ပေါဲပၞာန်ယူကရုၚ်ဝွံ လအ်အာကဵုစှော်သၞာံမာန်ရောၚ် က္ဍိုပ်သ္ကိုပ်ရုယှာ ဟီု

မဝ်သကိုဝ်၊ မေ (၂၇)

သမ္မတရုယှာတြေံ ဒဳမဳထရဳ မက်ဗဳဒက် မွဲဏှမွဲဏှ မလေပ်ကဵုတဴစၟတ်သမ္တီ ပိုတ်တ်သ္ကုတ်တ် စပ်ကဵုပေါဲပၞာန်ကရေမ္မလေန် မၞုံယူကရုၚ်ဂှ် ပဋိပက္ခတံဏံဝွံ သ္ဇက်ဂွံလအ်အာ သၞာံဗွဲမဂၠိုၚ်ဂၠေၚ်နွံရောၚ် ပ္ဍဲဂိတုမေ (၂၆) တေံ ဟီုဂးလဝ်ရ။

“ပဋိပက္ခတံဏံဝွံ လအ်အာသၞာံဗွဲမဂၠိုၚ်ဂၠေၚ်မာန်ဏောၚ်၊ ကဵုစှော်သၞာံလေဝ် လအ်မာန်ရောၚ်” သာ်ဝွံ မက်ဗဳဒက် မဒှ်အထံက်ဇၞော်သ္ကိုပ် ကံၚ်ဇြဳဂီုကၠီုရုယှာ မၞုံသၟဝ်တဲ သမ္မတရုယှာ ဗလာဒဳမာပူတေန် အဃောမအာစိုပ်ဂေတ်ဝေၚ် ဝေဒ်နာမ်ဂှ် ဟီုဂးလဝ်ရောၚ် ပရိုၚ်မဳဒဳယာကၟိန်ဍုၚ်ရုယှာပိုၚ် RIA Novosti ထ္မံက်ထ္ၜးလဝ်ရ။

“လုကဴအဝဵု ပ္ဍဲကိယေပ်နွံဒၟံၚ်မ္ဂး ဒှ်အာဒၟံၚ်ဟဂှ်ရဏောၚ်၊ ပရေၚ်ဒေါအ်ပန်ပှော်ပိသၞာံ၊ ပဋိပက္ခၜါသၞာံ နွံဏောၚ်၊ တုဲမ္ဂး အရာရာအိုဿီု ကလေၚ်ဒှ်သၞောတ်တြေံပၠန်ဏောၚ်” သာ်ဝွံ ညးထပ်ဟီုဗပေၚ်စုတ်လဝ်ရ။

သမ္မတယူကရုၚ် ဗလာဒဳမာ ဇြဳလာန်သကဳဂှ် ပ္ဍဲသၞာံဏံ အခိၚ်ပြဟ်ဟ်တေံ ၜိုတ်ရထ္မံက်ပ္တိတ်ဟီုဂးလဝ် တၚ်စၟဳညာတ် သွက်ဂွံဖအိုတ်ကၠေံ ပဋိပက္ခဂှ်ကီုလေဝ် သမ္မတရုယှာဗလာဒဳမာပူတေန်ဂှ် ပေါဲပၞာန်ဝွံ ဒဒှ်ရဒှ်တဴလၟေၚ်ကမၠောန် ဂၠိၚ်သ္ၚောဲမွဲရောၚ် ဟီုဂးလဝ်ရ။

ပေါဲပၞာန် မလုပ်လၟိဟ် ပ္ဍဲစရၚ်ပဋိပက္ခမၜိုဟ်ဂံက်ဒၟံၚ် ညံၚ်ရဴကိုဝ်ရဳယျာသၟဝ်ကျာ ကေုာံ ကိုဝ်ရဳယျာသၠုၚ်ကျာတံဂှ်ဝွံ သၞာံဗွဲမဂၠိုၚ်ဂၠေၚ် လအ်မာန်ရောၚ် သၞာဲဒဴအမေရိကာန်ဂမၠိုၚ် ကေၚ်ဟီုဂးလဝ် လအာတုပ်သာ်ဂှ်ကီုရ။

မက်ဗဳဒက်ဝွံ စပ်ကဵုမူဝါဒကာဍုၚ်သ္အာၚ်တုဲ ဒှ်ညးလေပ်ကၠောန်သ္ပ တၚ်လလောၚ်တြး သ္ဇက်ဒးက ယျာန်ဓဝါန် မွဲဏှမွဲဏှမွဲရ။ ညးဝွံ တၚ်သ္ဂုတ်သွာတ် သမ္မတရုယှာဂှ် သ္ကဵုလုပ်တဴသၞောဝ်တုဲ သွက်ဂွံထိၚ် ဒက် အရာပၟိက်ဇၞော် လ္ဂောံကဵုပရေၚ်ဍုၚ်ကွာန်တံဂှ် နဒဒှ်ပ္တိတ်ဇြဟတ်ကၠေံစိုတ် မွဲဒကုတ်မွဲဒကူကီုတုဲ ပွမပါ်ပါဲဒၟံၚ်တံ နွံလဝ်လေဝ် မဒှ်ရ။

ဝန်ဇၞော်ကာဍုၚ်သ္အာၚ်ယူကရုၚ်ဂှ် နကဵုမက်ဗဳဒက် သုၚ်အရက်ဗ္ၜူတုဲ ဒဒှ်ရပ္တိုန်လ္တူသဵုယှေဝ် မဳဒဳယာ ဟွံထေက်ဂှ် ပ္ဍဲဂိတုဏံပြဟ်ဟ်တေံ ဟီုဂးလဝ်ရ။

Ref; Political EU