လံၚ်လုၚ်၊ မေ (၂၇)
ကြဴနူဗ္ဒိုပ်ဗၠာဲသၟိၚ်၊ ရုၚ်(စရဖ) ကေုာံ ရုၚ်လဝက လ္တူဍုၚ်လံၚ်လုၚ်၊ ရးဒေသဇၞော်တၞၚ်သဳတံ ဒးဒုၚ်ဗ္တိုက် အပ္ဍဲမွဲတ္ၚဲဓဝ်တုဲဂှ် ကံၚ်ဇြဳပၞာန် ရပ်ဒက်ဏာ ညးဒေသ ဟွံအောန်နူကဵု (၅၀) တၠတုဲ ကၠောန်သ္ပစၟဳစၟတ် သၟာန်သၟုက်ဒၟံၚ်ရောၚ် ညးလ္တူဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုမေ (၂၃) အခိၚ်လဒေါဝ်တ္ၚဲဂှ် ဂကောံဒပ်ဒမၠုက်ထဝါဲ ကေုာံ ဂကောံဒပ်ပံၚ်ကောံတံ လုပ်စိုပ်ဗ္တိုက်လဝ် ရုၚ်အလဵုအသဳ (၃) ရုၚ် ပါလုပ်သီုကဵုဗ္ဒိုပ်ဗၠာဲသၟိၚ်ၝောံဍုၚ်လံၚ်လုၚ် နူကဵုလ္တူဍုၚ် လံၚ်လုၚ် မွဲအခိၚ်ဓဝ်ရ။
ကြဴနူဒးဒုၚ်ဗ္တိုက်တုဲ ပ္ဍဲကဵုတ္ၚဲဂှ်ဟေၚ် နူကဵုဒပ်ကံၚ်ဇြဳပၞာန် ရပ်ဒက်ဏာလဝ် ကိုဝ်လှာၚ်နေဥူ၊ မတိတ်တ်ဨ ကေုာံ တၠသ္ၚိညး နူကဵုအရာပ်(က) ဂှ်ကီု၊ မဇြိုဲဇြေန်ထိတ် နူကဵုအရာပ် (ခ) တံရ။
ဗွဲကြဴဂှ် ပ္ဍဲကဵုဂိတုမေ (၂၄) ကဵု ဂိတုမေ (၂၅) တံဂှ် နူကဵုဆေၚ်အရက်၊ ဆေၚ်ပလေဝ်ကွဳလိုန်ဓာတ် ကေုာံ ဆေၚ်ဇဗၠုသတ်၊ ဆေၚ်ဂဇာသတဳ နူကဵုအရာပ်(ခ) ကေုာံ အရာပ် (က) လ္တူဍုၚ်လံၚ်လုၚ်တံဂှ် ဒပ်ကံၚ်ဇြဳပၞာန် ရပ်ဒက်ဏာလဝ် သီုမၞိဟ်ဗြဴ၊ သီုမၞိဟ်တြုံ ပါလုပ်သီုကဵု LGBT တံရောၚ် ညးဒေသတံ သ္ဂးရ။
ညးမရပ်ဒက်ဏာတံဂှ် ကၠောန်သ္ပစၟဳစၟတ်သၟာန်သၟုက်ဒၟံၚ် ပ္ဍဲဗ္ဒိုပ်ဗၠာဲသၟိၚ်ဍုၚ်လံၚ်လုၚ်ကဵု ဒၞါဲစၟဳစၟတ် ကံၚ်ဇြဳပၞာန်တံဂှ်တုဲ လ္ၚဵုတံဂှ် ကလေၚ်ဗလးကဵုလဝ် နွံဒၟံၚ်ရောၚ် ဂွံတီကေတ်ရ။
ပ္ဍဲကဵုလၟေၚ်ဒဒှ် ရုၚ်အလဵုအသဳ (၃) ရုၚ် ပါလုပ်သီုကဵုဗ္ဒိုပ်ဗၠာဲသၟိၚ်ဍုၚ်လံၚ်လုၚ် ဒးဒုၚ်ဗ္တိုက်ဂှ် ဒုသ္ကိုပ် က္ဍိုက်ပ် နူကဵုရုၚ်လဝက မွဲတၠ ဒးချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−BNI
sanlontai