လှာဒကှ်၊ ဂျောန်(၃)
တွဵုရးကရေၚ်၊ လ္တူဍုၚ်လှာဒကှ်ဂှ် ပ္ဍဲဂိတုဂျောန် စၟတ်တ္ၚဲ (၂) သ္ပတံနူ အခိၚ်နူဂယးပြဟ်တုဲ အကြာဒပ် ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜကောန်ဂကူကရေၚ် KNLA ပေါဲဗတိုက်သ္ကာတ်မြဟ်ဒၟံၚ်တုဲ သီုကောန်အရာပ်တအ် ဇီုကပိုက်ဒးလဝ် နွံဒၟံၚ်ရဂှ် ဂွံတီကေတ် နူတံရိုဟ်တၚ်ဂၞၚ်ပရိုၚ်ဒေသဂှ်ရ။
ပ္ဍဲတ္ၚဲဂှ် သ္ပတံနူ အခိၚ်နူဂယးပြဟ်တုဲ ဒပ်ပံၚ်ကောံပၠန်ဂတး ဒပ်မဟာ(၆) KNU က္ဍိုက်လဝ်က္ဍိုပ်ဂှ် လုပ်စိုပ်ပန်ဗတိုက်လဝ် တံဒပ်ကံၚ်ဇြဳပၞာန်၊ ဗဒိုပ်ဗၠာဲသၟိၚ်၊ ဌာနမဆေၚ်စပ်လ္ၚဵု မၞုံလ္တူဍုၚ်လှာဒကှ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ်တုဲ ပေါဲဗတိုက်ၜါလ္ပာ် သ္ကာတ်မြဟ် က္တဵုဒှ်လဝ်ရဂှ် တမ်ရိုဟ်တၚ်ဂၞၚ်ပရိုၚ်ဂမၠိုၚ် ဟီုသ္ဂးလဝ်ရ။
ဌာန်ဂအုပ်တံဒပ်ပၞာန်တိုက်ကံၚ်ဇြဳပၞာန် ခလရ (၂၈၄) မၞုံဍုၚ်လှာဒကှ်ဂှ် ဒပ်ပံၚ်ကောံ ဒပ်ပၠန်ဂတးတအ် အာဂြာတ်ထောံဖျေံလဝ်ဗုမ် နကဵုဒရုမ်(၆)မရဂှ် ညးဒေသတအ် ဟီုသ္ဂးလဝ်ရ။
နူကဵုအခိၚ်နူဂး (၅)နာဍဳ ပေါဲဗတိုက် စက္တဵုဒှ်လဝ်ဂှ် စဵုကဵု (၇)နာဍဳ(၄၅)မိနေတ် ပေါဲဗတိုက်ၜါလ္ပာ် သ္ကာတ်မြဟ် က္တဵုဒှ်လဝ် ဗ္ဒာဲပွိုၚ် (၃)နာဍဳတုဲ လ္ပာ်ကံၚ်ဇြဳပၞာန် သုၚ်စောဲပန်ပှော်လဝ် နကဵုလွဟ်ဇၞော် ကေုာံက္ၜၚ်ကျာတုဲ ပန်ဖျေံလဝ် လ္တူဍုၚ်လှာဒကှ် ကေုာံ မွဲဗွိုၚ်ဍုၚ်ရဂှ် ညးဒေသတအ် ဟီုသ္ဂးလဝ်ရ။
ဒၟာနူကံၚ်ဇြဳပၞာန် ပန်ဖျေံလွဟ်ဇၞော်သီုကဵုဗတိုက်လဝ် နကဵုက္ၜၚ်ကျာဗီုလၟုဟ်ဏံတုဲ လေံကျာ်မွဲဇကုသီု သီုကောန်အရာပ် ဟွံအောန်နူ (၄)တၠ ဇီုကပိုက်ဒးချိုတ်လဝ်တုဲ ဘာလကျာ် ကေုာံ စမြိုၚ်သ္ၚိဒၟံၚ် တအ်လေဝ် ဇီုကပိုက်ဒးလီုလာ်လဝ်ရဂှ် ဂွံတီကေတ် နူညးဒေသတအ်ရ။
ဟိုတ်နူပေါဲဗတိုက်တုဲ ပရေၚ်ဒပ်ၜါလ္ပာ် ဇီုကပိုက်ဒးချိုတ်လဝ်တအ်ဂှ် နကဵုသြၚ်လောန်တိုၚ်(မ်) ဆက်ဂၠိုက်ဂၠာဲသၟာန်သၟုက်ဒၟံၚ်ဖိုဟ်ရ။
ပ္ဍဲလိက်ပရိုၚ်တြးဝါဒကံၚ်ဇြဳပၞာန်ဂှ်မ္ဂး ဍုၚ်လှာဒကှ်ဂှ် ဒၟာနူဒပ်ပံၚ်ကောံ KNLA ဇြဟတ် (၁၈၀)ပြၚ် လုပ်ဗတိုက်လဝ်ဂှ်ရ ပေါဲဗတိုက်ၜါလ္ပာ် သ္ကာတ်မြဟ်လဝ်တုဲ ဒပ်ပံၚ်ကောံ KNLA ဇီုကပိုက်ဒးလဝ် ဘဲဝပ် (၄)တၠ ပ္ဍဲဂှ်(၂)တၠ ဒးဒှ်ဓဝိၚ်ကဵုဘဲဝပ်ကီု၊ ဟိုတ်နူဂကောံပံၚ်ကောံတအ် ဗတိုက်လဝ်တုဲ ကောန်ၚာ်(၁)တၠ လေံကျာ်(၂)ဇကု ဒးချိုတ်ပဝ်အာလဝ်ရဂှ် ချူတြးလဝ်ရ။
ဍုၚ်လှာဒကှ် မၞုံတိဍာ်ဒပ်မဟာ (၆) KNU ဂှ် ဒှ်ဍုၚ်ကံၚ်ဇြဳပၞာန် လလောၚ်တြးလဝ် ပရေၚ်အုပ်ဓုပ် ပၞာန်မွဲဍုၚ်တုဲ ပ္ဍဲဂိတုဂျာန္နဝါရဳမံက် တုဲကၠုၚ်တေံဂှ် ဂကောံဒပ်ပံၚ်ကောံ KNLA တအ် လုပ်ဗတိုက်လဝ် ပ္ဍဲဌာန်ဂအုပ်တံဒပ်ကံၚ်ဇြဳပၞာန် မၞုံလ္တူဍုၚ်လှာဒကှ်ဂှ်ဏီရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ
sanlontai