ကွဳစက်ပ္ဍိုက်ဗၞိက်မွဲဖ္ဍိုက် ဒးဒုၚ်တံၚ်ခတိုဟ်မာၚ် ပ္ဍဲဂၠံၚ်ကွဳစက် လဂုၚ်-မတ်မလီုတုဲ ဒးချိုတ်အာ (၂) တၠ

သဓီု၊ မေ (၂၈)

တွဵုရးဍုၚ်မန် ပွိုၚ်ဍုၚ်သဓီု ပ္ဍဲဂၠံၚ်ကွဳစက် လဂုၚ်-မတ်မလီု ဂကောံကွာန်မိုဝ်ကောၚ်ဂှ် ဟိုတ်နူကွဳစက်ပ္ဍိုက်ဗၞိက်မွဲဖ္ဍိုက် ဒဒုၚ်တံၚ်ခတိုဟ်မာၚ်တုဲ သၟာဒဳကွဳစက်၊ ညးဗက်လကြဴကွဳစက်တအ် ညး(၂)တၠ ဒးချိုတ်အာတုဲ ဒးလဝ်ဘဲဝပ် (၁)တၠရဂှ် ဂွံတီကေတ် နူညးဒေသတအ်ရ။ 

ဂိတုမေ စၟတ်တ္ၚဲ (၂၆)အခိၚ်ဗ္တံ ၜိုတ် (၉)နာဍဳဂှ် ကွဳစက်ပ္ဍိုက်ဗၞိက် သၠာ (၂၂) ဒဳလုပ်ကၠုၚ်ပွိုၚ်ဍုၚ်သဓီု နူပွိုၚ်ဍုၚ်ၜဳကလေၚ်ဂှ် အခိၚ်စိုပ်ကၠုၚ် ပ္ဍဲဂကောံကွာန်မိုဝ်ကောၚ် ဒးဒုၚ်တံၚ်ခတိုဟ်လဝ်မာၚ်ရ။

ဟိုတ်နူဒးဒုၚ်တံၚ်ခတိုဟ်လဝ်မာၚ်တုဲ သၟာဒဳကွဳစက် ဥူတာန်မေန်ထိုက် ဒၟံၚ်ပွိုၚ်ဍုၚ်ဖျာပုၚ်ကဵု ညးဗက်လကြဴကွဳစက် ကိုဝ်ဟုၚ်ဇြေန်ဝေန်တအ် ညး (၂)တၠ ဒးချိုတ်လဝ်တုဲ မခေန်ဇြာလှိုၚ် ဍိုက်ပါဗက်ကၠုၚ်ကွဳစက်ဂှ်လေဝ် က္လိဂွံလဝ်ဘဲဝပ်ရ။ 

ဒၟာနူဒးဒုၚ်တံၚ်ခတိုဟ်လဝ်မာၚ်တုဲ ညးဇီုကပိုက်ချိုတ်လဝ်တအ်ဂှ် ဂကောံရီုဗၚ်ဟံၚ်ပြာ်ပရေၚ်မၞိဟ်တအ် ပလံၚ်ဗစိုပ်ကဵုလဝ် ရုၚ်ဂဥုဲညးဍုၚ်ကွာန်ရဂှ် ဂွံတီကေတ်ရ။ 

ပ္ဍဲအကံၚ်တေဝ်လဳဂရာမ်လဝ်ဗဳဒပ်ပၞာန်ဂှ်မ္ဂး ပရေၚ်ကွဳစက်ပ္ဍိုက်ဗၞိက် ဒးဒုၚ်တံၚ်ခတိုဟ်လဝ်မာၚ်ဏံ ဒပ်စဵုဒၞာညးဍုၚ်ကွာန် PDF တအ် ကၠောန်သ္ပဒၟံၚ်ရဂှ် ပရေၚ်တြးဒၟံၚ်ဝါဒ နွံရ။ 

ဥက္ကဋ္ဌကောပ်ကာဲကေၚ်ကာမိတ်ခရိုၚ်သဓီု KNU ဂှ် ပရေၚ်ကွဳစက်ပ္ဍိုက်ဗၞိက်မွဲဖ္ဍိုက် ဒးဒုၚ်တံၚ်ခတိုဟ်လဝ်မာၚ်ဂှ် ၜိုန်မိၚ်လဝ်ကီုလေဝ် ဂကောံလဵု တံၚ်ခတိုဟ်လဝ်မာၚ်ရောဟီုဂှ် ဆက်ဂၠိုက်ဂၠာဲ စၟဳစၟတ်ဒၟံၚ်ဖိုဟ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ၊ 

ဂၠံၚ်ကွဳစက် လဂုၚ်-မတ်မလီု ကွဳစက်ပ္ဍိုက်ဗၞိက် ဒးဒုၚ်တံၚ်ခတိုဟ်လဝ်မာၚ်ဂှ် မ္ၚးနူဒပ်ကံၚ်ဇြဳပၞာန်တုဲ ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ် PDF တအ်လေဝ် ချဳဒရာၚ်ဒၟံၚ် ပရေၚ်ပၞာန်ရ။ 

ပ္ဍဲဂိတုမေ စၟတ်တ္ၚဲ (၂၁)တုဲကၠုၚ်တေံလေဝ် ပွိုၚ်ဍုၚ်သဓီု၊ ဂကောံကွာန်ဍုန်ဝါန်၊ ပ္ဍဲဂၠံၚ်ကွဳစက် လဂုၚ်-မတ်မလီု ကွာန်ကမာသိုၚ်ဂှ် ကွဳစက်ပ္ဍိုက်ညးအာတရဴမွဲဖ္ဍိုက် ဒးဒုၚ်တံၚ်ခတိုဟ်လဝ်မာၚ်တုဲ ညးအာတရဴပါဗက်ကၠုၚ်ကွဳစက်ဂှ် (၃) တၠ က္လိဂွံလဝ်ဘဲဝပ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-CJ