ပ္ဍဲၜဳကလေၚ်ကဵုကျာ်ထဝ် ဒပ်ကံၚ်ဇြဳပၞာန် ထပ်ပလီုကၠုၚ် ဂၠံၚ်ဍာန်ညးဍုၚ်ကွာန်သုၚ်စောဲအာကၠုၚ်ဒၟံၚ်

ၜဳကလေၚ်၊ မေ(၂၆)

တွဵုရးဍုၚ်မန်၊ ပ္ဍဲပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်ကျာ်ထဝ်ဂှ် ဒပ်ကံၚ်ဇြဳပၞာန် ထပ်ကၠောန်သ္ပကၠုၚ် ပရေၚ်ပလီုပလာ်ဂၠံၚ်ဍာန် ဆက်စၠောံလဝ် မွဲကွာန်ကဵုမွဲကွာန်တအ်တုဲ ပွိုၚ်မွဲသတ္တာဟ ဂၠံၚ်ဒးဒုၚ်ပလီုလဝ် စဵုကဵု (၆)တၞုၚ် နွံကၠုၚ်ရဂှ် ညးဒေသကီု သီုကဵုဂကောံဇြဟတ်ပၠန်ဂတး တအ် ဟီုကဵု ဌာန်ပရိုၚ် သြၚ်လောန်တိုၚ်(မ်) ပ္ဍဲပွိုၚ်မွဲသတ္တာဟဏံ ဒပ်ကံၚ်ဇြဳပၞာန် ထ္ပက်ကဵုဗေတ်ဟိုဝ်တုဲ ကၠောန်သ္ပကၠုၚ် ပရေၚ်ပလီုဂၠံၚ်ဍာန် ဆက်စၠောံလဝ် ကွာန်မွဲကဵုမွဲ ညးဍုၚ်ကွာန်တအ်သုၚ်စောဲဒၟံၚ် ပ္ဍဲပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်ၜဳကလေၚ် အဆက်က်ရ။

ပ္ဍဲကဵုဂှ် ဂိတုမေ စၟတ်တ္ၚဲ (၁၉) တေံဂှ် ဂၠံၚ်ဆက်စၠောံ ခရိုၚ်မွဲကဵုမွဲ ပ္ဍဲကွာန်ဇြဳဝန် ပွိုၚ်ဍုၚ်ၜဳကလေၚ်ကီု ဂၠံၚ်အာ ကွာန်ကြုၚ်ကပေါဝ်-သောၚ်နိုၚ်ဂျဳကီု၊ ဂိတုမေ စၟတ်တ္ၚဲ (၂၀)ဂှ် ဂၠံၚ်ဆက်စၠောံလဝ် ကွာန်ဝေန်ကလအ်တအ်ဂှ် ပလီုပလာ်လဝ်ရ။

သ္အာၚ်နူဂှ်ပၠန် ပ္ဍဲဂိတုမေ စၟတ်တ္ၚဲ (၂၁)ဂှ်မ္ဂး ဂၠံၚ်ဆက်စၠောံလဝ် ကွာန်မေဝ်ယုမ် ပွိုၚ်ဍုၚ်ကျာ်ထဝ်၊ ပ္ဍဲဂိတုမေ စၟတ်တ္ၚဲ (၂၂)ဂှ် ဂၠံၚ်ပျေန်ကဒိုဝ်-မယျာန်ချောၚ်၊ ဂိတုမေ စၟတ်တ္ၚဲ (၂၄)ဂှ် ဂၠံၚ်ဆက်စၠောံလဝ် ကွာန်လှေဝ်လာန်ကူတအ်ဂှ် ထ္ပက်ကဵုဗေတ်ဟိုဝ်တုဲ ပလီုပလာ်လဝ်ရ။

ဒပ်ကံၚ်ဇြဳပၞာန်ပလီုပလာ်ဒၟံၚ် ဂၠံၚ်ဍာန်ဆက်စၠောံ ညးဍုၚ်ကွာန်တအ်သုၚ်စောဲအာကၠုၚ်ဒၟံၚ်ဂှ် ဒှ်ကၠောန်သ္ပဒၟံၚ် ဗပိုတ်ပန်ဂကူ ညးဍုၚ်ကွာန်တအ် ဂွံဒးဂိတုဲ ဟိုတ်နူဍေံတအ် ဂွိၚ်ဖေက်ကၠုၚ်ဗတိုက်ဂှ်ရ ပလေဝ်ပလေတ်ဒၟံၚ် သွက်ပၞာန်ဒုၚ်ရဂှ် ညးတာလျိုၚ် PDF ခရိုၚ်သဓီု ကိုဝ်ဨမေန်ထောန် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

ဟိုတ်နူဒပ်ကံၚ်ဇြဳပၞာန် ထ္ပက်ကဵုဗေတ်ဟိုဝ်တုဲ ပလီုပလာ်ဒၟံၚ်ဂၠံၚ်ဍာန် ညးဍုၚ်ကွာန်တအ် သုၚ်စောဲအာကၠုၚ်ဂှ်ရ သ္ပတမ်နူကွဳစက်၊ ကွဳလိုတ်ဓာတ်၊ ကွဳလိုန်တအ် အာကၠုၚ်ဟွံဂွံတုဲ သွက်ပရေၚ်ပိုန်ဒြပ်၊ ပရေၚ်ထတ်ယိုတ် ကေုာံ ပရေၚ်စသုၚ်မံၚ်စံၚ် ဂကောံကၟိန်အိန်ထံၚ်ဂမၠိုၚ် ဒးဆဵုဂဗကၠုၚ်ဒၟံၚ်ကဵု အခက်ခုဲနာနာသာ်ရဂှ် ညးဒေသတအ် ဟီုသ္ဂးလဝ်ရ။

ဟိုတ်နူဒပ်ကံၚ်ဇြဳပၞာန် ကၠောန်သ္ပကၠုၚ်ပရေၚ်ပလီုဂၠံၚ်ဍာန်ညးဍုၚ်ကွာန်တအ် သုၚ်စောဲအာကၠုၚ်ဒၟံၚ်ဂှ်တုဲ ပ္ဍဲပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်ကျာ်ထဝ် ညးဍုၚ်ကွာန် နူကွာန် (၃၀) ပြၚ် ဒးဆဵုဂဗဒၟံၚ်ကဵု အခက်ခုဲရ။

ဒပ်ကံၚ်ဇြဳပၞာန်ဂှ် ပ္ဍဲဂိတုမေ စၟတ်တ္ၚဲ (၁၄)တုဲကၠုၚ်တေံလေဝ် ပ္ဍဲတိဍာ် KNU ဒပ်မဟာ (၆) ခရိုၚ်ဒူပလာယာ ဂၠံၚ်ဆက်စၠောံအကြာကအ်ကြိက်ကဵု ဍုၚ်လှာဒကှ် ဂၠံၚ်လုပ်ကွာန်တောၚ်ကြာအေန်ကီု၊ ဂၠံၚ်ကအ်ကြိက်-ကြုၚ်ဒဵု၊ ဂၠံၚ်ကွာန်လမိုၚ်ကုမ် ပွိုၚ်ဍုၚ်ကအ်ကြိက်ဂှ် ထ္ပက်ဒိကဵုဗေတ်ဟိုဝ်တုဲ ပလီုပလာ်ကၠုၚ်လဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-CJ