ထၜိုတ်တိတ်နူတွဵုရးဍုၚ်မန် ဍာ်ဒကေဝ်စှ်ေကၠုၚ်တုဲ ဍုၚ်သ္အာၚ်လ္ၚဵုတံ ဒေါအ်ဇူပရေၚ်ရာန်

မတ်မလီု၊ မေ (၂၇)

ထၜိုတ်တိတ်နူတွဵုရးဍုၚ်မန်တံဝွံ ကြဴနူဒပ်ပၞာန်သီအဝဵုတုဲ မ္ၚးနူသၞောဝ်အစာံမစၟတ်လဝ်တံ ဟွံပေၚ်ဂှ် သီုကဵုဍာ်ဒကေဝ် စှ်ေကၠုၚ်ဂှ်ရ ဍုၚ်သ္အာၚ်လ္ၚဵုတံ ဒေါအ်ရာန်ကၠုၚ် နွံဂှ် တၠကမၠောန်ပရေၚ်သွံရာန်ရဝ်ဗာတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ညးတဵုလွဳထၜိုတ်ရဝ်ဗာတံဝွံ အပ္ဍဲကာလဒပ်ပၞာန်သီအဝဵုဂှ် ဟိုတ်နူၚုဟ်ကပေါတ်တမ်ဂမၠိုၚ် မပ္တံကဵုဝါဲဓာတ်၊ အက်သေတ် ကေုာံ သီုကဵုခရိတ်အိုတ်နာနာ သၠုၚ်ဒၟံၚ် ဂၠိုၚ်ကဵုဆဂှ်ရ ပရေၚ်ထိၚ်ဒဝ် လ္တူဍာ်ဒကေဝ်ရဝ်ဗာတံဂှ် ဇြဟတ်ဍိုန်လျကၠုၚ်လဝ်ရ။

မွဲလ္ပာ်ပၠန်ဂှ် ညးတဵုလွဳရဝ်ဗာဂမၠိုၚ်ဝွံ ၚုဟ်အက်သေတ် မ္ဒးသုၚ်စောဲ ပ္ဍဲအရာထိၚ်ဒက်ဍာ် ဒကေဝ်ရဝ် ဗာတံဂှ် ဟိုတ်နူၚုဟ်သၠုၚ်ဒၟံၚ်ဂှ်ရ လ္တူနူဖဝ်မေတ်အက်သေတ်ဂှ် ထ္ပက်အဇာတုဲ ဒးသုၚ်စောဲကၠုၚ် အက်သေတ်ၚုဟ်ဒးဒး အက်သေတ်ဍာ်ဍာ်တံ အဓိကရ။

ထၜိုတ်တိတ်နူတွဵုရးဍုၚ်မန် ဍာ်ဒကေဝ်စှ်ေကၠုၚ်တုဲ ဍုၚ်သ္အာၚ်လ္ၚဵုတံ ဒေါအ်ဇူပရေၚ်ရာန်

သ္အာၚ်နူဂှ်ပၠန် ပ္ဍဲပရေၚ်ကၠောန်ပ္တိတ်ထၜိုတ်ရဝ်ဗာတံဂှ်လေဝ် ဒၟါနူသၟာကမၠောန်အောန်ကၠုၚ်ဂှ်ရ သွက်ဂွံရပ်စပ် နဲကဲကၠောန်ပ္တိတ်ထၜိုတ် မသ္အးဇ္ၚးတံဂှ် ဇြဟတ်ဍိုန်လျကၠုၚ်တုဲ ပ္ဍဲအရာရပ်စပ်ဍာ် သွက်ဂွံကၠောန်ပ္တိတ်ထၜိုတ်တံဂှ်လေဝ် ဟိုတ်နူၚုဟ်ကၠေၚ်စက် သၠုၚ်တိုန်ဒၟံၚ် ဂၠိုၚ်ကဵုဆဂှ်ရ သွက်ဂွံရပ်စပ်ဍာ်ရုမ်မ်ဂပ်ပ်ဂှ် ဒးဂဗဒၟံၚ်အခက်ရ။

တၠကမၠောန်ရဝ်ဗာမွဲတၠဂှ် ဟိုတ်နူဍာ်ဒကေဝ်ထၜိုတ် စှ်ေကၠုၚ်ဂှ်ရ သီုဍုၚ်ကြုက် သီုဍုၚ်သေံဂှ် ရာန်အောန်ကၠုၚ်တုဲ ဍုၚ်မလေဝ်ယှာ မပလံၚ်ပ္တိုန်ဒၟံၚ် မွဲကဆံၚ်ပၠန်ဂှ်ဟီုမ္ဂး စိုပ်ကၠုၚ် ဒဵုကဵုအကာဲအရာ ဟွံရာန်အိုတ်ရပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“လက္ကရဴဏံ သွံစဟွံပြေပြံၚ်ကွေံရပုဟ်။ မုဒှ်ရောဟီုမ္ဂး ဍာ်ဒကေဝ်ဗၞိက်တံဂှ်တှ်ေ ဍုၚ်ဗၟာဂှ် ဗီုတီလဝ်ဂှ်ရ မၞိဟ်ရာန်ဂၠိုၚ်တှ်ေ ကၠောန်ကြာန်န်ဏောၚ်။ အေ ဂှ်တှ်ေ ပ္ဍဲလ္ပာ်မလေဝ်တေံဂှ် ဒှ်အာပြသၞာရ။ ရဲရာန်တံဂှ် အောန်ကြဳအာ တၟာဂလိုၚ်ဏောၚ်။ ကြုက်တံဟီုဂှ် ဍေံတံ ပလံၚ်မလေဝ်ရဏောၚ်လေဝ်။ လ္ပာ်ကြုက်ဂှ် ရဲရာန်အောန်အာရ။ လ္ပာ်သေံပၠန်ဂှ်လေဝ် ဟွံရာန်ဟွံသေၚ် ရာန်ဒၟံၚ်ရ။ ဒှ်အာမွဲဗီု။ လၟုဟ်ဂှ် ရဲရာန်လ္ပာ် သေံတံဂှ် ကၠေံဒၟံၚ်တၟာဂလိုၚ်ဏီဏောၚ်။ ပြသၞာအဓိကဂှ်တှ်ေ အာဒှ်အာပြသၞာ ပ္ဍဲကဵုမလေဝ်တေံ၊ ကပေါတ်ဗၞိက်တံဂှ် ကွာလတဳစှ်ေတုဲ ဒှ်ပြသၞာထၜိုတ်ဍုက်က်တံ မဟွံကှ်တံ ပါအာဂှ်ရဏောၚ်။ ဒှ်အာအကာဲအရာ ဍေံတံဟွံရာန်ဟဂှ်ရ” သာ်ဝွံ သ္ဂးရ။

ဒၟါနူဍာ်ဒကေဝ်ထၜိုတ်တံ စှ်ေကၠုၚ်ဂှ်ရ ဍုၚ်သ္အာၚ်တံဂှ် ပ္ဍဲအရာရာန်ကေတ်ရဝ်ဗာတံဂှ် အာတ်မိက်ကၠုၚ် တၚ်ဒုၚ်လျိုၚ် သီုသၞောတ်ခအၚ်ကေတ်တံဂှ် နွံကၠုၚ်တုဲ သ္ပပတံနူ လျိုၚ်ထၜိုတ် ကေုာံ ပရေၚ်ဂွဳစိုက်တံဂှ် ယဝ်ရကဵုတၚ်ဒုၚ်လျိုၚ်ဟွံမာန်မ္ဂး ဒှ်ကၠုၚ်အကာဲအရာ စဵုကဵုရာန်ကေတ်ဟွံမာန်တံရောၚ်ဂှ် သ္ဂးရ။

တၠကမၠောန်ရဝ်ဗာမွဲတၠဂှ်လေဝ် လက္ကရဴဏံ ဟိုတ်နူပရိုၚ် ဍုၚ်သ္အာၚ်တံ ရာန်ကေတ်အာ ထၜိုတ်ရဝ်ဗာ မရပ်စပ်လဝ် နဲကဲကၠောန်ပ္တိတ်ထၜိုတ်သဘာဝ မတန်အာအဓာန်ဇမၠိၚ်တံဂှ်ရတုဲ ပရိုၚ်ဂမၠိုၚ် မံက်တိတ်ကၠုၚ် မံက်က်ထေၚ်ၚ်ဂှ်ရ ဍာ်ဒကေဝ်ဟွံပေၚ်မွဲသာ် ယဝ်ရကၠောန်ပ္တိတ်ကၠုၚ်မ္ဂး ဗွဝ်ဖျာသာတုဲဍန်ဂြက်ကၠုၚ်မာန်ရောၚ် သ္ၚဳဂၠိပ်လဝ်ရ။

“အခိၚ်လၟုဟ် ပ္ဍဲကဵုရုၚ်စက်ပ္တိတ်သၠာတာယာတံသီုဖအိုတ်ဂှ် ဍေံတံဟီုကၠုၚ် ကုထၜိုတ် (SNR) ဏံ ကွေံကွေံဏောၚ်။ စိုပ် (၂၀၃၀) မ္ဂး ဒှ်ထၜိုတ်ပ္တိတ်လဝ်ကဵုနဲကဲ SNR မှရာန်ဏောၚ် ရမျာၚ်ဏံဂှ်လေဝ် ဂွံမိၚ်ဒၟံၚ်ရ။ ဟိုတ်ဂှ်ရ နကဵုပိုယ်တံ ပြဟ်ဟ်ဏံ ညံၚ်ဂွံဒှ်ထၜိုတ် SNR ဂှ် ဒးဗက်ကၠောန်ဏောၚ်ဂှ် ဂွံဆဵုကေတ်ရ။ ယဝ်ရပိုယ်တံ ဟွံဒှ်ထၜိုတ် SNR ပုဟ်၊ ဟွံကၠောန်လဝ်ပုဟ်ဟီုမ္ဂး သွက်ပိုယ်တံဂှ် ဗွဝ်ဖျာဍန်အာဏောၚ်ဂှ် ဂွံဆဵုကေတ်ရ။ လၟုဟ်မှဂှ် ဗွဝ်ဖျာပိုယ်တံ သှ်ေၜက်ဒၟံၚ်ယျ” သာ်ဝွံ သ္ဂးရ။

ထၜိုတ်တိတ်နူတွဵုရးဍုၚ်မန် ဍာ်ဒကေဝ်စှ်ေကၠုၚ်တုဲ ဍုၚ်သ္အာၚ်လ္ၚဵုတံ ဒေါအ်ဇူပရေၚ်ရာန်

ထၜိုတ်တိတ်နူအပ္ဍဲဒေသတံဂှ် ယဝ်ရဟွံကၠောန်ပ္တိတ် ဗွဲမစှ်ေကဵုသၞောတ်မ္ဂး အပ္ဍဲအခိၚ်ခြာဟွံလအ်ဏံ ဗွဝ်ဖျာဍုၚ်သ္အာၚ်တံရာန်ဂှ် ကၠေံအာမာန်တုဲ ယဝ်ရကၠေံအာမ္ဂး နကဵုညးတဵုလွဳရဝ်ဗာတံ သာဒးဂိကၠုၚ်မာန်ရောၚ် ညးသ္ဂးရ။

အခိၚ်လၟုဟ်ဂှ် ကၠအ်ထၜိုတ်ဂမၠိုၚ်ဝွံ ဟိုတ်နူစိုပ်ကၠုၚ်ရာသဳကသီုရတုဲ ၜိုတ်ဗ္ဒါဲ (၇၀) တၟံကၠံ ကၟာတ်ကၠုၚ် ထၜိုတ်တံ နွံကၠုၚ်တုဲ ဒမြိပ်ထၜိုတ်တိတ် စဵုကဵုဟွံမွဲ အောန်ကၠုၚ်ဒၟံၚ်ကီုလေဝ် ပရေၚ်ရာန်ကေတ် ထၜိုတ်တံ ၜိုတ်ထေၚ်လဝ် ဟွံမွဲပုဟ်ဂှ် တၠကမၠောန်သွံရာန်ထၜိုတ်တံ သ္ဂးအိုတ်ရ။

တွဵုရးဍုၚ်မန်ဝွံ ဒှ်တွဵုရးတိဨက တဵုလဝ်ထၜိုတ် နွံ (၅) ကိုဋ်ပြၚ်မွဲတုဲ လၟေၚ်သၞာံလျိုၚ်တာန်ထၜိုတ် တိတ်ဒၟံၚ်မွဲကိုဋ်ပြၚ်ရ။

ထၜိုတ်တိတ်ကၠုၚ်တံဂှ် ပလံၚ်ပ္တိုန်သွံတြးဒၟံၚ် ဍုၚ်သေံ ကဵု ဍုၚ်ကြုက် အဓိကတုဲ နူကဵုသွာၚ်ထၜိုတ်ဂှ် လၟေၚ်သၞာံ ကလိဂွံဒၟံၚ် ဒဝ်ဠာအမေရိကာန် ဂၠိုၚ်ကဵုပြကောဋိကိုဋ်ရောၚ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ

Leave a Reply

Your email address will not be published. Required fields are marked *