ထဝါဲ – ဂျောန်(၁)
ရးဒေသတၞၚ်သြဳ၊ ပွိုၚ်ဍုၚ်ထဝါဲ အရာပ်ဘုမ္မဝ် မၞိဟ်တြုံ အာကဵုလဝ်စၞကၠဵု ပ္ဍဲဍာန်သွာၚ်သဝ်မိညော နူလ္ပာ်ကံၚ်ဇြဳပၞာန် မၚ်ဒၟံၚ်ကၚ် ပန်ဂစိုတ်လဝ် (၂)တၠဂှ် ဂိတုဂျောန် စၟတ်တ္ၚဲ (၁) တ္ၚဲဏံ စံၚ်ဇွ ဂြးဇုတ်ရောၚ်ဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပရေၚ်ဒဒှ်ဂှ် ဂိတုမေ စၟတ်တ္ၚဲ (၃၀) အခိၚ်ဗ္တံ (၉)နာဍဳတုဲဂှ် ကိုဝ်ဟုၚ်ဇြဝ်အောၚ် ဒၟံၚ်အရာပ်ဇြယျေတ် အာယုက်(၃၇) ကေုာံ ကိုဝ်အောၚ်အောၚ် သ္ကအ်ရဲညးတအ်ညးၜါ အဃောအာကဵုကွဳလိုန်ဓာတ် သွက်ဂွံကဵုစၞကၠဵုဂှ် ဒးဒုၚ်ပန်ဂစိုတ်လဝ်ရ။
ပ္ဍဲညးတြုံဒးဒုၚ်ပန်ဂစိုတ်လဝ် (၂)တၠတအ်ဂှ် ဒးချိုတ်လဝ် နကဵုဘဲဝပ် မကမ်ကၠိုဟ်ထောၚ်လုပ်ဂွံလဝ် ပ္ဍဲဇကုတုဲ ကွဳလိုန်ဓာတ်ဂှ် လ္ပာ်ကံၚ်ဇြဳပၞာန် စံၚ်ပလီုလဝ်ရဂှ် ညးဒေသမွဲတၠ ဟီုသ္ဂးလဝ်ရ။
“ဍေံတအ်ဂှ် အရိုဟ်ဟ်ဗ္တံ အာကဵုဒၟံၚ်စၞကၠဵု ဗ္ဒာဲဘာလကျာ် ကရပ်ဂၠံၚ်သဝ်မိညောဂှ် တွဵုရ။ အခိၚ်ဍေံတအ် အာ နူတၞေံတေံ အခိၚ်ဗ္တံဂှ် ဒးဒုၚ်ပန်လဝ်တုဲ ချိုတ်အာ။ ဇွဂှ် လ္ပာ်စကစကေတ်ဏာတုဲ နူဂယးဂှ် ဂကောံသ္ၚိကၟိန်ညးတအ် အာကေတ်နၚ်ဇွဂှ် နူရုၚ်ဂဥုဲရ”ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဗ္တံ ညးဍုၚ်ကွာန်ၜါတၠ ဒးဒုၚ်ပန်ဂစိုတ်လဝ်ဂှ် ပ္ဍဲအရာပ်ဘုမ္မဝ် ဂွံမိၚ်လဝ်ရမျှာၚ်လွဟ် ဗ္ဒာဲ (၁၀၀)ဝါတုဲ ရမျှာၚ်ဖံက်ခတိုဟ်လေဝ် ဂွံမိၚ်လဝ်ရဂှ် ဂွံတီကေတ်ရ။
ပ္ဍဲဂိတုမေ စၟတ်တ္ၚဲ (၂) တုဲကၠုၚ်တေံလေဝ် ဂကောံဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲလ္တူဒဵုဇဟာ ပွိုၚ်ဍုၚ် ထဝါဲဂှ် ဒၟာနူပန်ဖျေံနၚ်လွဟ်ဇၞော် ပ္ဍဲကွာန်ကဒွောန်ယှောၚ်တုဲ ကောန်ၚာ် (၃)တၠ ဒးလဝ်ဘဲဝပ်ရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai