ဒပ်ကံၚ်ဇြဳပၞာန် ရပ်ဒက်ဂစိုတ်လဝ် ကောန်အရာပ် နူပွိုၚ်ဍုၚ်မူ မွဲတၠ

မူ၊ ဂျောန် (၂)

ဒပ်ကံၚ်ဇြဳပၞာန် ရပ်ဒက်ဂစိုတ်လဝ် ညးဍုၚ်ကွာန်ကောန်အရာပ်ဒေသမွဲတၠ နူကဵုကွာန်မယာန်ဇြုၚ်လေဝ် နူကဵုပွိုၚ်ဍုၚ်မူ ဒပ်မဟာ (၃) ခရိုၚ်ခလေဝ်လွဳထူ တိဍာ်အုပ်ဓုပ်ကဝ်တူလေဝ် ဗော်သွးကောန်ဂကူ ကရေၚ် KNU ဂှ် ဌာန်ဂအုပ်ဗဟဵု KNU တံ လလောၚ်ပ္တိတ်လဝ် ပ္ဍဲဂိတုဂျောန် (၁) တေံရ။

တုဲကၠုၚ်ပ္ဍဲဂိတုမေ (၂၉) တေံ သဝ်ဗိုဝ်နေထူ အာယုက် (၃၁) မဒှ်ကောန်ကွာန်မယာန်ဇြုၚ်လေဝ် မတိတ်ကၠုၚ် သွက်ဂွံစှ်ေဝါဂှ် ဒပ်ကံၚ်ဇြဳပၞာန် ကၟာတ်မုက်မတ်နကဵုယာတ်တံတုဲ ရပ်ဒက်ဏာလဝ်ရ။

ကြဴနူဂှ်တုဲ ဒပ်ကံၚ်ဇြဳပၞာန်ဝွံ ကၠောန်သ္ပၜုၚ်တက်ပျဲပျာံလဝ် သဝ်ဗိုဝ်နေထူ မရပ်ဒက်ဏာဂှ်တုဲ ပ္ဍဲဂိတုမေ (၃၀) ဂှ် ဂစိုတ်ထောံလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲဂိတုမေ (၃၀) ဂှ်လေဝ် နူကဵုဒပ်အမၠံက်ကံၚ်ဇြဳပၞာန် ဖျေံသ္ဇိုၚ်သုက်ကျဳဂှ် ဟိုတ်နူကၠုၚ်စိုပ်ပန်ပှော်လဝ် နကဵုလွဟ်ဇၞော် ကေုာံ ဒရုၚ် (၃) မဂှ်ရ ဒးအာလဝ် ကျာ်စေတဳ မၞုံကွာန်( ရွာကြီးအၚ်း) ဂှ်တုဲ လီုလာ်အာလဝ်ရောၚ် သ္ဂးရ။

ပ္ဍဲကဵုတ္ၚဲဂှ်ရ ဒပ်ကံၚ်ဇြဳပၞာန်ဝွံ ပ္ဍဲကဵုဂၠံၚ်ပန်သွာၚ် နာတ်တာန်ကွေန်−ယျေတွေန်ကုန်ဂှ် ရပ်ဒက်ညးဒေသ အာကၠုၚ်တံတုဲ ကော်ဏာလဝ် သွက်ဂွံပလေဝ်တိုၚ်ပၟတ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲတိဍာ်အုပ်ဓုပ် KNU ဂှ် အပ္ဍဲကာလဒပ်ပၞာန်သီအဝဵုဏံ ကောန်အရာပ်ဟွံအောန်နူကဵု (၅၀၀) တၠ ဒးဒုၚ်ဂစိုတ်လဝ်ရောၚ် ဂွံတီကေတ် အတိုၚ်တၚ်နၚ် ဂကောံဗော်သွးကရေၚ်တံရ။

ပရိုၚ်−သြၚ်လောန်တိုၚ်(မ်)

ဗီုဓာတ်−KHRG