ပ္ဍဲၜဳကလေၚ် ဟိုတ်နူလွဟ်ဇၞော်တုဲ သီုကဵုကောန်ၚာ်မွဲတၠဂှ် ညးဒေသ (၅) တၠ ကလိဂွံအာဝပ်

ၜဳကလေၚ်၊ ဂျောန် (၃)

ဟိုတ်နူဒပ်ကံၚ်ဇြဳပၞာန် ပန်ပှောန်စုတ်လဝ် လွဟ်ဇၞော် အပ္ဍဲကွာန်ယှိုဲယံၚ်ပျ၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ်တုဲ သီုကဵုကောန်ၚာ်မွဲတၠဂှ် ညးဒေသ (၅) တၠ ကလိဂွံလဝ်ဝပ်ရောၚ် ဂွံတီကေတ် နူကဵုကမ္မတဳကောပ်ကာဲကေၚ်ကာမိတ်ခရိုၚ်သဓီု KNU ရ။

ပ္ဍဲဂိတုဂျောန် (၁) အခိၚ်ဗ္တံဂှ် နူကဵုဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ကွာန်ဇြဳဝန် ပွိုၚ်ဍုၚ်ၜဳကလေၚ်ဂှ် ပေါဲဗ္တိုက်ဟွံမွဲမွဲသာ် ပန်ပှော်စုတ်လဝ် လွဟ်ဇၞော် (၂) မ အပ္ဍဲကွာန်ယှိုဲယံၚ်ပျဂှ်ရ။

မကမ်လွဟ်ဇၞော် နူကဵုဒပ်ကံၚ်ဇြဳပၞာန် မပန်ပှော်လဝ်ဂှ်ဝွံ ဟိုတ်နူဒတုံဗ္တိုဟ်ထ္ကးအာလဝ် လ္တူသ္ၚိဒၟံၚ် ဂတဘာဗ္တောန်လိက်ကွာန်ဂှ်ရ သ္ၚိဒၟံၚ်မွဲမ ဇီုကပိုက်လီုလာ်အာလဝ်တုဲ ညးဒေသ (၅) တၠ ကလိဂွံလဝ်ဝပ်ရ။

ဟိုတ်နူမကမ်လွဟ်ဇၞော်တုဲ ကောန်ၚာ်သၟတ် အာယုက် (၃) သၞာံမွဲတၠပါလုပ်ဂှ် ကောန်ၚာ် (၃) တၠ ကလိဂွံလဝ်ဝပ်တုဲ ညးဗြဴဒေသ နဝ်အေဝ် ကေုာံ နဝ်ဃဳတံလေဝ် ကလိဂွံလဝ်ဝပ် ဗီုညးကဵုညးကီုရောၚ်ဂှ် သ္ဂးတဴရ။

ပ္ဍဲကဵုညးမဒးအာလွဟ်ဇၞော် ကလိဂွံလဝ်ဝပ်တံဂှ် နဝ်အေဝ် အာယုက်မၞုံ ၅၄ သၞာံဂှ်ဝွံ ဟိုတ်နူကလိဂွံလဝ်ဝပ် သ္ကာတ်မြဟ်ဂှ်ရ ပလံၚ်ဗစိုပ်လဝ် ရုၚ်ဂဥုဲခရိုၚ်သဓီုရောၚ်ဂှ် ဂွံတီကေတ်ရ။

တုဲကၠုၚ် ပ္ဍဲဂိတုမေ (၂၇) တေံဂှ်လေဝ် နူကဵုဒပ်ကံၚ်ဇြဳပၞာန် ဟိုတ်နူပန်ပှော်လဝ်လွဟ်ဇၞော် အပ္ဍဲကွာန်အဝေန်ကျဳ ပွိုၚ်ဍုၚ်ၜဳကလေၚ်တံဂှ်ရ ဒတုံဗ္တိုဟ်ထ္ကးအာလဝ် အပ္ဍဲအရှာံဘာလကျာ်တုဲ ခမဳမွဲဇကု၊ ထပိုယ် (၂) ဇကု ကေုာံ ညးဒေသ (၂) တၠ ကလိဂွံလဝ်ဝပ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ