ထံက်ပၚ်ကဵုလဝ် ဇွောံမစၞစ သွက်မၞိဟ် (၂) ကိုတ်ပြၚ်ဂှ် WFP လလောၚ်တြး

မတ်မလီု – ဂျောန်(၂)

ဒဒှ်ရထံက်ပၚ်ကဵုလဝ် ဇွောံမစၞဟံၚ်ပြာ်လမျီု သွက်မၞိဟ်ဒးဒုၚ်လဝ် ဘဲဒဏ်လဗိုတ်ကျာ ပ္ဍဲတွဵုရးရ ခေၚ်ကေုာံ ရးဒေသဇၞော်မဂွေ အပံၚ်လၟိဟ် (၂)ကိုတ် (၃)လက်ပြၚ်ရဂှ် အစဳဇန်ဇွောံမစၞစဂၠးကဝ် (WFP) လလောၚ်တြးလဝ် ပရိုၚ်ရ။

ဟိုတ်နူလဗိုတ်ကျာလုပ်လဝ် ပ္ဍဲဂိတုမေ စၟတ်တ္ၚဲ (၁၄)တုဲကၠုၚ်တေံတုဲ ပရေၚ်လီုလာ်ဆောံ လေၚ် လဝ်တအ်ဂှ် သွက်အခိၚ်လၟုဟ်သၟးဟေၚ်ဟွံသေၚ် သီုသွက်ဍာ်ဇမၠိၚ် ဇီုကပိုက်ဒး ပရေၚ်ဇွောံမစၞစရုံ ဂပ်မာန်ဒၟံၚ်ကီု ပ္ဍဲတွဵုရးရခေၚ်ဂှ် ဒၟာနူဍာ်ဖ္ဍုၚ်လုပ်စိုပ်လဝ်တုဲ တိဗ္ၚ ကေုာံကၟာကတအ် ဒးလီုလာ် လဝ်ကီု မ္ၚးနူသြောံမတအ်တုဲ တိရစ္ဆာန်တအ်လေဝ် ဒးလီုလာ်ဆောံလေၚ်လဝ်နွံရ။

သ္အာၚ်နူပွိုၚ်ဍုၚ်ကျောက်တဝ်၊ ကျောက်ဖျူ၊ ပုဏ္ဏာကျောန်၊ ပေါက်တဝ်၊ မျေပုံ၊ မျောက်ဥူ ကေုာံယျ တေံတံၚ် ပ္ဍဲလ္ဒောဝ်တွဵုရးရခေၚ်တုဲ အထံက်ပၚ်ဇွောံမစၞစ WFP စိုပ်လဝ် ပွိုၚ်ဍုၚ်ဗူတဳတံၚ် ကေုာံမောၚ် တဝ် ပ္ဍဲသ္ကုတ်သၟဝ်ကျာ တွဵုရးရခေၚ်ရဂှ် ဂွံတီကေတ်ရ။

ပၞောဝ်ကဵုညးဒးဒုၚ်ကဵုလဝ် ဇွောံမစၞစ WFP တအ်ဂှ် ကၠာနူလဗိုတ်ကျာဟွံဂွံလုပ်စိုပ် တွဵုရးရခေၚ်ဏီ ဟိုတ်နူပဋိပက္ခရပ်လွဟ်တုဲ ဂကောံသ္ၚိကၟိန်ဒးက္တဵုဒှ်လဝ် ညးဟၟဲသ္ၚိဌာန်ကီု သ္အာၚ်နူဂှ်ပၠန် ဗဒိုပ်သၟာဒဒိုက် ပ္ဍဲသ္ကုတ်လ္ဒောဝ်တွဵုရးရခေၚ် ကေုာံ ဂကောံသ္ၚိကၟိန် ရိုဝ်ဟေန်ဂျာ နူကွာန်သ္ကုတ်သၟဝ်ကျာ တွဵုရးရခေၚ် တအ် ပါလုပ်ဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

အခိၚ်လၟုဟ်ဏံ သွက်ဂွံကဵုအာအရီုဗၚ် ကုမၞိဟ်ပရေၚ်ဗုၚ်ဂၞဴဟွံရုံဂပ် အလုံမွဲဍုၚ် လၟိဟ်မၞိဟ် (၂.၁) ပြကောဋိကိုတ်ဂှ် ဇွောံမစၞစ ကေုာံအာဟာရ စဵုကဵုသ္ကုတ်လကြဴသၞာံဏံမာန် ညံၚ်သ္ဂောံက္လိဂွံ သြန်ဒဝ်ဠာ အမေရိကာန် (၆၀)ပြကောဋိကိုတ်ဂှ် ဗက်ဂၠာဲဒၟံၚ်သြန်ဗွဝ်တုဲ ယဝ်ဟွံက္လိဂွံသြန်ဗွဝ်မ္ဂး သ္ပတံနူ ဂိတုအဝ် ဂေတ် သၞာံ ၂၀၂၃ ကၠုၚ်စိုပ်ဂတဏံတုဲ ကမၠောန်ရီုဗၚ်ဟံၚ်ပြာ်ဂမၠိုၚ် တန်ဒေါံအာမာန်ဏောၚ်ဂှ် WFP ဟီုသ္ဂးလဝ်ရ။

အတိုၚ်တၚ်ဂၞၚ်စၟတ်သမ္တီ WFP ကေုာံဂကောံမဟာမိတ်တအ် ကၠောန်သ္ပလဝ် ပရေၚ်မၚ်ရံၚ်ခါတ်အကာဲ လ္ၚတ်ဂၠိုက်ဂၠာဲလဝ်ဂှ်မ္ဂး ပ္ဍဲဒၞာဲဒးဒုၚ်လဝ်ဘဲဒဏ်လဗိုတ်ကျာဂှ် ဒှ်ဒၟံၚ်အခက်ခုဲ ဇွောံမစၞစ၊ ကၟဳဗ္ဒၚ်၊ ဍာ်သုၚ်၊ ဍာ်ရပ် ၊ ကေုာံပရေၚ်သ္အးဇ္ၚးတအ်ရဂှ် ဂွံတီကေတ်လဝ်ရ။

ပရိုၚ်-သြၚ်လောန်တို(မ်)

ဗီုရုပ် – အကာဲအရာလဗိုတ်ကျာလုပ်လဝ် တွဵုရးရခေၚ်တုဲ

Leave a Reply

Your email address will not be published. Required fields are marked *