ဇြေတုတ္တရာ – မေ (၂၇)
ရးဒေသမဂွေ၊ ထ္ပက်လုပ်ကရောၚ်ပၞာန် ပ္ဍဲကွာန် မၞုံပွိုၚ်ဍုၚ်ဇြေတုတ္တရာတုဲ ကေတ်ဏာဒၟံၚ် ကပေါတ်ကပေါတ်ညးဍုၚ်ကွာန်တအ်ကီု၊ ၜုက်တၚ်ပျဲပျာံဒၟံၚ် ညးဍုၚ်ကွာန်တအ်ကီုရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္ပတမ်နူ ဂိတုမေ စၟတ်တ္ၚဲ (၂၃)တုဲ ကောန်ဒပ်ကံၚ်ဇြဳပၞာန် လုပ်စိုပ်ကၠုၚ် ပ္ဍဲကွာန်မၞုံသ္ကုတ်ဂၠံၚ် သလေန်-ဇြေတုတ္တရာကဵု မွဲဒမြိပ်မုမ်ချောၚ်ဂှ်တုဲ ကၠောန်သ္ပကၠုၚ်ဒၟံၚ်သာ်ဏံရ။
“ရပ်ကေတ်ဒၟံၚ်သီု မွဲကွာန်။ စဲပ္ဍဲတ္ၚဲ ထ္ပက်ကဵုလ္ၚပၟတ်ရ။ စတမ်နူကောန်ၚာ်ၜါသၞာံ ပိသၞာံဒှ်တမ် ၜုၚ်တက်ဒၟံၚ်အလုံကွာန်မွဲရ။ သၟတ်ၜါတၠဂှ်လေဝ် ရပ်ကော်ဏာလဝ်ရ။ သ္ၚိတအ်လေဝ် ဖံက်လုပ်လဝ်တုဲ ထဝ်သြန်ကဵု သ္ၚု၊ ကၠေၚ်တအ် ကပေါတ်နွံကဵုၚုဟ်မးတအ် ဖုၚ်တအ် သီကေတ်ဏာလဝ်ရ” ဂှ် ညးဒေသမွဲတၠ ဟီုသ္ဂးလဝ်ရ။
နကဵုတၚ်ထ္ၜးဟိုတ်ကောန်ဒပ် PDF နွံဒၟံၚ် ပ္ဍဲကွာန်ဂှ်ဂးတုဲ ဒပ်သၟဝ်တဲ ၝောံဒပ်-၈၈ ကံၚ်ဇြဳပၞာန်ကဵု ဒပ်တဵုလွဳဒုန်ပွိဖျူ ဗိုလ်ဇၞော်မေန်ပိုၚ်သိုဝ် က္ဍိုက်လဝ်က္ဍိုပ် ဇြဟတ်မၞုံ (၁၀၀)ပြၚ်ဂှ် လုပ်စိုပ်ဂၠိုက် ဂၠာဲလဝ်ရဂှ် ဂွံတီကေတ်ရ။
ဒပ်ကံၚ်ဇြဳပၞာန်တအ်ဂှ် ဟိုတ်နူထ္ပက်ဒၟံၚ်ကရောၚ်ပၞာန် ပ္ဍဲပွိုၚ်ဍုၚ်သလေန်ကဵု သ္ကုတ်ဂၠံၚ်ဆက်စၠောံလဝ်ကဵု ဇြေတုတ္တရာတအ်ဂှ်ရ ဂိတုမေ စၟတ်တ္ၚဲ (၂၃) ဂှ် တံဒပ်ခရိုၚ်မေန်ဗူ လၟိဟ်(၁)ကဵု ဒပ်ပံၚ်ကောံ ပ.က.ဖ သလေန်တအ် ဗတိုက်လဝ်တုဲ လ္ပာ်ကံၚ်ဇြဳပၞာန် ဒးချိုတ်လဝ်ၜါတၠရဂှ် ပရိုၚ်မံက်တိတ်ဒၟံၚ်ရ။
သ္အာၚ်နူဂှ်ပၠန် ပ္ဍဲဂိတုမေ စၟတ်တ္ၚဲ(၂၃)မွဲတ္ၚဲဓဝ်ဂှ် ပ္ဍဲပွိုၚ်ဍုၚ်ဇြေတုတ္တရာ ၜိုတ်ပိဒၞာဲ ပေါဲဗတိုက်က္တဵုဒှ်လဝ်တုဲ လ္ပာ်ကံၚ်ဇြဳပၞာန် ဇီုကပိုက်ဒးလဝ်ဘဲဝပ် နွံဂၠိုၚ်ဒၟံၚ်ရဂှ် ၜိုန်ရညးစုက်လုက်တအ် ဟီုလဝ်ကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာ ဟွံမာန်ဏီရ။
ပရိုၚ်-သြၚ်လောန်တိုၚ်(မ်)
ဗီုရုပ် – Google
sanlontai