ဟိုတ်နူပရေၚ်ဂစိုတ်ဂယိုၚ် နကဵုဂအုံဗွဝ် ကံၚ်ဇြဳပၞာန်တံတုဲ ညးဍုၚ်ကွာန် ဗ္ဒါဲ (၁၆၀၀) ချိုတ်အာ

မတ်မလီု၊ မေ (၂၈)

ပရေၚ်ဂစိုတ်ဂယိုၚ် နဂအုံဗွဝ် မချိုတ်အာလဝ် ဟွံအောန်နူကဵု (၅) တၠ နူကဵုကံၚ်ဇြဳပၞာန်သီအဝဵု မကလိလောန်လဝ်ဂှ် (၁၄၇) ဝါ နွံလဝ်တုဲ ဟိုတ်နူလၟေၚ်ဒဒှ်တံဏံတုဲ မၞိဟ် (၁၅၉၂) တၠ ဒးချိုတ်အာလဝ်ရောၚ် ဂကောံသုတေသန ဉာဏ်လေန်တေတ် လလောၚ်ပ္တိတ်လဝ်ပရိုၚ်ရ။

အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံပြၚ်ဏံ ညးဍုၚ်ကွာန်တံ ဒးဒုၚ်ဂစိုတ်လဝ် နဂအုံဗွဝ်တုဲ လၟေၚ်ဒဒှ်ဏံ ဗွဲမဂၠိုၚ်ဂှ်ဝွံ က္တဵုဒှ်အာလဝ် ပ္ဍဲကဵုဝက်လက်၊ ယေန်မာပေန်၊ ကလေဝ်၊ ဖာက၊ ကဗလူ ကေုာံ ဗဂေါတံရ။

ပ္ဍဲကဵုလၟေၚ်ဒဒှ် ဒးဒုၚ်ဂစိုတ်နဂအုံဗွဝ်တံဂှ် ဒၟါနူဟိုတ် ဗ္တိုက်ကဵုတရဴကျာ၊ ဒးဒုၚ်ပန်ပှော်ကဵုလွဟ်ဇၞော် ကေုာံ ထ္ပက်ပၞာန် ကုညးဍုၚ်ကွာန်တံတုဲ စံၚ်ယတ်ဂစိုတ်ဂယိုၚ် နဂအုံဗွဝ်တံဂှ်တုဲ ဒှ်အာလဝ်ဏောၚ်ဂှ် ဂွံတီကေတ်ရ။

လၟေၚ်ဒဒှ်ဂစိုတ်ဂယိုၚ်နဂအုံဗွဝ် ကံၚ်ဇြဳပၞာန် အပံၚ်ဖအိုတ် (၃၂) တၟံကၠံဂှ် ထောံမခတိုဟ် နကဵုတရဴကျာ ကေုာံ ပန်ပှော်လွဟ်ဇၞော်တံတုဲ ဒှ်လဝ်ဏောၚ်ဂှ် ဂွံတီကေတ်ရ။

ဒပ်ပၞာန်ဗၟာဝွံ သွက်ဂွံတြးဒပ် ကေုာံ သွက်ဂွံဗ္တိုက်တရဴကျာတံဂှ်တုဲ သုၚ်စောဲ က္ၜၚ်ကျာသၞေၚ်ဝဲတံတုဲ ဂြာတ်ကၠုၚ်မခတိုဟ်ဂှ်ကီု၊ သုၚ်စောဲက္ၜၚ်ကျာဂျက်ဖိုက်တာတံဂှ်တုဲ ပရေၚ်ဂစိုတ်ဂယိုၚ် နဂအုံဗွဝ်ဂှ် (၂၇) ဝါနွံလဝ်တုဲ ညးဍုၚ်ကွာန် (၅၀၈) တၠ ချိုတ်အာလဝ်ရောၚ် ဂကောံသုတေသန ဉာဏ်လေန်တေတ် ထ္မံက်ထ္ၜးလဝ်ရ။

လိက်စံၚ် ဂကောံပၞာန် မကလိလောန်လဝ် ပရေၚ်ဂစိုတ်ဂယိုၚ် နဂအုံဗွဝ် နူကဵုဂကောံသုတေသန ဉာဏ်လေန်တေတ် မချူခၞံလဝ်ဂှ် ပံက်ဗှ်ကေတ် နကဵုဘာသာဗၟာ- bit.ly/3IIXOJk၊ နကဵုဘာသာအေန်ဂဠိက် bit.ly/3BWNbil တံမာန်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−NLTA