ကျာ်ထဝ်၊ ဂျောန် (၂)
ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲကွာန်(လှည်းလမ်းကူး) ဂှ် နူကဵုဒပ်အမၠံက်ကံၚ်ဇြဳပၞာန် ဟိုတ်နူပန် ပှော်လဝ် လွဟ်ဇၞော်တုဲ ကောန်သ္ၚိကၟိန် ဒၟံၚ်ကွာန်ဂှ် (၆) တၠ ကလိဂွံအာလဝ်ဝပ်ရောၚ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံကဵု ညးဒေသတံရ။
ဒပ်အမၠံက် လၟိဟ် (၆၀၂) သၟဝ်တဲၝောံဒပ် (၄၄) ကံၚ်ဇြဳပၞာန်ဂှ်ဝွံ တုဲကၠုၚ်ပ္ဍဲဂိတုမေ (၃၁) လဒေါဝ်တ္ၚဲ (၁၂) နာဍဳဂှ် ပေါဲဗ္တိုက်ဟွံမွဲမွဲသာ် ပန်ပှော်စုတ်လဝ် အပ္ဍဲကွာန်(လှည်းလမ်းကူး) ဂှ်ရ။

မကမ်လွဟ်ဇၞော် နူကဵုဒပ်အမၠံက်ကံၚ်ဇြဳပၞာန် မပန်ပှော်လဝ်ဂှ်ဝွံ ဒတုံဗ္တိုဟ်ထ္ကးအာလဝ် လ္တူသ္ၚိဒၟံၚ် ဥူသဝ်ထောန် ဒၟံၚ်ကွာန်(လှည်းလမ်းကူး) ဂှ်ရ။
ဟိုတ်နူဒးအာလဝ်လွဟ်ဇၞော်ဂှ်ရ ဥူသဝ်ထောန်၊ ဒဝ်ဝေန်စန္ဒာမျေတ်၊ ကိုဝ်ထောန်န်လေန် ကေုာံ ကောန်ၚာ်သၟတ်ဂမၠိုၚ် (မောၚ်)တုၚ်ပိုက်သဵုသာန်၊ (မောၚ်) မျေတ်မျာတ်လေန်၊ မယောန်ရတဳထောန်တံ ဒးအာကဝေက်မာၚ် ပ္ဍဲက္ဍိုပ်၊ တဲ ကေုာံ ဇိုၚ်တံတုဲ ကလိဂွံလဝ်ဝပ်ရ။

ကောန်သ္ၚိကၟိန် ဒးမကမ်လွဟ်ဇၞော်တုဲ မကလိဂွံဝပ်တံဂှ် နကဵုအရီုဗၚ်ဂကောံဟံၚ်ပြာ်မှာဇန်ဒေသတံဂှ် ပလံၚ်ဗစိုပ်ကဵုလဝ် ရုၚ်ဂဥုဲကျာ်ထဝ်ရ။
ပ္ဍဲပွိုၚ်ဍုၚ်ကျာ်ထဝ်ဂှ် အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံပြၚ်ဏံ ဟိုတ်နူဒပ်ကံၚ်ဇြဳပၞာန် ပန်ပှော် လွဟ်လက်နက်တံတုဲ ကောန်အရာပ်ဒေသ ဟွံအောန်နူကဵု (၂၀) တၠ ချိုတ်အာလဝ်တုဲ ဗ္ဒါဲ (၆၀) တၠ ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်နၚ် KNU တံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ

