ညံၚ် CDM ထပ်ဂွိုအ်မွဲ အပ္ဍဲဒပ်ကံၚ်ဇြဳပၞာန်တံ သၠုၚ်ပ္တိုန်လဝ် အရာကၟာတ်လဒဵုတံ နွံကၠုၚ်

မတ်မလီု၊ မေ (၂၈)

ကောန်ဒပ်ကံၚ်ဇြဳပၞာန်တံ လုပ်စိုပ်သ္ပကၠုၚ် ဇြဳဒဳအာမ် ဂၠိုၚ်ကၠုၚ်ဗက် အပ္ဍဲဒပ်ကံၚ်ဇြဳပၞာန်ဂှ် သာတုဲကၠောန်သ္ပကၠုၚ် ပရေၚ်ဍဵုဍိုက်ကၟာတ်လဒဵုတံရောၚ်ဂှ် ရနူကဵုဗွိုၚ် CDM တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကံၚ်ဇြဳပၞာန်ဝွံ အပ္ဍဲအခိၚ်အတးတေံ ဟိုတ်နူကၠောန်သ္ပလဝ် သ္ဘၚ်မိပ်အပ္ဍဲဒပ်တံကီု သီုကဵုဖအောန်ဖျေံလဝ် အပိုၚ်အခြာဂမၠိုၚ်ဂှ်ရ ပ္ဍဲဂိတုဨပရဴ လ္ပာ်အိုတ်ဏံ နူကဵုဒပ်ကံၚ်ဇြဳပၞာန်ဂှ် မၞိဟ်ကၠောန်သ္ပကၠုၚ် CDM တံ သာဂၠိုၚ်ကၠုၚ်လဝ်ရ။

အခိၚ်လၟုဟ်ဂှ် ကံၚ်ဇြဳပၞာန်ဝွံ သွက်ဂွံထိၚ်ဒက် ဒမြိပ်ကောန်ဒပ်ဂြိပ်တံဂှ်ကဵု ဒမြိပ်သ္ပဇြဳဒဳအာမ်တံမာန်ဂှ်တုဲ အပ္ဍဲကဵုဒပ်ဂှ် မ္ၚးနူသီဂိုၚ်လဝ် တၞးကာဒ်ကောန်ဍုၚ်တံကဵု စရၚ်ဂြောဝ်ဂတာတံဂှ် နူကဵုအပ္ဍဲဒပ် ညံၚ်ဂွိုအ်တိတ်မ္ဂးတံဂှ်လေဝ် ကၠောန်သ္ပသၞောတ်ဗ္ၜတ်ကၠုၚ်ဂှ် ညးမၚ်လ္ၚတ်အပ္ဍဲဒပ်မွဲတၠ ဟီုရ။

“တၞးကာဒ်ကောန်ဍုၚ်တံ၊ စရၚ်ဂြောဝ်ဂတာတံဂှ် သီလဝ်ရ။ လ္ၚဵုတံဂှ် နကဵုတၚ်ထ္ၜးဟိုတ်ပရေၚ်ဂီုကၠီုဂှ် အပ္ဍဲကဵုဒပ်ဂှ်ရ စကာကဵုပြံၚ်လဝ် စရၚ်ဂြောဝ်ဂတာတံ၊ တၞးကာဒ်ကောန်ဍုၚ်တံဂှ် နွံရ။ နကဵုဟိုတ် ပေါဲရုဲမာဲဂှ် ကဵုပြံၚ်လဝ်တုဲ အရာတံဏံအိုဿီုဂှ် နူကဵုဒပ်တံ သီလဝ်ရ။ ညအ်ဂှ် မဂၞန်မွဲ။ မဂၞန်ၜါဂှ်တှ်ေ ညးလဵုမွဲမှ ဟွံကဵုအခေါၚ်တိတ်မ္ၚး အာကၠုၚ်တံရပုဟ်။ အလဵုသၞာဲဒဴတံရဂှ် အခိၚ်အာမ္ၚးမ္ဂး ညးမွဲဓဝ်ဂှ် ဟွံကဵုအခေါၚ်အာရပုဟ်။ ၜါ ဟွံသေၚ် ပိတၠမှ ကဵုအခေါၚ်အာ ဗီုဏံရဏောၚ်။ အခိၚ်အာဂှ်လေဝ် ဟွံကဵုပရိုၚ် ကုမၞိဟ်ဇၞော်ဇၞော်မ္ဂး ဟွံကဵုအခေါၚ်ပုဟ်။ အတိုၚ်ဂလာန် ညးမစိုပ်ကၠုၚ်ဇရေၚ်ပိုယ်တံ ဟီုဂှ်မ္ဂး ဆေၚ်ဖျာသြၚ်ဂၠံၚ်လ္ပာ်တေံရဂှ် ယဝ်ရကောန်သ္ဂံၚ်ဓမ္မတာတံရမ္ဂး ဆေၚ်ဖျာဂတမုက်ဒပ်ဂှ်ရဂှ် ဟွံကဵုအခေါၚ်အာပုဟ်။ ၜိုတ်သၞာဲဒဴမၞုံကဵုကဆံၚ်တံသၟးရ ကဵုလဝ်အခေါၚ်အာ၊ ပတေၚ်ဂြတ်လဝ် ဒဵုကဵုကဆံၚ်ဏံရ” သာ်ဝွံ သ္ဂးရ။

သ္အာၚ်နူဂှ်ပၠန် ကံၚ်ဇြဳပၞာန်ဝွံ ကၠောန်ၜိုတ်ကၠုၚ်ဒၟံၚ် ကုကောန်ဒပ်လ္ၚဵုတံ စဵုကဵုဟွံပ္တိတ်ကဵုသြန်ဂိတုတံဂှ်တုဲ ကုသ္ၚိကၟိန်ကောန်ဒပ်တံဂှ်လေဝ် သုၚ်စောဲနဲကဲနာနာသာ်တုဲ ဍဵုဍိုက်ကၟာတ်လဒဵုတံ ကၠောန်ၜိုတ်ဒၟံၚ်ရောၚ် ညးဟီုဂးလဝ်ဏီရ။

ကံၚ်ဇြဳပၞာန် ၜိုန်ရကၠောန်ၜိုတ်ဒၟံၚ် ပရေၚ်ဍဵုဍိုက်အပ္ဍဲဒပ်တံဂှ်ကီုလေဝ် မၞိဟ်ဆက်စၠောံကၠုၚ် နူကဵုဒပ်ကံၚ်ဇြဳပၞာန်တံ သွက်ဂွံသ္ပဇြဳဒဳအာမ်ဂှ်ကဵု မၞိဟ်သ္ပကၠုၚ်ဇြဳဒဳအာမ်တံဂှ် သာတုဲဂၠိုၚ်ကၠုၚ်ရောၚ် ဂွံတီကေတ်ရ။

အခိၚ်လၟုဟ်ဂှ် ကုညးမတိတ်ကၠုၚ် နူကဵုဒပ်ကံၚ်ဇြဳပၞာန်တံဂှ် ဂကောံပျဳတုပါန်တိုၚ်၊ ဂကောံပျဳတုယေန်ခွေန်၊ ဂကောံပျဳတုတာကံၚ် ကေုာံ ဂကောမေမေယေန်ခွေန်တံသၟးဟွံက နူကဵုဂကောံအပ္ဍဲဒေသဂမၠိုၚ်လေဝ် ကေတ်တာလျိုၚ် ဒုၚ်ဒၟံၚ်တဲအိုတ်ရ။

ကြဴနူအတးတုဲ အပ္ဍဲပွိုၚ်မွဲဂိတု မၞိဟ်မလုပ်စိုပ်ကၠုၚ် CDM အပ္ဍဲဂကောံမေမေယေန်ခွေန်သၟးဂှ် လ္တူ (၁၂) တၠ နွံတုဲ မၞိဟ်မဂြိပ်ဒဴပါဲဒလေတ်ဒၟံၚ် နဒဒှ်ရဲဂြိပ်ပၞာန်ဂှ်လေဝ် နွံဒၟံၚ်တုဲ မၞိဟ်စ္ၜုဲစ္ၜော်ဒၟံၚ် အပ္ဍဲတိဍာ်ဗၠးၜးတံဂှ်လေဝ် နွံဒၟံၚ်ရောၚ် ဂွံတီကေတ် နူကဵုတၚ်နၚ် ဂကောံမေမေယေန်ခွေန်တံဂှ်ရ။

ဒပ်ကျာကံၚ်ဇြဳပၞာန် မဗ္တိုက်ဒၟံၚ် စဵုကဵုညးဍုၚ်ကွာန်တံ ဒးချိုတ်နဂအုံဗွဝ်ဂှ် ပ္ဍဲအခိၚ်လၟုဟ် မၞိဟ်လုပ်စိုပ်ကၠုၚ် CDM ဒှ်ဒၟံၚ်အောန်အိုတ်ရောၚ် အကြာပ်ဒပ် CDM ထိတ်နာၚ်အံၚ် နူကဵုဒပ်ကျာ မပံၚ်တောဲလဝ်ကဵု ညးဍုၚ်ကွာန်တံ ဟီုလဝ်ရ။

“ပ္ဍဲကဵုဒပ်ကျာပိုယ်တံဂှ် နွံဒၟံၚ်ပိသွာၚ်ဏောၚ်။ သွာၚ်အုပ်ဓုပ်၊ သွာၚ်ကွတ်စက်ကွတ်တဲ၊ သွာၚ်ပဝ်ယာန်တံ မဒှ်ရ။ ပ္ဍဲကဵုဏံမှ တိတ်ကၠုၚ်မာန်ဂှ်တှ်ေ ဒပ်နူကဵုသွာၚ်အုပ်ဓုပ်တံရ နွံဏောၚ်။ ဒပ်ကွတ်စက်ကွတ်တဲ မၞုံကဵုကဆံၚ်ပညာတံ၊ ရဲနူကဵုသွာၚ်ပရေၚ်ပဝ်ယာန်တံဂှ်တှ်ေ တီတီရဂှ် ဟိုတ်နူဒတုဲဖဵုဇကုတုဲ ဟွံတိတ်ကၠုၚ်ပုဟ်။ မၞိဟ်နူကဵုဂကောံအုပ်ဓုပ်တံဂှ်တှ်ေ ကဆံၚ်ပညာ အောန်ဒၟံၚ်ဏောၚ်။ ပွမသ္ၚဳဂၠိပ်စၚ်ခြၚ်တံဂှ် ဍိုန်လျဒၟံၚ်ဏောၚ်။ တုဲပၠန် ဍေံတံဒးဒုၚ်အုပ်ဓလီုလဝ် ဝါဒဂမၠိုၚ်ဏောၚ်။ ပရိုၚ်နူကဵုလ္ပာ်ဏံ ယဝ်ရစိုပ်အာလ္ပာ်တေံ ဗွဲမစိုပ်တရဴမ္ဂး ရဲနူကဵုလ္ပာ်သွာၚ်အုပ်ဓုပ်တံ တီအာတုဲ တိတ်ကၠုၚ်မာန်ဒၟံၚ်ဏောၚ်” သာ်ဝွံ ဟီုရ။

ဟိုတ်နူပေါဲဗ္တိုက် မက္တဵုဒှ်ဒၟံၚ်လၟေၚ်ဒဒှ်တ္ၚဲတံ ကေုာံ ပရေၚ်ဗ္တိုက် ဂကောံဇြဟတ်ပၠန်ဂတးလ္တူဍုၚ် အလုံမွဲဍုၚ်တံဂှ်တုဲ အရိုဟ်ဒဒှ်တ္ၚဲ ကောန်ဒပ်ကံၚ်ဇြဳပၞာန် မ္ဒးချိုတ်အာဒၟံၚ်တံ နွံဒၟံၚ်တုဲ ကောန်ဒပ်ဂြိပ်တိတ်ဒၟံၚ် မၞိဟ်ဟွံတီတံဂှ်လေဝ် နွံဒၟံၚ်ရ။

ဒပ်ကံၚ်ဇြဳပၞာန်ဝွံ ဟိုတ်နူအကာဲအရာသာ်ဏံတုဲ ကၠောန်သ္ပဒၟံၚ် ပရေၚ်ဍဵုဍိုက်အပ္ဍဲဒပ်တံဂှ်တုဲ ဇြဟတ်အပ္ဍဲဒပ် အောန်စှ်ေကၠုၚ်ဗက် စိုတ်ဓာတ်လီုလာ်တံလေဝ် နွံဒၟံၚ်ရောၚ် နူကဵုဗွိုၚ် CDM တံ သ္ၚဳဂၠိပ်လဝ်အိုတ်ရ။

အလဵုအသဳညဳသၟဟ်ဂကူ NUG ဂှ် ထောံလသာဒပ်ကံၚ်ဇြဳပၞာန်တုဲ ညးမလုပ်စိုပ်ကၠုၚ် CDM တံဂှ် ဖျေံအာလာပ်ဗဇဴ ဗွဲမထေက်တန်ရောၚ် ဟီုဂးလဝ်နွံတုဲ အပ္ဍဲသီအဝဵု ပွိုၚ်ၜါသၞာံဏံ ကောန်ပၞာန်၊ ဗၠာဲသၟိၚ် CDM မပံင်တောဲလဝ် ကုညးဍုၚ်ကွာန်တံ အပံၚ်ဖအိုတ် စဵုကဵုပွဳပွူ ၜါဠက်ပြၚ် နွံကၠုၚ်ရောၚ် လလောၚ်ပ္တိတ်လဝ်ရ။

CDM မပံၚ်တောဲလဝ်ကဵု ညးဍုၚ်ကွာန်တံ နွံဒၟံၚ်ကီုလေဝ် ဟိုတ်နူလၟေၚ်ဒဒှ် ကလေၚ်လုပ်စိုပ်အာ ပ္ဍဲဒပ်ကံၚ်ဇြဳပၞာန်တံ နွံဒၟံၚ်ဂှ်ရ လက္ကရဴဏံ ကၠောန်ၜိုတ်စၟဳစၟတ်အဆံၚ်ၚ်တုဲ ဒုၚ်တဲတံ နွံဂှ် NUG သ္ဂးလဝ်တုဲ ပရေၚ်လုပ်စိုပ် CDM ဂှ် အခိၚ်လဵုကၟာတ်အာဏောၚ်ဟီုဂှ် ဟီုဂးလဝ် ချိုတ်တ်ပၠိုတ်တ် ဟွံမွဲရ။

ပရိုၚ်−သြၚ်လောန်တိုၚ်(မ်)

ဗီုဓာတ်−NUG