အပ္ဍဲၜဳကြုက်သၠုၚ်ကျာဂှ် အလဵုအသဳကြုက် တြးလဝ်ဒပ် သၞောတ်ကဵုသမ္တီတရဴဍာ် (၃)

ဗေကျေန်၊ မေ (၂၆)

အလဵုအသဳကြုက်ဝွံ ပ္ဍဲကဵုမွဲဒမြိပ်တ္ကအ် Spratly မၞုံၜဳကြုက်သၠုၚ်ကျာတံဂှ် တြးလဝ်ဒပ် သၞောတ်ကဵု သမ္တီတရဴဍာ် (၃) ရောၚ် နူကဵုဗဟဵု ပရေၚ်ဂီုကၠီုတရဴဍာ်ကြုက်တေံ ဟီုဂးလဝ်ရ။

ညံၚ်ရဴဍုၚ်ကြုက်ကီု လ္ပာ်ဍုၚ်ဖဳလေတ်ဖေန်တေံလေဝ် ပ္ဍဲဂိတုမေ ပြဟ်ဟ်တေံ ဖျေံစွံလဝ်စၟတ်သမ္တီ မကဵုတြီလအာတုပ်သာ်ဂှ်ကီုဂှ်ရ သီုၜါလ္ပာ်ဂှ် ဒှ်ဒၟံၚ်အခိၚ်ဒးပ္တိတ်ဇြဟတ် သွက်ဂွံဂွံပရေၚ်ဗိုန် ဗတ်ခိုၚ်ကၠိုက် သွက်တွဵုဒၞက်ဍာ် မ္ဒးအာတ်မိက်ဒၟံၚ် ဗီုညးကုညးရောၚ်ဂှ် ထ္မံက်ထ္ၜးကၠုၚ် ပ္ဍဲပရိုၚ်မဳဒဳယျာတံရ။

ပ္ဍဲကဵုဂလာန် ဌာနဝန်ဇၞော်ပလံၚ်ဗစိုပ် ဍုၚ်ကြုက် ပ္ဍဲတ္ၚဲဗုဒ္ဓဝါတေံဂှ်မ္ဂး နူကဵုဗဟဵုပရေၚ်ဂီုကၠီုတရဴကျာ ၜဳကြုက်သၠုၚ်ကျာ ဖျေံလဝ် သၞောတ်ကဵုသမ္တီ (၃) ပ္ဍဲကဵုဗ္ဒါဲတၟံလး မွဲဒမြိပ်တ္ကအ် Spratly ဂှ် ဂွံတီကေတ်ရ။

သၞောတ်ကဵုသမ္တီတံဂှ်ဝွံ ဒှ်သွက်က္ၜၚ်အာကၠုၚ် ဂွံဂီုကၠီု ချိုတ်ပၠိုတ်ရောၚ်ဂှ်လေဝ် ဌာနဝန်ဇၞော်ပရေၚ် ပလံၚ်ဗစိုပ်တံ ဟီုဂးလဝ် ပ္ဍဲတၚ်လလောၚ်တြးဂှ်ရ။

ပ္ဍဲသၞာံ ၂၀၂၁ တေံ ဟိုတ်နူက္ၜၚ်ကြုက် ဂၠိုၚ်ကဵုကၠံ ဒေါအ်ဇူလဝ် ဗ္ဒါဲတၟံလး မစၟတ်လဝ် နဒဒှ်ဒေသ အပိုၚ်အခြာပရေၚ်ပိုန်ဒြပ် ဖဳလေတ်ဖေန်တံဂှ်ရ မ္ဒးစွံလဝ် စၟတ်သမ္တီ စပ်ကဵုပရေၚ်အာကၠုၚ်တရဴဍာ် သီုကဵုအလာံဍုၚ်ဖဳလေတ်ဖေန်တံရောၚ် မဒှ်ရ။

ပၞောဝ်ကဵုဂၠံၚ်တရဴသွံရာန်ဗၞိက် ပၟိက်ဇၞော်အိုတ် လ္တူဂၠးတိဏံဂမၠိုၚ် အပ္ဍဲကဵုတွဵုဒၞက်ဍာ် ပရေၚ်ပြိုၚ်ပ္ကာန် သ္ကာတ်မြဟ် ၜဳကြုက်သၠုၚ်ကျာ မပါလုပ်မွဲဂှ် တုဲကၠုၚ်ခြာဟွံလအ်ဏံ ပရေၚ်ကြံၚ်မ္ၚိုဟ် ကြုက် ကေုာံ ဖဳလေတ်ဖေန်ၜါဍုၚ်တံ သၠုၚ်တိုန်ကၠုၚ်လဝ်ရ။

အလဵုအသဳကြုက်ဝွံ ၜဳကြုက်သၠုၚ်ကျာအလုံမွဲဂှ် လလောၚ်တြးလဝ် နဒဒှ်တွဵုဒၞက်အပိုၚ်ညးတံတုဲ ဗရူနာၚ်၊ မလေဝ်ယှာ၊ ထိုၚ်ဝါန်၊ ဖဳလေတ်ဖေန် ကေုာံ ဝေဒ်နာမ်တံလေဝ် သွက်ဒေသအပိုၚ် အခြာပရေၚ်ပိုန်ဒြပ် မၞုံအပ္ဍဲတွဵုဒၞက်ညးတံ ဂွံခိုၚ်ကၠိုက်ဗိုန်ဗတ်ဂှ်လေဝ် ဒးအာတ်မိက်ဒၟံၚ်ကီုရ။

Ref: Reuters