လ္ဂုၚ်၊ ဂျောန် (၂)
ကြဴနူသီအဝဵု ကလေၚ်မွဲဝါပၠန်တုဲ နူကဵုကဏ္ဍဇြဟတ်ဓာတ်ဂှ် ကလိဂွံလဝ် ဒဝ်ဠာအမေရိကာန် ဗ္ဒါဲပန်ဗဳလျာန်ရောၚ်ဂှ် ဂကောံသုတေသန ISP-Myanmar လလောၚ်ပ္တိတ်လဝ် ပ္ဍဲဂိတုမေ (၃၁) တေံရ။
အတိုၚ်တၚ်နၚ် ISP-Myanmar တံဂှ်မ္ဂး အပ္ဍဲကာလသီအဝဵု ပွိုၚ်ၜါသၞာံပြၚ်ဏံ ၚုဟ်မးပရေၚ်ဓလိုက် တမ်ရိုဟ်ဍုၚ်သ္အာၚ် မလုပ်စိုပ်လဝ်တံ အပံၚ်ဖအိုတ် ဒဝ်ဠာအမေရိကာန် (၅ ဒဿမ ၄) ဗဳလျာန်ပြၚ် နွံလဝ်ရ။
ပ္ဍဲကဵုဏံ ၇၀ တၟံကၠံဂှ်ဝွံ လုပ်စိုပ်လဝ် ကဏ္ဍဇြဟတ်ဓာတ်တုဲ ပ္ဍဲကဵုသြန်ဍုၚ်သ္အာၚ် ဒဝ်ဠာအမေရိကာန် ဗ္ဒါဲပန်ဗဳလျာန်ဂှ် (၂ ဒဿမ ၅) ဗဳလျာန်ဂှ်ဝွံ ဒှ်ကိုန်စဳဇန်ဇြဟတ်ပၟတ်တၟး ပရေၚ်ဓလိုက်တမ်ရိုဟ် ဍုၚ်ကြုက် မကဵုလဝ်အခေါၚ် အပ္ဍဲဂိတုမေ သၞာံ ၂၀၂၁ တေံရ။

ညးချဳဒရာၚ်ပရေၚ်ဒဳမဝ်ကရေဇြဳတံဂှ် သွက်ဂွံတပ်ဒဏ်ကၟာတ်လဒဵု ကမၠောန်သၟုဟ်ဓာတ်သဘာဝ ကေုာံ ကၠေၚ်ဍေန်ဍုၚ်ဗၟာ မဒှ်ဂၠံၚ်သြန်ဍုၚ်သ္အာၚ်လုပ်တံဂှ် ဒဵုကဵုအခိၚ်လၟုဟ် ထ္ၜးဆန္ဒအာတ်မိက်ဒၟံၚ်ရ။
သီုအမေရိကာန် သီုဍုၚ်မဟာမိတ် ဍုၚ်ပလိုတ်တံ ၜိုန်ရကၠောန်သ္ပကၟာတ်လဒဵုတပ်လဝ်ဒဏ် ကုကမၠောန်ကံၚ်ဇြဳပၞာန် ကေုာံ ကမၠောန်မဆက်စပ်ကဵု တွဳဗွိုၚ်ဍေံတံဂှ်ကီုလေဝ် ဒဵုကဵုအခိၚ်လၟုဟ် ဟွံစိုပ်တရဴဏီပုဟ်ဂှ် ညးချဳဒရာၚ်ပရေၚ်ဒဳမဝ်ကရေဇြဳ ကေုာံ နူကဵုဂကောံထပိုတ်ရိုဟ် ကၞက်သြန်ဆီ ဍုက်တံ ထံက်ထ္ၜးလဝ်အိုတ်ရ။

“ကမၠောန်ကၠေၚ်ဍေန် ကေုာံ သၟုဟ်ဓာတ်သဘာဝတံဂှ် ကၟာတ်ကဵုလွာဲဂှ်ညိ၊ ကေတ်ကဵုဒုဟ် ဖျေံကဵု Sanction လွာဲဂှ်ညိ။ မွဲပၠန်ဂှ် နွံပၟိက် ဒးကၟာတ်ထောံ တိုက်သြန်ကၟိန်ဍုၚ် မဒှ်ဂၠံၚ်တရဴ မကၠောန်ကဵုဒၟံၚ် သြန်ဍုၚ်သ္အာၚ် ညံၚ်ဂွံလုပ်သၞောဝ်တံဂှ်ဏောၚ်။ တုဲပၠန် ဇၟာပ်ပ်ဍုၚ် သွက်ဂွံပံၚ်တောဲရေၚ်တၠုၚ်ကဵုဂှ် နွံပၟိက်ရ။ ဖျေံထောံ Sanction ယျဟီုမ္ဂး တိတ်ကၠုၚ်ၜိုတ်စရၚ်သၟးဟွံသေၚ်မွဲသာ် ဖျေံ Sanction တုဲလေဝ် ဟွံဒှ်ကလောန်တံ သက်သဳနွံဒၟံၚ်ဂှ်ရ ညံၚ် Sanction ဏံ ဂွံဒှ်ကလောန် လၟေၚ်ကမၠောန် မမၚ်ရံၚ်ဒၟံၚ် နူကဵုလက္ကရဴတေံ တုဲပၠန် ကုကမၠောန်မမၚ်ရံၚ်ကောပ်ကာဲဒၟံၚ်တံဂှ်လေဝ် ဆက်တုဲ ဒးကၠောန်အာတွဵုဏောၚ်” သာ်ဝွံ ညးသ္ဂးရ။
အတိုၚ်တၚ်န်ၚ် ISP-Myanmar တံဂှ်မ္ဂး ကြဴနူဒပ်ပၞာန်သီအဝဵုတုဲ ပ္ဍဲကဵုပရေၚ်ဓလိုက်တမ်ရိုဟ်ဍုၚ်သ္အာၚ် မလုပ်စိုပ်ကၠုၚ် ပ္ဍဲဍုၚ်ဗၟာတံဂှ် နူကဵုဍုၚ်ကြုက်ဂှ် ပါလုပ်ဒၟံၚ် ကဝက်ပြၚ်ၚ်တုဲ ဍုၚ်အပ္ဍဲဒေသအာဇြဳ ယာန်တံကဵု ဂျပါန်တံဂှ် ဒှ်ဒၟံၚ်ဒုတိယဂၠိုၚ်အိုတ်ရ။

ပ္ဍဲသၞာံ ၂၀၂၂ ဂိတုဂျူလာၚ်ဂှ်လေဝ် ပ္ဍဲကဵုကဏ္ဍဇြဟတ်ဓာတ်ဂှ် ဒဝ်ဠာအမေရိကာန် (၇၀၀) ပြကောဋိ ကိုဋ်ပြၚ် လုပ်စိုပ်လဝ်တုဲ နူကဵုဍုၚ်လဵု ဓလိုက်လဝ်တမ်ရိုဟ်ရောဟီုဂှ် ဟွံဂွံတီကေတ် ချိုတ်တ်ပၠိုတ်တ်ဏီပုဟ်ဂှ် ISP-Myanmar သ္ဂးရ။
ပရေၚ်ဓလိုက်တမ်ရိုဟ်ဍုၚ်သ္အာၚ် မလုပ်စိုပ်လဝ် ဍုၚ်ဗၟာတံဂှ်ဝွံ ကြဴနူဒပ်ပၞာန်သီအဝဵုတုဲဂှ် စှ်ေအာလဝ်တုဲ ကၠာဟွံဂွံသီအဝဵု ပ္ဍဲသၞာံဘဏ္ဍာ ၂၀၁၉−၂၀၂၀ တေံဂှ် ဒဝ်ဠာအမေရိကာန် ၅ ဒဿမ ၅ ဗဳလျာန်ပြၚ် နွံလဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Blood Money Campaign,ISP Myanmar

