ရဲဝေၚ်ၚုဟ်ဒဝ်ဠာတံဂှ် ကေတ်အာဒုဟ်ရောၚ် တိုက်သြန်ဗဟဵု လလောၚ်ပ္တိတ်

လ္ဂုၚ်၊ မေ (၂၈)

အပ္ဍဲဗွဝ်ဖျာသြန်ဍုၚ်သ္အာၚ် ရဲဝေၚ်ၚုဟ်လ္ၚဵုတံဂှ် ညံၚ်ၚုဟ်သြန်ဂွံဒှ်ကလိုက်ကၟဵု တြးပ္တိတ်ကောလဟာလ ဟွံဍာံဟွံဇေတ်တံဂှ်တုဲ ကေတ်အာဒုဟ် ကုညးကၠောန်သ္ပ ညံၚ်သြန်ဟွံဂွံညိၚ်ဝတ်တံရောၚ်ဂှ် တိုက်သြန်ဗဟဵု လလောၚ်ပ္တိတ်လဝ်ပရိုၚ် နကဵုစၟတ်တ္ၚဲ ဂိတုမေ (၂၆) တေံရ။

ကုညးတြးပရိုၚ်ဟွံဍာံဟွံဇေတ်တံဂှ် ထ္မံက်ပ္တိတ်ကေတ်အာဒုဟ် ဗွဲမကိတ်ညဳကဵု တၚ်စၞောန်ပျး မပါလုပ် ပ္ဍဲသၞောဝ်ကောပ်ကာဲဖန်ဇန်သြန်လှုဲဍုၚ်သ္အာၚ်၊ သၞောဝ်တိုက်သြန်ဗဟဵုတံဂှ်တုဲ ပရူပရာ မဆက်စပ်ကဵုဍေံတံဂှ် ပလံၚ်ဗစိုပ်အဳမေဝ်လ် တိုက်သြန်ဗဟဵုမွဲကဆံၚ်မာန်ရောၚ် သ္ဂးလဝ်ရ။

ဗွဝ်ဖျာဒမၠုက် သြန်ဍုၚ်သ္အာၚ်ဂှ် နူကဵုတိုက်သြန်ဗဟဵု လေပ်ထိၚ်ဒက်တုဲ စပ်ကဵုလလောၚ်ပ္တိတ်လဝ် သာ်ဏံတုဲ ၚုဟ်သြန်တိုန်အာ နွံမာန်ရောၚ်ဂှ် ညးစိုန်သ္ကီု ပ္ဍဲအရာသြန်လှုဲမွဲတၠ ဟီုရ။

“ဗွဝ်ဖျာ Money Charger ဒှ်ဒှ်၊ မၞိဟ်သွံရာန် သြန်ဒဝ်ဠာဒှ်ဒှ် လေပ်ထိၚ်ဒက်တဴလၟိုန်ရ။ နူကဵုအခိၚ်တေံဂှ်လေဝ် ကံက်စရၚ်ယၟု ရဲသွံဒဝ်ဠာတံဂှ်တုဲ ဍေံတံ ကော်စၟဳစၟတ်တံ နွံလဝ်ရ။ ဟိုတ်လဝ်နွံလဝ်သာ်ဏံဂှ်ရ ပ္ဍဲဗွဝ်ဖျာဒဝ်ဠာဂှ် မၞိဟ်သွံမၞိဟ်ရာန် ဝါတ်ဂါတ်အာညိညိရ။ သွံရာန် လောဲလောဲသွာသွာ ဟွံဂွံရ။ သွံရာန်ဟီုဂှ် ဟီု ပရေၚ်သွံရာန် ဗွဲမလုပ်သၞောဝ်ဂှ်ဏောၚ်။ ပ္ဍဲအကာဲအရာသာ်ဏံ အခက်အခုဲတံ နွံဒၟံၚ်ဏောၚ်။ အခိၚ်ဏံ ၚုဟ်ဖျာတံဂှ် တိုန်အာဒၟံၚ် နွံရ” သာ်ဝွံ ညးသ္ဂးရ။

ၚုဟ်သြန်ဍုၚ်သ္အာၚ် နူကဵုတိုက်သြန်ဗဟဵု မစၞောန်လဝ်ဂှ် ပြံၚ်လှာဲအာဟွံသေၚ်တုဲ ညံၚ်ဗွဝ်ဖျာဍုၚ်သ္အာၚ် ဂွံဖောအ်ဗြေဝ်တောတက်အာ ဗွဲမညိၚ်ဝတ်ဂှ်ကီု ညံၚ်ၚုဟ်လှာဲဂတးသြန်ဍုၚ်သ္အာၚ် ဂွံညိၚ်ဝတ်ကီုဂှ်တုဲ ရေၚ်တၠုၚ်ဒၟံၚ်ရောၚ် တိုက်သြန်ဗဟဵု သ္ဂးလဝ်ရ။

ပ္ဍဲကဵုဒၞါဲလှာဲသြန် တိုက်သြန်တံဂှ် သြန်စက္ခူဍုၚ်သ္အာၚ်တံဂှ် သၠုၚ်ပ္တိုန်သွံကဵုအာဏောၚ် မဒှ်တုဲ သွက် USD Liquidity ကေုာံ MMK Liquidity တံဂှ် နူကဵုတိုက်သြန်ဗဟဵုမွဲကဆံၚ် ဆက်ထံက်ပၚ်ကဵုအာဏောၚ် ကဵုလဝ်သမ္တီရ။

အခိၚ်လၟုဟ်ဂှ် ပ္ဍဲကဵုၚုဟ်နှေန်လှာဲဂတးသြန် တိုက်သြန်ဗဟဵုတံဂှ် ဒဝ်ဠာအမေရိကာန် မွဲဒဝ်ဠာဂှ် (၂၁၀၀) ဒ္ကေဝ်ဓဝ် နွံကီုလေဝ် ပ္ဍဲကဵုဗွဝ်ဖျာမ္ၚးဏံဂှ် ဂွံဒၟံၚ်ၚုဟ် အမေရိကာန်ဒဝ်ဠာ (၂၉၅၀) ဒ္ကေဝ်ရ။

ၚုဟ်လှာဲသြန် တိုက်သြန်ဗဟဵု မစၟတ်လဝ်ကဵုဂှ်ဝွံ တန်တဴဒၟံၚ် လ္တူတၚ်နွံပၟိက်သြန်ဍုၚ်သ္အာၚ်တံသၟးဟွံက ဟိုတ်နူသွာၚ်ဗၞိက်ပၠောပ် ဗၞိက်ပ္တိတ် လၟုဟ်တံ ဍိုန်လျအာဂှ်ရ ပရေၚ်သွံရာန်ဒဝ်ဠာ ယအ်စှ်ေကၠုၚ်ယျဂှ် ညးစိုန်သ္ကီုသြန်လှုဲတံ ထံက်ထ္ၜးလဝ်ရ။

“ညအ်ဂှ် ၚုဟ်လှုဲအလဵုအသဳ မစၟတ်လဝ်ဂှ်ဂးတုဲ ၜိုတ်ဍေံတံနွံပၟိက်ရ။ ယဝ်ရဍေံတံ နွံပၟိက်ကဵုဒဝ်ဠာဂၠိုၚ်မ္ဂး ၚုဟ်ဂှ် တိုန်ကၠုၚ်ညိဏောၚ်။ ကၠောန်ၜိုတ်ထိၚ်ဒဝ်လဝ်ဗီုဏံဟီုတှ်ေ ညအ်ဂှ်ဗီုဍေံတံဒးစိုတ်ရ။ ပြံၚ်လှာဲအာဟွံသေၚ်ပုဟ်ဟီုဂှ် လၟုဟ်ဟွံပြံၚ်လှာဲဏီပုဟ်၊ ဠပြံၚ်တှ်ေ ပြံၚ်အာဏောၚ် အာသာ်ဏံရ။ ပြဟ်ဟ်ဏံ ဗၞိက်ပၠောပ်ဗၞိက်ပ္တိတ်ဂှ်လေဝ် စပ်ကဵုၚုဟ်ဒဝ်ဠာတုဲ ဒးရာန်ဝါတ်ဒၟံၚ်ဏောၚ်။ လၟုဟ်ဂှ် ကသီုလေဝ်စဒၟံၚ်ယျဟီုတှ်ေ ပြဟ်ဟ်ဏံ Export Import တံဂှ် ဇြဟတ်ဍိုန်အာယျ၊ ဟွံမွဲစကွေံကွေံရပုဟ်။ ဟိုတ်ဂှ်ရ ပရေၚ်ရာန်ဒဝ်ဠာဂှ်လေဝ် ယအ်စှ်ေကၠုၚ်ညိညိယျ။ ယဝ်ရတော်ကဵုကၠာတေံမ္ဂး ဒှ် Issue ဒးရံၚ် နူကဵု Export Import ဏောၚ်” သာ်ဝွံ ညးသ္ဂးရ။

သၞာံတုဲကၠုၚ် ပ္ဍဲကဵုဂိတုနဝ်ဝေမ်ဗာတေံ ကံၚ်ဇြဳပၞာန်ဂှ် သြန်ဂွံနၚ် နူကဵုဗၞိက်ပလံၚ်ပ္တိတ် ကပေါတ်ဝါဗ္ၚဂမၠိုၚ် မပ္တံကဵု ၜဲနာနာ၊ သတ်ကၠေၚ်တိတ်၊ သြောံဂန်၊ ရဝ်ဗာ ကေုာံ ကပေါတ်တိတ်နူဍာ်တံ (၆၅) တၟံကၠံဂှ် ဒးသၠာဲ နကဵုသြန်ဒ္ကေဝ်ဗၟာ အတိုၚ်ၚုဟ်နှေန်လှာဲလှုဲ တိုက်သြန်ဗဟဵု မစၞောန်လဝ်ဂှ်ရ။

သ္အာၚ်နူဂှ်ပၠန် ပ္ဍဲဂိတုဖေဖဝ်ဝါရဳ သၞာံဏံဂှ်လေဝ် သြန်လုပ် မကလိဂွံ နူကဵုဗၞိက်ပလံၚ်ပ္တိုန် သ္ၚု ကေုာံ ဗၞိက်တိတ်နူသ္ၚုဂမၠိုၚ်တံ (၆၅) တၟံကၠံဂှ် ကဵုလှာဲလဝ် သြန်ဒ္ကေဝ်ဗၟာ အတိုၚ်နှေန်လှာဲသြန် တိုက်သြန်ဗဟဵုတံဂှ် နွံတုဲ အခိၚ်လၟုဟ် ကၠောန်ကၠုၚ် သွက်ဂွံထိၚ်ဒက် ကမၠောန်ဗၞိက်ပလံၚ်ပ္တိတ်တံအိုဿီုရောၚ်ဂှ် တၠကမၠောန်တံ ပါ်ပါဲလဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်-Google