မတ်မလီု၊ မေ(၂၇)
ပ္ဍဲမွဲကာလဒပ်ပၞာန်သီအဝဵုဏံ ပ္ဍဲတွဵုရးဍုၚ် မ္ၚးနူဒပ်ကံၚ်ဇြဳပၞာန် ရပ်ဒက်ပြိုက်ဂစိုတ်ဂှ် ဟိုတ်နူပန်ပှ်ော လဝ်တုဲ ကောန်အရာပ်ညးဍုၚ်ကွာန် ဒးချိုတ်လဝ် စဵုကဵု (၆၀)တၠနွံကၠုၚ်ရဂှ် ဂွံတီကေတ် အတိုၚ်တၚ်ဂၞၚ် ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် AAPP ရ။
အတိုၚ် AAPP ဟီုသ္ဂးလဝ်မ္ဂး ပ္ဍဲမွဲကာလဒပ်ပၞာန်သီအဝဵု ပွိုၚ်(၂)သၞာံဏံ ကောန်အရာပ်ညးဍုၚ်ကွာန် ဒးဒုၚ်ပြိုက်ဂစိုတ်လဝ် ဗ္ဒာဲ ၃၆၀၀ တၠ နွံကၠုၚ်တုဲ ပ္ဍဲကဵုဂှ် ကောန်အရာပ် နူတွဵုရးဍုၚ်မန် ပါလုပ်ဒၟံၚ် (၆၀)တၠရဂှ် လလောၚ်တြးလဝ် ပ္ဍဲဂိတုမေ စၟတ်တ္ၚဲ(၂၆)ရ။
ကောန်အရာပ်ညးဍုၚ်ကွာန်တအ်ဂှ် ဃောထ္ၜးဒၟံၚ်ဆန္ဒၜိုဟ်ဟ်ဂှ် ဒးဒုၚ်ပန်လဝ်ကီု၊ ဒးဒုၚ်ရပ်တုဲ ဒးဒုၚ်ပျဲပျာံပြိုက်ဂစိုတ်လဝ်ကီု၊ အဃောအာကၠုၚ်ဒၟံၚ် ဒးဒုၚ်ပန်ပှ်ောလဝ်ကီု၊ ဟိုတ်နူပရေၚ် ကံၚ်ဇြဳပၞာန် ပန်ဖျေံလွဟ်ဇၞော်ပ္ဍဲကွာန် ဇီုကပိုက်တုဲ ဒးချိုတ်လဝ် နွံရ။

အတိုၚ်ပရေၚ်ကောန်အရာပ်ညးဍုၚ်ကွာန် ဒးချိုတ်လဝ်ဂှ်မ္ဂး နူရးသေတ်ဂါၚ် (၁၅၈၄)တၠ ပါလုပ်ဒၟံၚ် လၟိဟ်ဂၠိုၚ်အိုတ်တုဲ ပ္ဍဲတွဵုရးကရေၚ်ကြပ်ညောန်ဒၟံၚ်ကဵုတွဵုရးဍုၚ်မန်ဂှ် ၂၂၈ တၠ၊ ပ္ဍဲရးတၞၚ်သြဳဂှ် ပါလုပ်ဒၟံၚ် ၁၃၁ တၠရ။
AAPP ဂှ်မ္ဂး ကံက်ကပှ်ကေတ်လဝ် ပရေၚ်ကောန်အရာပ်ညးဍုၚ်ကွာန်တအ်ဒးချိုတ် ၜိုတ်ဟောဝ် ဍစိုပ်တုဲ ပ္ဍဲဗလးမုက်တိဂှ် ဂၠိုၚ်လ္တူနူဏံ နွံမာန်ရောၚ် ဟီုသ္ဂးလဝ်ရ။
နူသၞာံ ၂၀၂၁ ဂိတုဖေဖဝ်ဝါရဳ စၟတ်တ္ၚဲ (၁) ဒပ်ပၞာန်သီဳအဝဵု စဵုကဵုဂိတုမေ စၟတ်တ္ၚဲ (၂၅) ဏံ ညးဒးဒုၚ်ရပ်လဝ် ၂၂၀၀၀ ပြၚ်နွံတုဲ ပ္ဍဲကဵုဂှ် ညးဒးဒုၚ်ဖျေံလဝ်ဒုဟ်ဒဏ်ထံၚ် ၆၀၀၀ ပြၚ် နွံရဂှ် AAPP လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ(ဗီုတြေံ)

