ပ္ဍဲကဵုဍုၚ်(သံတောင်) ၁၃ မိုၚ်ဂှ် ပေါဲဗ္တိုဟ်ဟွံမွဲမွဲသာ် ဒပ်ပၞာန် ပန်ပှော်ဒၟံၚ် လွဟ်ဇၞော် အရိုဟ်ဒဒှ်တ္ၚဲ

(သံတောင်) ၊ မေ (၂၆)

ပ္ဍဲကဵုခရိုၚ်တံၚ်ဥူ ပ္ဍဲဍုၚ်(သံတောၚ်) ၁၃ မိုၚ် တိဍာ်ဗော်သွးကောန်ဂကူကရေၚ် KNU ဂှ် ပေါဲဗ္တိုက်က္တဵုဒှ် ဟွံမွဲမွဲသာ် ဒပ်ကံၚ်ဇြဳပၞာန် ဟိုတ်နူပန်ပှော်ဒၟံၚ် လွဟ်ဇၞော် အရိုဟ်ဒဒှ်တ္ၚဲဂှ်ရ သီုကဵုစမြိုၚ်ဘာသာ၊ စမြိုၚ်သ္ၚိဒၟံၚ်လ္ၚဵုတံ ဇီုကပိုက်လီုလာ်အာလဝ် နွံဂှ် ဂွံတီကေတ် ဇရေၚ်ပရိုၚ်တမ်ရိုဟ် အပ္ဍဲဒေသတံရ။

တုဲကၠုၚ် ပ္ဍဲဂိတုမေ (၂၁) အခိၚ်နူဂယး ၜိုတ် (၉) နာဍဳ ဒပ်ကံၚ်ဇြဳပၞာန် ဟိုတ်ဟွံမွဲမွဲသာ် ပန်ပှော်စုတ် လွဟ်ဇၞော် အပ္ဍဲဍုၚ်(သံတောၚ်) ၁၃ မိုၚ်ဂှ်ရ ဘာကျာ်ခရေတ်ယာန် မၞုံအရာပ်(၃) မွဲမ ဇီုကပိုက်လီုလာ်အာလဝ်နွံရ။

သ္အာၚ်နူဂှ်ပၠန် ပ္ဍဲဂိတုမေ (၂၂) ကဵု (၂၃) တေံဂှ်လေဝ် ဒပ်ကံၚ်ဇြဳပၞာန် ဟိုတ်နူထပ်ပန်ပှော်စုတ်လဝ် လွဟ်ဇၞော်ကြာန်န်ဂှ်ရ ဒတုံဗ္တိုဟ်ထ္ကးအာလဝ် ပ္ဍဲကဵုကၠအ်ထၜိုတ် ကွာန်တဝ်ပျာကလေဝ်ဂှ်ကဵု ဗ္ဒါဲသ္ၚိဒၟံၚ် မၞုံအရာပ်(၃) ၊ အရာပ်ဥူသာၚ်ကုန်တံဂှ်တုဲ ညးဒေသတံ ဒၟါနူဒစးဒုၚ်ပါဲဒလေတ်လဝ်ဂှ်ရ ဇီုကပိုက်ဒးလဝ်ဟွံမွဲပုဟ်ဂှ် ညးဒေသတံ သ္ဂးရ။

ပ္ဍဲဂိတုမေ (၂၄) အခိၚ်ဗ္တံဂှ်လေဝ် ဒပ်ကံၚ်ဇြဳပၞာန် ထပ်ပန်ပှော်လဝ် လွဟ်ဇၞော် လ္တူဍုၚ်(သံတောၚ်) ဂှ်တုဲ စမြိုၚ်သ္ၚိဒၟံၚ် (၁) မ ဇီုကပိုက်လီုလာ်အာလဝ်တုဲ လ္တူဗလးတိတံဂှ် မဗုမ် ဟွံဂွံဗ္တိုဟ်ဏီတံ နွံဒၟံၚ်ဏီရောၚ် ဂွံတီကေတ် နူကဵုဂလာန်ညးဒေသ(သံတောၚ်) တံရ။

ပ္ဍဲဍုၚ်(သံတောၚ်) ၁၃ မိုၚ် တိဍာ်ဒပ်မဟာ (၂) KNU ဂှ် သ္ပပ္တံနူဂိတုဖေဖဝ်ဝါရဳ တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ ပရေၚ်ပၞာန်ကြံၚ်မ္ၚိုဟ် က္တဵုဒှ်လဝ်တုဲ ဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲဍုၚ်(သံတောၚ်) ဂှ်ကီု၊ စံၚ်ပလီုပလာ် စမြိုၚ်သ္ၚိဒၟံၚ်တံ ကေုာံ ကပေါတ်ကွဳစက်ကွဳလိုန်ဓာတ်တံဂှ်ကီု၊ ရပ်ဒက်ကော်ဏာ ညးဒေသတံ ဒှ်တမ် ဟိုတ်နူကလိလောန် ဝးပ္ကဝ်လဝ်အခေါၚ်အရာမၞိဟ် ကေုာံ ပရေၚ်ချဳဒရာၚ်ပရေၚ်ပၞာန်တံဂှ်ရ ညးဒေသလ္တူဍုၚ် ဗ္ဒါဲသီုဖအိုတ် ဒးဂြိပ်ဒဴပါဲဒလေတ်လဝ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ