သၞေဟ်ကၚ်စၟဳစၟတ် ဒုံသမိဒးဒုၚ်ဗတိုက်လဝ်တုဲ ပရေၚ်ဇီုကပိုက်ဒးချိုတ်လဝ်ဂၠိုၚ်ဒၟံၚ်

သဓီု၊ ဂျောန် (၂)

ပ္ဍဲကဵုပရေၚ်ပရောသၞေဟ်ကၚ်စၟဳစၟတ်ကံၚ်ဇြဳပၞာန် မၞုံလ္ပာ်တွဵုရးကရေၚ်ကဵု ပွိုၚ်ဍုၚ်သဓီု ပ္ဍဲဒဒန်ဒုံသမိ ဗ္စပ်တွဵုရးဍုၚ်မန်ကဵု တွဵုရးကရေၚ်ဂှ် မ္ၚးနူကောန်အရာပ်တအ်တုဲ ကောန်ဒပ်ကံၚ်ဇြဳပၞာန်လေဝ် ဇီုကပိုက် ဒးချိုတ်လဝ်ဗွဲမဂၠိုၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သၞေဟ်ကၚ်စၟဳစၟတ်ဒုံသမိဂှ် ပ္ဍဲဂိတုဂျောန် စၟတ်တ္ၚဲ (၁) အခိၚ်နူဂယး ၜိုတ် (၆)နာဍဳ ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA၊ PDF တအ် မ္ၚးနူလွဟ်ဇၞော်ဍောတ်တုဲ ပါံစွံလဝ်ဗုမ်ကွဳစက် လုပ်စိုပ်ဗတိုက်လဝ်ရ။

ဟိုတ်နူပရေၚ်ချဳဒရာၚ်ဏံတုဲ ပရေၚ်ပန်ပှ်ောၜါလ္ပာ် က္တဵုဒှ်လဝ် ပွိုၚ်မွဲနာဍဳကဝက်ပြၚ် ကွဳစက်အာတရဴ တအ်လေဝ် ပရေၚ်ဆိုအ်ဗ က္တဵုဒှ်လဝ် ကဵုနာဍဳရ။

ပ္ဍဲပေါဲဗတိုက်ၜါလ္ပာ်ဂှ် လ္ပာ်ကံၚ်ဇြဳပၞာန် ဒးချိုတ်လဝ်(၂)တၠတုဲ ဟွံအောန်နူ (၅)တၠ ဇီုကပိုက်ဒးလဝ် ဘဲဝပ်ကီု ကောန်အရာပ် (၂)တၠ ဒးချိုတ်လဝ်တုဲ ဒးလဝ်ဘဲဝပ် (၃)တၠရဂှ် ဂွံတီကေတ်ရ။

ပ္ဍဲပေါဲဗတိုက်ဒုံသမိဂှ် ဟိုတ်နူမကမ်လွဟ်ဇၞော်စှ်ေလဝ်တုဲ ဗ္ဒမ်ဂဥုဲကွာန်၊ ကွာန်ဒူရေန်ဇြုက်ကဵု ဒပ်ဒၞးညးဍုၚ်ကွာန်လ္ၚဵုဂှ်လေဝ် တူပၟတ် ဒးလီုလာ်အာလဝ်ရဂှ် ညးဒေသတအ်ဟီုသ္ဂးလဝ်ရ။

ဥက္ကဋ္ဌကဝ်မတဳကောပ်ကာဲကေၚ်ကာမိတ် KNU ခရိုၚ်သဓီုဂှ်မ္ဂး ပ္ဍဲပေါဲဗတိုက်ဏံ သ္ဂံၚ်လ္ပာ်ဒပ်ပံၚ် ကောံလ္ၚဵု ဇီုကပိုက်ဂွံလဝ်ဘဲဝပ်ကီု သီဂွံလဝ် လွဟ်လက်နက် နူလ္ပာ်ကံၚ်ဇြဳပၞာန်လ္ၚဵုဂှ် ၜိုန်နွံကီုလေဝ် ဆက်လလောၚ်ကဵုအာ တၚ်ဂၞၚ်သောဲသောဲဗြောဲဗြောဲပၠန်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သၞေဟ်ကၚ်စၟဳစၟတ်ဒုံသမိဂှ် ပ္ဍဲမွဲကာလဒပ်ပၞာန်သီအဝဵု ပွိုၚ်( ၂ )သၞာံပြၚ်ဏံ ၜိုန်ရဒးဒုၚ်ဗတိုက်ဒၟံၚ် ခြာဟွံလအ်ဟွံလအ်ကီုလေဝ် ပရေၚ်ဗတိုက်ပန်အလန်ဏံဂှ် လ္ပာ်ကံၚ်ဇြဳပၞာန်ဒးဂိလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-ချာန်နေဝ်တြးဝါဒကံၚ်ဇြဳပၞာန်