ပံၚ်၊ မေ(၂၈)
တွဵုရးဍုၚ်မန်၊ ပွိုၚ်ဍုၚ်ပံၚ်၊ ပ္ဍဲကွာန်တခေါန်ဒိုၚ် ဂိတုမေ စၟတ်တ္ၚဲ (၂၆) အခိၚ်ဗ္တံ ၜိုတ်(၈)နာဍဳဂှ် သ္ကိုပ်ပရေၚ်အုပ်ဓုပ် ကံၚ်ဇြဳပၞာန်ခါန်ကၞက်မွဲတၠ ဟိုတ်နူဒးဒုၚ်ပန်ကဵုလွဟ်တုဲ ဒးချိုတ်လဝ်ရဂှ် ညးဒေသဂမၠိုၚ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
သ္ကိုပ်ပရေၚ်အုပ်ဓုပ် ကွာန်အေန်ဗျောၚ် ဥူသိုဝ်မိ ဒၟံၚ်ကွာန်တခေါန်ဒိုၚ်ဂှ် သၟာလွဟ်ဂမၠိုၚ် ကၠုၚ်ကဵုကွဳလိုန်ဓာတ်(၂)ဖ္ဍိုက် တိုန်လ္တူသ္ၚိတုဲ ပန်လဝ် နကဵုလွဟ်ရ။
ဃောပန်ကဵုလွဟ်ဂှ် ၜိုန်ရဥူသိုဝ်မိ ပ္တိတ်ဇြဟတ် သွက်ဂွံဂြိပ်ကီုလေဝ် ဒးချိုတ်အာ ပ္ဍဲဗ္ဒာဲဂအာၚ်သ္ၚိဂှ် နကဵုဘဲလွဟ်မကမ် ဒးလဝ်ပ္ဍဲက္ဍိုပ်ရ။
ကြဴနူသ္ကိုပ်ပရေၚ်အုပ်ဓုပ် ဥူသိုဝ်မိ ဒးဒုၚ်ပန်ကဵုလွဟ်တုဲ ပ္ဍဲဂိတုမေ စၟတ်တ္ၚဲ (၂၇) အခိၚ်နူဂယးဂှ် ကောန်ဒပ်ကံၚ်ဇြဳပၞာန်တအ် စိုပ်ကၠုၚ်ကွာန်တခေါန်ဒိုၚ်တုဲ ကၠောန်သ္ပလဝ် ပရေၚ်သၟာန်သၟုက်စၟဳစၟတ်တုဲ ကလေၚ်တိတ်အာရဂှ် ညးဒေသတအ် ဟီုသ္ဂးလဝ်ရ။
ပရေၚ်ပန်ပှ်ောလဝ်ဥူသိုဝ်မိဏံ နူဂကောံလဵု ကၠောန်သ္ပလဝ်ရောဂှ် စဵုကဵုလၟုဟ်ဏံ လလောၚ်တြးလဝ် ဟၟဲဏီရ။
ပ္ဍဲပွိုၚ်ဍုၚ်ပံၚ်ဂှ် ကြဴနူဒပ်ပၞာန်သီအဝဵုတုဲ သ္ကိုပ်ပရေၚ်အုပ်ဓုပ်ကံၚ်ဇြဳပၞာန်ခါန်ကၞက်တအ်၊ က္ဍိုပ်သ္ကိုပ်ပၞာန်ညးဍုၚ်ကွာာန်ကေုာံ ဒလာန်ကဵုပရိုၚ်တအ် ဒးဒုၚ်ပန်ဒၟံၚ် ခြာဟွံလအ် ဟွံလအ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ
sanlontai