ရ။
ပ္ဍဲဂိတုမေ စၟတ်တ္ၚဲ (၂၄) ဂှ် နူကဵုဒပ်စဵုဒၞာညးဍုၚ်ကွာန် အာစိုပ်ဗတိုက်လဝ် သၞေဟ်ကၚ်စၟဳစၟတ်ကံၚ်ဇြဳပၞာန် ဖျေံလဝ်ဗဒိုပ် ဗ္ဒာဲကွာန်မဂျဳကုမ် ပေါဲဗတိုက်ၜါလ္ပာ်က္တဵုဒှ်လဝ် ဗ္ဒာဲပွိုၚ်မွဲနာဍဳရ။
ပ္ဍဲပေါဲဗတိုက်ဂှ် မမျေတ်မိုဝ်လေတ် အာယုက် (၂၆) သၞာံ ဒၟံၚ်ပွိုၚ်ဍုၚ်တၞၚ်သြဳ ဍိုက်ပါဗက်ကၠုၚ် ကွဳစက်ပ္ဍိုက်ညးအာတရဴကီု သီုညးတြုံကောန်ဒေသပလဝ် ဍိုက်ကၠုၚ်ကွဳလိုန်ဓာတ်တအ် ဒးလွဟ်မကမ်တုဲ ဒးချိုတ်လဝ်ရ။
ကောန်အရာပ်ညးဍုၚ်ကွာန် ဒးလွဟ်မကမ်တုဲ ဒးချိုတ်လဝ်ဂှ် ဂကောံရီုဗၚ်ဟံၚ်ပြာ်ပရေၚ်မၞိဟ်တအ် ကလေၚ်ပလံၚ်ဗစိုပ်ကဵုလဝ် ကွာန်ဌာန်ဒၟံၚ်ညးတအ်ရဂှ် ဂွံတီကေတ်ရ။
ပ္ဍဲပေါဲဗတိုက်ၜါလ္ပာ်ဂှ် နူတံဒပ်ကံၚ်ဇြဳပၞာန် ဖျေံသ္ဇိုၚ်ဍုၚ်ပလ ပန်ရီုလဝ်နကဵုလွဟ်ဇၞော် အဆက်ဟွံပိုတ် သ္ကုတ်တုဲ ဟိုတ်နူလွဟ်ဇၞော်ကံၚ်ဇြဳပၞာန်ပန်ဖျေံလဝ်ဂှ် ဘာလကျာ်ကွာန်မေန်ထုၚ် မွဲဘာကဵု ကွဳလိုန်ဓာတ်ညးဒေသမွဲဖ္ဍိုက် ဇီုကပိုက် ဒးလီုလာ်အာလဝ်ရ။
ညးတာလျိုၚ်ဒပ်စဵုဒၞာဒေသ မွဲတၠဂှ်မ္ဂး ပ္ဍဲပေါဲဗတိုက်ၜါလ္ပာ်ဂှ် လ္ပာ်ကံၚ်ဇြဳပၞာန်အောန်အိုတ် ဟွံယအ်နူ (၃) တၠ ဇီုကပိုက် ဒးချိုတ်လဝ်နွံမာန်ရဂှ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
ကြဴနူပေါဲဗတိုက်က္တဵုဒှ်လဝ်တုဲ ပ္ဍဲဂၠံၚ်ဇၞော်ဗိက်-ပလဝ်ဂှ် အကာဲအရာပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ် သ္ကာတ်မြဟ်ဒၟံၚ်တုဲ ကွဳစက်အာတရဴတအ်လေဝ် အောန်ကြဳဒၟံၚ် စဵုကဵုအာကၠုၚ်ဟၟဲ ဒှ်ကၠုၚ်ဒၟံၚ်ဂှ် ဂွံတီကေတ်နူညးဒေသတအ်ရ။
ပ္ဍဲပွိုၚ်ဍုၚ်ပလဝ် လလောၚ်တြးလဝ်ပရေၚ်အုပ်ဓုပ်ပၞာန်ဂှ်မ္ဂး အကြာဒပ်ကံၚ်ဇြဳပၞာန်ကဵု ဂကောံဇြဟတ် ပရေၚ်ပၠန်ဂတးတအ် ပေါဲဗတိုက်က္တဵုဒှ်ကၠုၚ်ဒၟံၚ်သိၚ်ၚ်ကီု ပရေၚ်ဇီုကပိုက်ချိုတ်ဂျိုၚ်ၜါလ္ပာ်လေဝ် နွံကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ
sanlontai