ပဠဝ်၊ မေ (၂၇)
အ္စာၝောံဂအုပ်ဘာတန်လဒေါဝ် ကွာန်ကဒါ၊ ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳ ဒဝ်သုလာတ်ဖျူဝွံ ဒးဒုၚ်ပန်ကဵုသေနာတ် ပ္ဍဲသ္ၚိညးဂှ်ရ ဒးချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုမေ (၂၅) အခိၚ်လဒေါဝ်တ္ၚဲ (၁) နာဍဳဂှ် အ္စာၝောံဂအုပ်ဘာ ဒဝ်သုလာတ်ဖျူ မသ္ပဒတဴဒၟံၚ် ပ္ဍဲကွာန်မကျဳကုန် ပွိုၚ်ဍုၚ်ပဠဝ်ဂှ် သၟာသေနာတ်ဟွံတီယၟုမွဲတၠ တိုန်သ္ၚိတုဲ ပန်ဂစိုတ်ဏာလဝ် ကဵုသေနာတ်ရ။
ဟိုတ်နူဒးဒုၚ်ပန်ကဵုသေနာတ်ဂှ်ရ အ္စာၝောံဂအုပ်ဘာ ဒဝ်သုလာဖျူဝွံ ကလိဂွံလဝ်ဝပ် မကမ်ကၠိုဟ် လုပ်အာ ပ္ဍဲကဵုက္ဍိုပ် ကေုာံ မုက်တံဂှ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
အ္စာၝောံဂအုပ်ဘာ မချိုတ်အာဂှ်ဝွံ ပ္ဍဲကဵုကွာန်ကဒါ ဒၞါဲဒးတာလျိုၚ်ဂှ် ဟိုတ်နူပံက်ဘာဟွံဂွံဏီဂှ်ရ ကြဴနူစှ်ေတန်ဗ္တောန်တုဲဂှ် တိုန်ဒၟံၚ်ရုၚ် ပ္ဍဲရုၚ်သ္ကိုပ်ပရေၚ်ပညာပွိုၚ်ဍုၚ်ဂှ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး အ္စာၝောံဂအုပ်ဘာ ဒဝ်သုလာတ်ဖျူဝွံ ကြဴနူဒပ်ပၞာန်သီအဝဵုတုဲ ဂွံဒုၚ်ပ္တိုန်လဝ်ကဆံၚ် နဒဒှ်ဂအုပ်ဘာတန်လဒေါဝ်တုဲ ကေတ်ဒၟံၚ်တာလျိုၚ်ရောၚ် သ္ဂးရ။
ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် ဂကောံဒပ်စဵုဒၞါညးဍုၚ်ကွာန် ဇြဟတ်မၞုံ ဗ္ဒါဲ (၁၅) တၠတံ ကၠုၚ်စိုပ်ပန်ပှော်လဝ် အ္စာၝောံဂအုပ်ဘာဂှ် နကဵုသေနာတ် ပ္ဍဲကဵုလ္တူသ္ၚိညးရောၚ် တြးဒၟံၚ်ဝါဒတံ နွံဒၟံၚ်ရ။
လၟေၚ်ဒဒှ်အ္စာၝောံဂအုပ်ဘာ မူဟိုတ်ဂွံဒုၚ်ပန်ကဵုသေနာတ်၊ ညးလဵုပန်လဝ်ရောဟီုဂှ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
ပ္ဍဲကဵုတွဵုရးတၞၚ်သဳဂှ် အပ္ဍဲကာလဒပ်ပၞာန်သီအဝဵုတုဲ ပွိုၚ်ၜါသၞာံဂှ် ညးဍုၚ်ကွာန်ကောန်အရာပ် ဗ္ဒါဲ (၄၀၀) ဒးဒုၚ်ဂစိုတ်ဂယိုၚ်လဝ်ရောၚ် ဂွံတီကေတ် နူကဵုတၚ်နၚ် ဂကောံသုတေသနအပ္ဍဲဒေသတံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai