“အဓိကဂှ် နွံမံၚ်ပၟိက် ပ္ဍဲဗလးမုက်တိဂှ်တှ်ေ ဍာ်ရ။ ဒၞာဲဗွဲမဂၠိုၚ် ဍာ်ဖ္ဍုၚ်လုပ်ဂွံလဝ်ဂှ်ရ ဍာ်ဖ္ဍုၚ်လုပ်အာ ပ္ဍဲကၟာတုဲ သုၚ်စောဲဟွံဂွံရ။ ပၟိက်ဇၞော်အိုတ်ဂှ် ဍာ်ရလေဝ်ဏး။ တုဲတှ်ေ ဇွောံမစၞစ၊ ဂဥုဲဇဗလေဝ် နွံဒၟံၚ်ပၟိက်ရ”

လဗိုတ်ကျာမိုဝ်ခါ လုပ်စိုပ်လဝ် ပ္ဍဲကၟိန်ဍုၚ်ဗၟာတုဲ စဵုဗ္ဒာဲၜါသတ္တာဟ သွက်ဂွံကဵုအရီုဗၚ်ဗ္စာရဏာပရေၚ်မၞိဟ် ပ္ဍဲဒေသ ညးဒးလဝ်ဘဲဒဏ်လဗိုတ်ကျာတအ်မာန်ဂှ် အေဂျေန်ဇြအကုသလသမဂ္ဂကီု သီုကဵုဂကောံကၟိန်ဍုၚ်နာနာတအ် ဃောမၚ်ဒၟံၚ် အခေါၚ် နူကံၚ်ဇြဳပၞာန်ဖိုဟ်ရ။ ရုၚ်ပ္ညဳပ္ညပ်ဆေၚ်စပ်ကဵုထံက်ရံၚ်ဗ္စာရဏာပရေၚ်မၞိဟ် ကုလသမဂ္ဂ (UNOCHA)ဂှ်မ္ဂး သွက်ညးဍုၚ်ကွာန် ဒးဒုၚ်လဝ်ဘဲဒဏ်လဗိုတ်ကျာ မၞုံတွဵုရးရခေၚ်ကဵု တွဵုရးချေၚ်သီုဖအိုတ်တအ်ဂှ် သွက်ဂွံထံက်ပၚ်ရီုဗၚ် အထံက်အရီုဗ္စာရဏာပရေၚ်မၞိဟ် သွက်ပွိုၚ်ၜါသတ္တာဟဂှ် ၜိုန်ရဒှ်ဒၟံၚ်ဒတုဲကီုလေဝ် ညံၚ်သ္ဂောံက္လိဂွံအခေါၚ်ဂှ် ဃောဒးသဳကၠဳဒၟံၚ်ဖိုဟ်ရဂှ် လ​လောၚ်တြးလဝ်ရ။

ဟိုတ်ဂှ်ရ ပ္ဍဲဒေသဒးဒုၚ်လဝ်ဘဲဒဏ်လဗိုတ်ကျာဂှ် နွံဒၟံၚ်ပၟိက်ကဵု အရီုဗၚ်ပၟိက်ဇၞော် ဗီုလဵုရော။ အခိၚ်လၟုဟ်ဏံ ဒးဒုၚ်ဆေၚ်ဒၟံၚ်မုက်ကဵု အခက်ခုဲဗီုပြၚ်လဵုရော၊ အကာဲအရာဂကောံကၟိန်ဍုၚ်နာနာ မၚ်ဒၟံၚ်အခေါၚ် သွက်ဂွံသ္ဂောံက္လိဂွံ အခေါၚ်ရီုဗၚ် ပ္ဍဲဗလးမုက်တိ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု ညးတာလျိုၚ်ဂကောံပရေၚ်မၞိဟ် မၞုံတွဵုရးရခေၚ်မွဲတၠရ။

-ကိုပ်ကၠာအိုတ်ဏံ ပ္ဍဲဒေသဒးဒုၚ်လဝ်ဘဲဒဏ်လဗိုတ်ကျာတအ်ဂှ် နွံဒၟံၚ်ပၟိကဵု အရီုဗၚ်ပၟိက်ကိစ္စဇၞော် ဗီုလဵုရော။

အဓိကဂှ် နွံမံၚ်ပၟိက် ပ္ဍဲဗလးမုက်တိဂှ်တှ်ေ ဍာ်ရ။ ဒၞာဲဗွဲမဂၠိုၚ် ဍာ်ဖ္ဍုၚ်လုပ်ဂွံလဝ်ဂှ်ရ ဍာ်ဖ္ဍုၚ်လုပ်အာ ပ္ဍဲကၟာတုဲ သုၚ်စောဲဟွံဂွံရ။ ပၟိက်ဇၞော်အိုတ်ဂှ် ဍာ်ရလေဝ်ဏး။ တုဲတှ်ေ ဇွောံမစၞစ၊ ဂဥုဲဇဗလေဝ် နွံဒၟံၚ်ပၟိက်ရ။ စပ်ကဵုဂွံဇြောတ်ပ္တိတ် ဍာ်နူကၟာတအ်ဂှ် အိုတ်မံၚ်အစောန်ယျ ဟီုစဂွံရ။ ကၟာဗွဲမဂၠိုၚ်ဂှ် လီုအာအိုတ်ရလေဝ်။ ဍာ်ဖ္ဍုၚ်လေဝ် ပါဒၟံၚ်ဂှ်ရ ဇြောတ်ပ္တိကဵု စက်ဇြောတ်ဍာ်ရ။ စက်ဇြောတ်ဍာ်လေဝ် တၟာကလှ်ေဒၟံၚ် ဒှ်ဒၟံၚ်ဗီုပြၚ်ဏံ အခက်ခုဲ နွံဗွဲမဂၠိုၚ်။ ပ္ဍဲဗလးမုက်တိဂှ် တၚ်နွံပၟိက် နွံဗွဲမဂၠိုၚ်ရ။ တၚ်ဟီုလဝ်တုဲကၠုၚ်ဏံ ၜိုတ်(၃)တၚ်ဂှ်တှ်ေ နွံဒၟံၚ်ပၟိက် ကိစ္စဇၞော်လွာဲလၟုဟ်ဏံရ။ ဒှ်ဒၟံၚ်သွာၚ်နွံဒၟံၚ်ပၟိက် လွာဲလၟုဟ်ရ။

-အခိၚ်လၟုဟ်ဏံရော ပ္ဍဲဒေသဒးဒုၚ်လဝ်ဘဲဒဏ်လဗိုတ်ကျာဂှ် ဒးဆေၚ်ဒၟံၚ်မုက်ကဵု အခက်ခုဲဇၞော်ကဵုဇြဟတ် ဗီုပြၚ်လဵုရော။

ဇေတ်တ်တေံတှ်ေ အကာဲအရာဒှ်ဒၟံၚ်လၟုဟ်ဂှ် ယဝ်ရဇြောတ်ပ္တိတ်ဍာ် နူကၟာဟွံမာန်ပုဟ်တှ်ေ ယဲဂၞဴဂှ် စဒှ်ကၠာအိုတ်ရ။ သွက်ဂွံဂၠာဲသွဟ် ညံၚ်ဟွံဂွံဒှ်ယဲဂၞဴဂှ် အခက်ခုဲနွံဒၟံၚ် ဇၞော်ဇၞော်ရ။ တၚ်ပထမဂှ် အခေါၚ်ဖ္ဍိုက်ဏာနၚ်ဂဥုဲဟၟဲပုဟ်။ အပိုၚ်ခြာပ္ဍိုက်ဏာနၚ်ဂဥုဲ နွံဒၟံၚ်ဗွဲမဂၠိုၚ်ရ။ ဂကောံ UN ဟီုဂှ်လေဝ် ပ္ဍဲကဵုအကြာညးတအ်ဂှ် နွံဒၟံၚ်ဗီုလဵု ဟွံတီပုဟ်။ ၜိုတ်ပိုဲထေၚ်ကေတ်တှ်ေ ညးတအ်လေဝ် ပရေၚ်ဒစးဒုၚ်ပလေဝ်ပလေတ် နွံဏောၚ်ထေၚ်ကေတ်ရ။ ဗီုဍေံတှ်ေ ဒစးဒုၚ်တုဲ ပလေဝ်ပလေတ်လဝ်လေဝ် လဒှ်တှ်ေ ဒှ်မာန်ဏောၚ်။ လဗိုတ်ကျာလောန်တုဲ ဒဵုမွဲသတ္တာဟပြၚ်ကၠုၚ်ဂှ် ဟွံကဵုအခေါၚ်လေဝ် ဒှ်တှ်ေဒှ်မာန်ဏောၚ်။

-ကံၚ်ဇြဳပၞာန်လေဝ် ဒဵုကဵုအခိၚ်လၟုဟ် ဟွံကဵုအခေါၚ်ဂကောံကုလ ရီုဗၚ်ပ္ဍဲဗလးမုက်တိဏီပုဟ်ဟီုတှ်ေ ပရေၚ်ကလေၚ်ပတန်ပတဴ ဂွံစိုပ်တရဴမာန်ဂှ် မုဒးကၠောန်ထေက် ညာတ်ကေတ်ရော။

အဓိကဂှ်တှ်ေ ညံၚ်ဂွံစိုပ်အာ ဒၞာဲဒှ်ဒၟံၚ်ပြဟ်ဟ်ဂှ် ပၟိက်ဇၞော်ဒၟံၚ်ရ။ ဍာံဍာံတေံ သွာၚ်ဍေံတအ်ဂှ် နွံဒၟံၚ်ဗီုလဵုရောဟီုဂှ် ပိုဲဟွံတီလဝ် ချိုတ်တ်ပၠိုတ်တ်ပုဟ်။ တီလေဝ် ဒှ်ဒၟံၚ်အကာဲအရာတီကေတ်ဟွံပုဟ်ဟီုတှ်ေ နကဵုပိုဲမိက်ဂွံဟီုဂှ် ဗီုပြၚ်လဵု ဂွံစိုပ်ကၠုၚ်ပြဟ်ဟ်မာန်။ ညံၚ်ဂွံစိုပ်ကၠုၚ်ပြဟ်ဟ်မာန် ဆုဲကြပ်လုပ် ဗီုပြၚ်လဵု ပြေပြံၚ်မာန်ဟီုဂှ် UN ကဵုအလဵုနွံဒၟံၚ်လၟုဟ် သဳကၠဳလဝ် ဗီုပြၚ်လဵုရောဟီုဂှ် တုဲတဴကဵုဗီုပြၚ်ဂှ်ရ။ အကြာညးတအ်ဂှ် ဗီုပြၚ်မမိက်ကဵု မွဲမွဲဒးနွံဏောၚ်။ သွာၚ်ဏံဂှ် ပိုဲဂွံဟီု ဝါတ်ဂါတ်ဒၟံၚ်ရ။ အဓိကဂှ် ဂကောံလဵုဟွံဟီု ဒးနွံကဵုအခေါၚ်အာကၠုၚ် ဗၠးဗၠးၜးၜးတုဲတှ်ေ ဂွံကၠောန်ရေၚ်တၠုၚ်ကဵု ညံၚ်ဂွံပြေၚ်ပြံၚ်ဂှ် ပၟိက်ဇၞော်အိုတ်ရ။ နွံဒၟံၚ်ပၟိက်ဂှ်တှ်ေ နွံဒၟံၚ်ပၟိက် တ္ၚဲဏံသၟး ဟွံသေၚ်ပုဟ်။ နူကဵုဒှ်အာတုဲတေံ နွံဒၟံၚ်ပၟိက်ရ။ ဂကောံတအ်ဂှ် စိုပ်အာလဝ် ၜိုန်ရဟီုကီုလေဝ် ဂလိုၚ်ထေက်ကဵုစိုပ်ဂှ် ဟွံစိုပ်လဝ်ပုဟ်ဟီုဂှ် ဒှ်ဒၟံၚ်အကာဲအရာဏံ ဟီုစမာန်ရ။ မိက်ဂွံဟီုဂှ်တှ်ေ ညံၚ်ဂွံကိတ်ညဳကဵုတၚ်နွံပၟိက်ဂှ် ဟွံလောဲပုဟ်ဟီုကီုလေဝ် ဗ္ၜတ်ဒစဵုဒစး မွဲမွဲဟွံစိုပ်ကၠုၚ်ပုဟ်ဟီုဂှ်၊ ဂကောံပရေၚ်မၞိဟ်တအ် ဂကောံဒုၚ်သ္ဇိုၚ်ကဵုဒေသတအ် အာကၠုၚ်ပြေပြံၚ်ဒၟံၚ်ရ။

-အလန်လကြဴအိုတ်ဏံ လ္တူဒေသဒးလဝ်ဘဲဒဏ်လဗိုတ်ကျာဂှ် ပရေၚ်ကံၚ်ဇြဳပၞာန် ရီုဗၚ်ကဵုဒၟံၚ်ဂှ် စိုပ်ဒၟံၚ်တရဴနွံဟာ။ ပ္ဍဲလ္တူဏံ မုမိက်ဂွံဟီုရော။

ပ္ဍဲလ္တူဍုၚ်ဟီုတှ်ေ ဍေံတအ်ကၠောန်ဒၟံၚ်ဂှ် ၜိုတ်ထေက်ကြိုက်နွံဏောၚ်ထေၚ်ကေတ်ရ။ ဆ္ဂးစိုပ်ကၠုၚ်လဝ် လဇုဲဒၟံၚ်။ ဟွံစိုပ်ကၠုၚ်ဂှ်လေဝ် နွံရ။ တၚ်နွံပၟိက် ပ္ဍဲပွိုၚ်ဍုၚ်တအ်ဂှ်တှ်ေ ပၟိက်ဇၞော်ဒၟံၚ်ဗွဲမဂၠိုၚ်ဟီုဂှ် ၜိုတ်ထေက်ကဵုစိုပ်တရဴ ဟွံစိုပ်ပုဟ်ဟီုဂှ် ဒှ်ဒၟံၚ်အကာဲအရာဗီုဏံရ။ ပ္ဍဲသေတ်တွေတှ်ေ ဍေံတအ်သွံကဵုဒၟံၚ် ၚုဟ်မးဒးဒးဂှ် ပိုဲဂွံဆဵုညာတ်ကေတ်ဒၟံၚ်နွံရ လ္တူဍုၚ်ဂှ်။ ပ္ဍဲပွိုၚ်ဍုၚ်တအ်ဂှ်တှ်ေ ပရေၚ်စိုပ်တရဴ အောန်ဒၟံၚ်ဏီ ဟီုစမာန်ရ။ မၞိဟ်(၁၀၀)တှ်ေ ၅ တၠ၊ ၁၀ တၠ ဒှ်ဒၟံၚ်ဗီုပြၚ်ဏံရ။ ဒှ်ကၠုၚ်ဒၟံၚ်အကာဲအရာဏံဟီုတှ်ေ နွံဒၟံၚ်ပၟိက်ဂှ်မၞိဟ် (၉၀)တၠ ထပ်တုဲဒှ်ဒၟံၚ်ဗီုပြၚ် နွံဒၟံၚ်ပၟိက်ရ။ ဒှ်ဒၟံၚ်ဗီုဂှ်တှ်ေ တၚ်နွံပၟိက်ဂှ် အရာကၠောန်ကဵုဒၟံၚ်ဂှ် တၞဟ်ခြာဒၟံၚ် ဗွဲမလောန်ဏောၚ်ဂှ် ထပ်တုဲဂွံမိၚ်လဝ်ရ။