ကၠောန်ဗဒှ် ပေါဲထ္ၜးပျးလွဟ်လက်နက်အဇာဇၞော် ကၟိန်ဍုၚ်နာနာ ပ္ဍဲမလေဝ်ယှာ

လာန်ကာဝဳ၊ မေ(၂၈)

ပ္ဍဲအခိၚ်ဇြဟတ်ပရေၚ်ဍုၚ်ကွာန်ဘူမိ အလုံမွဲဂၠးကဝ် သၠုၚ်တိုန်ကၠုၚ်ဒၟံၚ်ဂှ် ပေါဲထ္ၜးပျးလွဟ်လက်နက်ကၟိန်ဍုၚ်နာနာ ကၠောန်ဗဒှ်ဒၟံၚ် ပ္ဍဲဍုၚ်မလေဝ်ယှာဂှ် က္တဵုဗဒှ်ကဵု ပရေၚ်စိုတ်ပါလုပ်စ ဇၞော်ကဵုဇြဟတ်ရ။

ပ္ဍဲပေါဲထ္ၜးပျး ဆေၚ်စပ်ကဵုဒပ်ဍာ် ကေုာံဗလးအာကာသ ကၟိန်ဍုၚ်နာနာ လာန်ကာဝဳ ပ္ဍဲသၞာံဏံ သီုဒှ်ပေါဲထ္ၜးပျး ကၟိန်ဍုၚ်မလေဝ်ယှာဇၞော်အိုတ်ဂှ် ကုမ္ပဏဳ ၅၀၀ ပြၚ် နူဍုၚ် ၃၀ ဍုၚ်ပြၚ် တအ် ထ္ၜးပျးလဝ် နဲကဲကွတ်ပညာ Hardware ကေုာံ Software ဆေၚ်စပ်ကဵု လွဟ်လက်နက်ပၞာန်ညးတအ်ရ။

ပေါဲထ္ၜးပျးလွဟ်လက်နက် ဒးဒုၚ်ဒေါံဇူလဝ် ပွိုၚ်ပန်သၞာံပြၚ်ဏံ တံၚ်ဂြဲစိုတ်ဓာတ်သ္ကိုပ်သ္ကပရေၚ်စဵုဒၞာ မိက်ဂွံဂလိုၚ်ပတိုန် စရိတ်သုၚ်စောဲလွဟ်လက်နက်ပၞာန် ပ္ဍဲဒေသတအ် မာန်ကၠုၚ်လဝ်ရ။

ပေါဲထ္ၜးပျးလွဟ်လက်နက် မကၠောန်ဗဒှ်လဝ် ပွိုၚ် (၅)တ္ၚဲဂှ် စၟဳပတှ်ေကေတ်လဝ် သွက်ဂွံကၠောန်သ္ပ တၚ်တုပ်စိုတ်ပရေၚ်ကဵုကေတ် မၞုံၚုဟ်မး (၄) ဗဳလျာန်အမေရိကာန်တုဲ ပ္ဍဲပေါဲထ္ၜးပျးလက်နက်ဂှ် ဂိတုမေ စၟတ်တ္ၚဲ (၂၇)တ္ၚဲဏံ အာစိုပ်လဝ်ဒတုဲရ။

ကၟိန်ဍုၚ်မလေဝ်ယှာဂှ် ထိၚ်ဒက်ကၠုၚ်လဝ် လၟေၚ်ပြဝေဏဳ သွက်ဂွံသုၚ်စောဲစရိတ်ပရေၚ်စဵုဒၞာ ဂၠိုၚ်နူ (၁) တၟံကၠံ GDP ကၟိန်ဍုၚ်တုဲ ပ္ဍဲသၞာံဏံ သၠုၚ်ပ္တိုန်လဝ်ဗာတ်ဂျေတ်ပရေၚ်စဵုဒၞာဏံ စဵုကဵု (၁၀)တၟံကၠံရဂှ် ဂွံတီကေတ်ရ။

တၚ်ရန်တၟံ ဂွံကၠောန်ဗဒှ်ပေါဲထ္ၜးပျးဗီုလၟုဟ်ဏံဂှ် ကပေါတ်သုၚ်စောဲပၞာန်ကၟိန်ဍုၚ် မၞုံဒၟံၚ်လၟုဟ်ဂှ် အိုဟ်တြေံဒၟံၚ်တုဲ ဟိုတ်နူဟွံဂတာပ်ခေတ်ဂှ်ရ ဟိုတ်နူနွံကၠုၚ်ပၟိက် သွက်ဂွံသၠုၚ်ပတိုန် သၞောတ်ဆေၚ်စပ်ကဵု ပရေၚ်ပၞာန်ကေုာံပရေၚ်စဵုဒၞာတအ်ရဂှ် သ္ၚဳဂၠိပ်လဝ်အိုတ်ရ။

မွဲကရောံကဵု ပရေၚ်ပလေဝ်ပလေတ်ဗာတ်ဂျေတ်ဗီုလၟုဟ်ဂှ် ကၟိန်ဍုၚ်မလေဝ်ယှာ ဗ္ကန်ကေတ်လဝ် က္ၜၚ်ကျာဂျေတ်ဖိုက်တာ FA50 နူကိုဝ်ရဳယျာသၠုၚ်ကျာ (၁၈)ဖ္ဍိုက်ဂှ်လေဝ် ဂွံတီကေတ်ရ။

သ္အာၚ်နူဂှ်ပၠန် ကၟိန်ဍုၚ်အေန်ဒေါနဳယှာ၊ ဖိလေတ်ပိုၚ် ကေုာံ သေံတအ်လေဝ် ကၠောန်သ္ပလဝ် ပရေၚ်ရာန်ကေတ် နူကဵုဂကောံကမၠောန်ဗလးအာကာသ တုပ်လအာဗီုဂှ်ကီုတုဲ ကၟိန်ဍုၚ်တအ်ဂှ်လေဝ် ပ္ဍဲအခိၚ်ပရေၚ်ဍုၚ်ကွာန်ဘူမိ အလုံဂၠးကဝ် သၠုၚ်တိုန်ဒၟံၚ်ဏံ ကၠောန်သ္ပလဝ် ပရေၚ်ပလေဝ်ပလေတ် စရိတ်သုၚ်စောဲကာစဵုဒၞာရ။

Ref,CNA