ညးဒေသမဝ်ခဳ ဒးဒုၚ်ဗတိုက်လဝ်ကဵုက္ၜၚ်ကျာ နွံဒၟံၚ်ပၟိက်ကၟဳဗ္ဒၚ်ကီု သီုဇွောံမစၞစ နဒဒှ်ကာတၟေၚ်

ကအ်ကြိက်၊ မေ(၂၇)

ပ္ဍဲဒေသမဝ်ခဳ တိဍာ်ဗော်သွးကောန်ဂကူကရေၚ် KNU ဒပ်မဟာ (၆)ဂှ် ဟိုတ်နူဒပ်ကံၚ်ဇြဳပၞာန် ဗတိုက်လဝ်ကဵုပၞာန်ကျာတုဲ သွက်ညးဍုၚ်ကွာန် ဒးဂြိပ်ဒဴပါဲဓလေတ်ဒၟံၚ်တအ် နွံဒၟံၚ်ပၟိက်ကဵု အရီုဗၚ်ထံက်ပၚ် ဇွောံမစၞစ ကေုာံကၟဳဗ္ဒၚ် နဒဒှ်ကာတၟေၚ်ရဂှ် ဂကောံအခေါၚ်အရာမၞိဟ်ကရေၚ် KHRG လလောၚ်တြးလဝ် ပ္ဍဲဂိတုမေ စၟတ်တ္ၚဲ(၂၆)ဏံရ။

ပ္ဍဲဂိတုမေ စၟတ်တ္ၚဲ (၂၃) တုဲကၠုၚ် အခိၚ်သ္ဂာဗ္တံဂှ် ကံၚ်ဇြဳပၞာန်ကၠောန်သ္ပကၠုၚ်လဝ် ပရေၚ်ဗတိုက်ပန် ဂြာတ်ထောံဖျေံဗုမ် ကဵုက္ၜၚ်ကျာ ပ္ဍဲကွာန်ပနွဖိုဝ်ကလိုဝ်၊ ဂကောံကွာန်မဝ်ခဳ တိဍာ်ဒပ်မဟာ(၆) ၊ ခရိုၚ်ဒူပလာယာ KNU ဂှ် ဘာကျာ်ခရေတ်ယာန် မၞုံကွာန်ဂှ်ကဵု ဘာဗဝ်ဒါဆောၚ် (၁)ဘာ ဒးလီုလာ် လဝ်ပေၚ်ၚ်တုဲ သ္ၚိဒၟံၚ်(၂)မလေဝ် ဇီုကပိုက်လီုလာ်အာလဝ်ရ။

ဟိုတ်နူပရေၚ်ဗတိုက်ပန်ကဵုက္ၜၚ်ကျာတုဲ ၜိုန်ရညးဒေသကောန်ကွာန်တအ် ဟွံဇီုကပိုက်ဒးလဝ် ဘဲဝပ်ကီုလေဝ် ကောန်ကွာန် (၂၀၀)တၠပြၚ် ဒးဂြိပ်ဒဴပါဲဓလေတ်ဒၟံၚ်ဂှ်ရ နွံဒၟံၚ်ပၟိက်ကဵု အရီုဗၚ်ထံက်ပၚ် ဇွောံမစၞစ ကေုာံကၟဳဗ္ဒၚ်နဒဒှ်ကာတၟေၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး KHRG ရ။

ပ္ဍဲတိဍာ်ဒပ်မဟာ (၆) KNU ဂှ် သၞာံဏံ ဟိုတ်နူပရေၚ်ဒပ်ကံၚ်ဇြဳပၞာန်ဗတိုက်လဝ်ကဵုပၞာန်ကျာတုဲ ဘာကျာ်ခရေတ်ယာန် ထဳကပလေဝ်၊ ဘာကျာ်ခရေတ်ယာန်မေဝ်ကနေဝ်၊ ဘာကျာ်ခရေတ်ယာန် ပနွဖိုဝ်ကလိုဝ်တအ် ဒးခရိုဟ်လီုလဝ် ပေၚ်ၚ်ရဂှ် လလောၚ်တြးလဝ်ရ။

အတိုၚ်တၚ်လလောၚ်တြး ဌာနလလောၚ်ပရိုၚ်ခရိုၚ်ဒူပလာယာ KNU ဂှ်မ္ဂး ပ္ဍဲဂိတုဨဗြဴ တုဲကၠုၚ်ပွိုၚ် (၁)ဂိတုဏံ ဒပ်ကံၚ်ဇြဳပၞာန် ကၠောန်သ္ပလဝ် ပရေၚ်ဗတိုက်ကဵုပၞာန်ကျာ (၃၀)ဝါပြၚ်ဂှ် ပါလုပ်သီုဘာကျာ် ခရေတ်ယာန်၊ ဘာလေံကျာ်၊ ဗ္ဒမ်ကဵုဂဥုဲ၊ ဘာဗ္တောန်လိက် ကေုာံ စမြိုၚ်မၞိဟ်မံၚ် ပံၚ်လၟိဟ် (၄၀၀)ပြၚ် ဇီုကပိုက်ဒးလီုလာ်လဝ်ရဂှ် ဂွံတီကေတ်ရ။

သ္အာၚ်နူဂှ်ပၠန် ဟိုတ်နူပရေၚ်ဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ်ညးဍုၚ်ကွာန်တုဲ ချဳဒရာၚ်ကၠုၚ်ပၞာန် ကေုာံပရေၚ်ဖံက်ပ္ကဝ်လဝ် အခေါၚ်အရာမၞိဟ်တုဲ လၟိဟ်ညးဍုၚ်ကွာန်ပါဲဓလေတ်ဘဲပၞာန် ပ္ဍဲတိဍာ်ဒပ်မဟာ (၆) (၂၃၀၀၀) ပြၚ်တအ်ဂှ် ဒးဂြိပ်ဒဴပါဲဓလေတ်ဒၟံၚ် ပ္ဍဲဌာန်ဗၠးဘဲဖိုဟ်ဏီတုဲ ကလေၚ်စဴကၠုၚ်ဌာန်ဒၟံၚ် ဟွံမာန်ဏီရဂှ် ခရိုၚ်ဒူပလာယာလလောၚ်တြးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-KHRG