ၜဳကလေၚ်၊ ဂျောန်(၁)
တွဵုရးဍုၚ်မန် ပွိုၚ်ဍုၚ်ၜဳကလေၚ် သၞေဟ်ကၚ်စၟဳစၟတ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲဒဒန်ပသဲ ဗ္ဒာဲကွာန် တပျေနဳဂှ် ဂကောံပံၚ်တောဲ KNLA တအ် အာစိုပ်ဗတိုက်လဝ်ရဂှ် ဥက္ကဋ္ဌကောပ်ကာဲ ကေၚ်ကာမိတ် ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုမေ စၟတ်တ္ၚဲ (၃၁) အခိၚ်နူဂယး ၜိုတ် (၆)နာဍဳဂှ် သၞေဟ်ကၚ်စၟဳစၟတ်ဒဒန်ပသဲ ကောန်ဒပ်ကံၚ်ဇြဳပၞာန် (၂၀) တၠပြၚ်ဖျေံလဝ်ဗဒိုပ်ဂှ် ဂကောံပံၚ်တောဲ ဒပ်ပၞာန်ဗၠးၜးကောန်ဂကူရေၚ် KNLA ကေုာံ ကရောၚ်ပၞာန်သူရိတအ် အာစိုပ်ဗတိုက်လဝ်ရ။
ဟိုတ်နူပရေၚ်ပန်ဗတိုက်လဝ်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ် ပွိုၚ်အကြာဗ္ဒာဲ ကဝက်နာဍဳတုဲ ပရေၚ်ဇီုကပိုက်ဒးလဝ်ဘဲဝပ်ၜါလ္ပာ် နွံလဝ်ရ။
ပ္ဍဲပရေၚ်ပန်ပှ်ောရေၚ်သ္ကအ်ၜါလ္ပာ်ဏံ လ္ပာ်ကံၚ်ဇြဳပၞာန် အောန်အိုတ် (၂)တၠ ဇီုကပိုက်ဒးလဝ်ဘဲဝပ်တုဲ လ္ပာ်ဒပ်ပံၚ်ကောံတအ်လေဝ် ဂွံလဝ်ဘဲဝပ် ဟွံဒးဒှ်ဓဝိၚ် (၂)တၠရဂှ် ဟီုသ္ဂးလဝ်ရ။
ဟိုတ်နူပရေၚ်ပရောဏံတုဲ ဂၠံၚ်ဍာန်ကွဳစက် လဂုၚ် – မတ်မလီု ပ္ဍဲလ္ပာ်ၜဳကလေၚ်ကဵု လ္ပာ်ကျာ်ထဝ်ဂှ် ကွဳစက်အာတရဴ ဂၠိုၚ်ကဵုကၠံ ဒးဒုၚ်ကၟာတ်ဆိုအ်လဝ်တုဲ အခိၚ်နူဂယး ၜိုတ် (၈)နာဍဳဂှ် ကလေၚ် အာကၠုၚ်ဒၟံၚ် အတိုၚ်ပကတိပၠန်ရဂှ် ဂွံတီကေတ်ရ။
သၞေဟ်ကၚ်ဒဒန်ပသဲၜဳကလေၚ်ဂှ် ကြဴဒပ်ပၞာန်သီအဝဵုတုဲ ဒၟာနူကောန်ဒပ်ကံၚ်ဇြဳပၞာန်တအ် ကၠုၚ်စိုပ်ဖျေံလဝ်ဗဒိုပ်ဂှ်ရ ဒပ်ပံၚ်ကောံ KNLA တအ် အာစိုပ်ဗတိုက်ဒၟံၚ် ခြာဟွံလအ်ဟွံလအ်တုဲ လ္ပာ်ကံၚ်ဇြဳပၞာန် ဒးဒုၚ်ဂိဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ/SBM
sanlontai