ရေဝ်၊ မေ(၂၈)
တွဵုရးဍုၚ်မန် ပွိုၚ်ဍုၚ်ရေဝ် တံဒပ်ပၞာန်တိုက်ကံၚ်ဇြဳပၞာန် ခရလ (၅၈၃) ဖျေံသ္ဇိုၚ်အကြာကွာန်ဘာကဵု ကွာန်ကာန်လှဂှ် အာစိုပ်ဗတိုက်ပန်လဝ်ကဵုကမ်လှောဝ်ရဂှ် ညးတာလျိုၚ်ဒပ်ဒမၠုက်ဍုၚ်ရေဝ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တံဒပ်ကံၚ်ဇြဳပၞာန်ဂှ် ပ္ဍဲဂိတုမေ စၟတ်တ္ၚဲ (၂၆) အခိၚ်သဝ်တ္ၚဲ ၜိုတ် (၅)နာဍဳဂှ် ဒပ်ဒမၠုက်ဍုၚ်ရေဝ် မ္ၚးနူကမ်လှောဝ် ၁၀၇ မမ တုဲ အာဗတိုက် သီုကဵုဒရုမ်ရ။
ပ္ဍဲပရေၚ်ပန်ဗတိုက်ဏံ ကမ်လှောဝ်ဂှ် ၜိုန်ရဒတုံစှ်ေ ခတိုဟ်လဝ် ပ္ဍဲတံဒပ်ကံၚ်ဇြဳပၞာန်ကီုလေဝ် ပရေၚ်ကောန်ဒပ်ကံဇြဳပၞာန်ဇီုကပိုက်ဒးလဝ်ကီု စမြိုၚ်ဒးလီုလာ်အာလဝ်တအ် ဆက်ဂၠိုက်ဂၠာဲဒၟံၚ်ရဂှ် ညးတာလျိုၚ် ဗိုလ်ကျာန်ယျေတ် ဟီုသ္ဂးလဝ်ရ။
ကြဴနူတံဒပ်ဒးဒုၚ်ဗတိုက်လဝ်တုဲ ၜိုန်ရလ္ပာ်ကံၚ်ဇြဳပၞာန် ကလေၚ်ပန်နၚ်လဝ်ကဵုလွဟ်ဇၞော်၊ ဍောတ် အဆက်ဟွံပိုတ်သ္ကုတ်ကီုလေဝ် လ္ပာ်ဒပ်ဒမၠုက်တအ် ဇီုကပိုက်ဒးလဝ် ဟၟဲမွဲသာ်တုဲ ကလေၚ်ဆုတ်တိတ်မာန်လဝ်ရဂှ် ဂွံတီကေတ်ရ။
ညးဒေသမွဲတၠဂှ်မ္ဂး ကြဴနူတံဒပ်ကံၚ်ဇြဳပၞာန် ဒးဒုၚ်ဗတိုက်လဝ်တုဲ ၜိုန်ဂွံမိၚ်လဝ် ရမျှာၚ်ပန်ပှော်ကီုလေဝ် ပရေၚ်ဇီုကပိုက်ဒးလဝ်ဂမၠိုၚ် ဟွံဂွံတီဏီရဂှ် ဟီုသ္ဂးလဝ်ရ။
ၜိုန်ရတံဒပ်ကံၚ်ဇြဳပၞာန် ဒးဒုၚ်ဗတိုက်လဝ်ကီုလေဝ် လ္ပာ်ကံၚ်ဇြဳပၞာန် တိတ်မ္ၚးတံဒပ်တုဲ စၟဳစၟတ်ဂၠိုက်ဂၠာဲကီု ထ္ပက်ကရောၚ်ပၞာန်တုဲ ဂၠိုက်ဂၠာဲအကြာဂြိုပ်ကီု ဟၟဲရောၚ်ဂှ် ဟီုသ္ဂးလဝ်ရ။
တံဒပ်ကံၚ်ဇြဳပၞာန် မၞုံပွိုၚ်ဍုၚ်ရေဝ် လလောၚ်တြးလဝ် ပရေၚ်အုပ်ဓုပ်ပၞာန်တအ်ဂှ် ဒးဒုၚ်ဗတိုက်ဒၟံၚ် ခြာဟွံလအ်ဟွံလအ်တုဲ လ္ပာ်ကံၚ်ဇြဳပၞာန် ပရေၚ်ဒးဇီုကပိုက်ချိုတ်ဒၟံၚ်လေဝ် နွံကၠုၚ်ရ။
ပွိုၚ်ဍုၚ်ရေဝ်ဂှ် ပ္ဍဲဂိတုဖေဖဝ်ဝါရဳ တ္ၚဲကၠုၚ်စၟတ်တ္ၚဲ (၂)တေံ လလောၚ်တြးလဝ် ပရေၚ်အုပ်ဓုပ်ပၞာန်တုဲဂှ် ပၟိၚ်အသံဒေသန္တရလေဝ် လလောၚ်တြးလဝ်တုဲ ပတေၚ်ဂြတ်လဝ် ပရေၚ်ဂီုကၠီုရ။
ပရိုၚ်-သြၚ်လောန်တိုၚ်(မ်)
ဗီုရုပ်-YGF
sanlontai