တၞၚ်သြဳ၊ ဂျောန်(၂)
ရးဒေသဇၞော်တၞၚ်သြဳ၊ ပွိုၚ်ဍုၚ်တၞၚ်သြဳ၊ ပ္ဍဲကွာန်လေဝ်တေတ်ကဵု မွဲဗွိုၚ်ကွာန်ဂှ် ပေါဲဗတိုက်ဟၟဲမွဲသာ် ဟိုတ်နူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် အဆက်ဟွံပိုတ်သ္ကုတ်တုဲ ညးဒေသ ၂၀၀၀ ပြၚ်တအ် ထောံသ္ၚိဌာန်တုဲ ဒးဂြိပ်ဒဴဒၟံၚ်ရဂှ် (ပကဖ)ပွိုၚ်ဍုၚ်တၞၚ်သြဳ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္ပတံနူ ဂိတုဂျောန်စၟတ်တ္ၚဲ (၁) အခိၚ်နူဂယးတုဲ နူကဵုတံဒပ်ကံၚ်ဇြဳပၞာန်ဖျေံသ္ဇိုၚ်ကွာန်ဇြဝေဝ်(ဇဝဲ) ကေုာံ ဒပ်ဖျေံလဝ်သ္ဇိုၚ် ပ္ဍဲလ္တူဒဵုကွာန်သာန်တေတ်ဂှ် ပန်ဖျေံလဝ်လွဟ်ဇၞော် ပ္ဍဲကွာန်လေဝ်တေတ်၊ ချောၚ်ဝ ကေုာံတောၚ်ဖျူ ဟွံအောန်နူ (၂၀)ဝါရ။
ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်ဂှ် ကောန်ကွာန်မွဲတၠ ဇီုကပိုက်ဒးလဝ်ဘဲဝပ်တုဲ ဟိုတ်ဂွိၚ်ကဵုဘဲလွဟ်ဇၞော်ဂှ်ရ ညးဒေသ နူကွာန်လေဝ်တေတ် ကေုာံ တောၚ်ဖျူ ၂၀၀၀ တၠတအ် ဒးဂြိပ်ဒဴပါဲဓလေတ်ဒၟံၚ် ဒၞာဲဌာန်ဗၠးဘဲရ။
ပ္ဍဲကဵုပရေၚ်ပရောပန်ဖျေံလွဟ်ဇၞော်ပ္ဍဲကွာန်ဂှ် သ္ၚိဒၟံၚ်မၞိဟ်တအ် ၜိုန်ရဇီုကပိုက်လီုလာ်လဝ်နွံကီုလေဝ် လၟိဟ်ချိုတ်တ်ပၠိုတ်တ် ဟွံဂွံတီကေတ်ဏီရဂှ် ညးတာလျိုၚ် လလောၚ်ပရိုၚ် (ပကဖ) ပွိုၚ်ဍုၚ်တၞၚ်သြဳ ဟီုသ္ဂးလဝ်ရ။
သီုပေါဲဗတိုက်ဟၟဲမွဲသာ် စပ်ကဵုဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော် ပ္ဍဲကွာန်လေဝ်တေတ်ဏံဂှ် ဆက်စပ်ဒၟံၚ်ကဵုပရေၚ် ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်တံၚ်ခတိုဟ်လဝ်မာၚ် ဒှ်မာန်ရောၚ်ဂှ် လ္ပာ်ဂကောံဇြဟတ်ပၠန်ဂတးတအ် သ္ၚဳဂၠိပ်လဝ်ရ။
ဂိတုမေ စၟတ်တ္ၚဲ(၃၁)တုဲကၠုၚ်တေံဂှ် ရေၚ်ယာဉ်ကွဳစက်ကံၚ်ဇြဳပၞာန် နူကဵုလ္ပာ်ဗိက် လုပ်ကၠုၚ်လ္ပာ်တၞၚ်သြဳဂှ် ဒးဒုၚ်တံၚ်ခတတိုဟ်လဝ်မာၚ် အကြာ ကွာန်ဇြေန်ဒေန်၊ ချောၚ်ညဳကိုဝ်၊ ရာမ်ဖိုဝ် ကေုာံ ဘာန်လမန်တအ် (၃)ဝါတုဲ ပရေၚ်ဇီုကပိုက် ဒးချိုတ်လဝ် နွံကၠုၚ်ရ။
ပ္ဍဲရးဒေသဇၞော်တၞၚ်သြဳဂှ်မ္ဂး ပ္ဍဲမွဲကာလဒပ်ပၞာန်သီအဝဵုဏံ မ္ၚးနူပေါဲဗတိုက်တုဲ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ညးဒေသဗ္ဒာဲ ၄၀,၀၀၀ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် နူညးကဵုဒၟံၚ်အရီုဗၚ် ညးပါဲဒဴဘဲပၞာန်တအ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ
sanlontai