ပ္ဍဲၜဳကလေၚ် ဟိုတ်နူပရေၚ်ပန်ပှော်ၜါလ္ပာ်တုဲ ကောန်ၚာ် (၂) တၠ ဒးချိုတ် (၅)တၠ ဒးလဝ်ဘဲဝပ်

ၜဳကလေၚ်၊ မေ(၂၈)

တွဵုရးဍုၚ်မန်၊ ပ္ဍဲပွိုၚ်ဍုၚ်ၜဳကလေၚ်ဂှ် ဟိုတ်နူပရေၚ်ပန်ပှော်ၜါလ္ပာ်တုဲ ကောန်ၚာ် (၂)တၠဒးချိုတ်လဝ်တုဲ ဒးလဝ်ဘဲဝပ် (၅)တၠရဂှ် ဂွံတီကေတ် နူညးဒေသကီု သီုသ္ကိုပ်ကောပ်ကာဲကေၚ်ကာမိတ် KNU ခရိုၚ်သဓီုတအ်ရ။

ဂိတုမေ စၟတ်တ္ၚဲ (၂၇) အခိၚ်နူဂယးဂှ် ကောန်ဒပ်ကံၚ်ဇြဳပၞာန် ဖျေံလဝ်ဗဒိုပ် ဗ္ဒာဲကွာန်ဒံၚ်ယွာ(ဒေါင်းရွာ) ပွိုၚ်ဍုၚ်ၜဳကလေၚ်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ၊ PDF တအ် အာဗတိုက်လဝ် နကဵုဒရုမ်ရ။

ပ္ဍဲပရေၚ်ဗတိုက်ပန်ဏံ မခတိုဟ်မွဲမ ဟိုတ်နူဒတုံစှ်ေ ပါ်ခတိုဟ်အာ ပ္ဍဲကၠံဥူသဝ်ဗခေတ် ဒၟံၚ်ကွာန်ဒံၚ်ယွာတုဲ ကောန်ကၟိန်ညး သဝ်မိုဝ်ထေတ် ကေုာံ သဝ်မဝ်ခါ အာယုက် ၁၆ သၞာံတအ် ဒးလဝ်တုဲ ဒးချိုတ်အာရ။

ကြဴနူကောန်ဒပ်ကံၚ်ဇြဳပၞာန် ဒးဒုၚ်ဗတိုက်တုဲဂှ် နူဒပ်အမၠံက်ကံၚ်ဇြဳပၞာန် စၟတ် (၃၁၄) ပန်ဖျေံနၚ်လွဟ် ဇၞော် ပ္ဍဲကွာန်အဝေန်ဂျဳ ပွိုၚ်ဍုၚ်ၜဳကလေၚ် ဟွံအောန်နူ (၁၀)မရ။

မကမ်လွဟ်ဇၞော်ကံၚ်ဇြဳပၞာန်တအ်ဂှ် ဟိုတ်နူဒတုမ်စှ်ေ ပါ်ခတိုဟ်လဝ် ပ္ဍဲဘာလကျာ်တုဲ ခမဳ(၁) ဇကု၊ ထပိုဲ (၂) ဇကု၊ ကွးဘာ (၁) တၠ သီုကောန်ကွာန် (၁) တၠ ဒးလဝ်ဘဲဝပ်တုဲ စမြိုၚ်ဘာလကျာ်လ္ၚဵုလေဝ် ဇီုကပိုက်ဒးလီုလာ်လဝ်ရ။

ဥက္ကဋ္ဌကောပ်ကာဲကေၚ်ကာမိတ်ခရိုၚ်သဓီု KNU ဂှ်မ္ဂး ဟိုတ်နူညးတအ်ပန်ပှော်လဝ်တုဲ ပ္ဍဲလတူကောန်ၚာ် (၂)တၠ ဒးချိုတ်လဝ်ဂှ် ဒဒှ်ရစိုတ်ဟွံမိပ်ကီု သွက်ပရေၚ်ပရောလၟုဟ်ဏံ ဒဒှ်ရ ဒုၚ်ဂုဏ်ဝန်စဝ်ဏာ ဇြိုဟ်ဟ်နကနက်ကီု ဂတနူဏံ ပရေၚ်ဒဒှ်တုပ်သၟဟ်ဗီုဏံ ညံၚ်ဟွံဂွံထပ်က္တဵုဒှ်ကၠုၚ် ကဵုအာစၞောန် ကုဂကောံ ပ္ဍဲဗလးမုက်တိတအ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲပွိုၚ်ဍုၚ်ၜဳကလေၚ်ဂှ် ကြဴနူဒပ်ပၞာန်သီအဝဵုတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်က္တဵုဒှ်ဒၟံၚ် မွဲခနမွဲခနကီု ဒပ်ကံၚ်ဇြဳပၞာန်လေဝ် ပန်ဖျေံဒၟံၚ်လွဟ်ဇၞော်ပ္ဍဲကွာန်ဂမၠိုၚ် အရိုဟ်ဒဒှ်တ္ၚဲရ။

ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်ဂှ် ညးဒေသ ၇၀၀၀ ပြၚ် ဒးဂြိပ်ဒဴပါဲဓလေတ်ဒၟံၚ်တုဲ နွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ်ဏီဖိုဟ်ရဂှ် ဂွံတီကေတ် နူဂကောံညးအရာပ်ကရေၚ်ဂမၠိုၚ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-CJ