မတ်မလီု၊ ဂျောန်(၁)
တွဵုရးဍုၚ်မန် ပွိုၚ်ဍုၚ်မတ်မလီု ပ္ဍဲသလာတ်ဝါ ကွာန်ဘာထဝ် ဂိတုမေ စၟတ်တ္ၚဲ (၃၁) အခိၚ်နူဂယးဂှ် ကလေၚ်ညာတ်ကေတ် ဇွကောန်ကဵုအပါၜါ ဒးဒုၚ်ဂစိုတ်လဝ်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကောန်ကဵုအပါ ညးၜါ ဒးဒုၚ်ဂစိုတ်လဝ်ဂှ် ဒှ်ဥူမျေတ် အာယုက် (၇၀) သၞာံကေုာံ ကောန်ညး ဥူအုံဟာန် အာယုက် (၄၀) သၞာံရဂှ် ဂွံတီကေတ်ရ။
ညးတအ်ညးၜါဂှ် ပ္ဍဲဂိတုမေ စၟတ်တ္ၚဲ (၃၀) အခိၚ်ဇိုၚ်သဝ်တ္ၚဲ ဟိုတ်နူဟွံကလေၚ်စဴကၠုၚ်သ္ၚိတုဲ အခိၚ်ဂကောံသ္ၚိကၟိန်ညးတအ် ကေုာံ ညးကြပ်ညန်တအ် ဗက်ဂၠာဲဂှ် ဂွံဆဵုညာတ်ကေတ် သီုမချိုတ်ဒၟံၚ်ရ။
ဃောဂွံက္လေၚ်ဆဵုကေတ် မချိုတ်ဒၟံၚ်ဂှ် နကဵုဘဲဝပ် ပ္ဍဲညးမဒှ်အပါ လ္တူမတ်ပုၚ် ဒကးဒၟံၚ်ဗ္ဒာဲပိၝောံတဲမွဲဒၞာဲ၊ လ္တူမုက်ပါဲ ဘဲဒဏ်စာ်ထောၚ်ဒၟံၚ်မွဲဒၞာဲ၊ ပ္ဍဲက္ဍိုပ်လ္ပာ်ပါဲ ဘဲဝပ်ထောၚ်ကၠိုဟ်ဒစေၚ်လုပ်လဝ် ဒးချိုတ်ဒၟံၚ်ရ။
ပ္ဍဲညးမဒှ်ကောန်ဥူအုံဟာန်ဂှ်လေဝ် နကဵုဘဲဝပ် ဂၞာဍဟ်ထ္ၜမိထောၚ်ကၠိုဟ်မွဲဒၞာဲ၊ ဘဲဝပ်ကၞေၚ်ပ္ဍူ တာဲဒၟံၚ်မွဲဒၞာဲကီု သီုကဵုဘဲဝပ်စာ်ထောၚ်ဒၟံၚ် သၟဝ်မတ်ပါဲမွဲဒၞာဲ ဒးချိုတ်လဝ်ရ။
အတိုၚ်ညးဒေသတအ်ဟီုသ္ဂးလဝ်မ္ဂး ကောန်ကဵုအပါညးၜါဏံ နူအရေဝ်ဂၠိုၚ်ကဵု ညးသုၚ်ဒၟံၚ် အရက်မွဲစွံတုဲ ဒးဒုၚ်ဗာ်ဂစိုတ်လဝ်ကဵုမြ ဒှ်မာန်ရောၚ်ဂှ် ၜိုန်ရဟီုဂးကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာ ဟွံမာန်ရ။
ညးဒးဒုၚ်ဒှ်သၠေဟ်ပၟာ ဗာ်ဂစိုတ်လဝ် ကောန်ကဵုအပါၜါတအ်ဂှ် ၜိုန်ရဗၠာဲသၟိၚ်တအ် ဗက်ဂၠိုက်ဂၠာဲ ဒၟံၚ်ကီုလေဝ် စဵုကဵုလၟုဟ်ဏံ ရပ်ဟွံဂွံဏီရဂှ် ဂွံတီကေတ်ရ။
တွဵုရးဍုၚ်မန် ပ္ဍဲပွိုၚ်ဍုၚ်မတ်မလီုဂှ် ကြဴနူဒပ်ပၞာန်သီအဝဵုတုဲ ဟိုတ်နူဇြဟတ်ဂီုကၠီုသၞောဝ် ဍိုန်စှ်ေကၠုၚ်တုဲ မ္ၚးနူပၠံၚ်ကပေါတ် ပြိုက်ဂစိုတ်မၞိဟ်တုဲ ပရေၚ်ဒဒှ်ဒးဒုၚ်ဂစိုတ်လဝ်ဗွဲမဂၠိုၚ် နူလ္ပာ်ဒပ်ဗၠာဲသၟိၚ်ကံၚ်ဇြဳပၞာန် ဓမံက်ပ္တိုန်ကေတ်အရေဝ် စဵုကဵုဟၟဲ အောန်ကြဳဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ
sanlontai