ပ္ဍဲပေါဲဗတိုက်ဒုံသမိ လ္ပာ်ကံၚ်ဇြဳပၞာန် ပါလုပ်သီုဒုသ္ကိုပ်ဗၠာဲသၟိၚ် ဒးချိုတ်လဝ် (၈) တၠ KNU ဟီု

သဓီု၊ ဂျောန်(၃)

ပ္ဍဲပရေၚ်ဒဒှ်သၞေဟ်ကၚ်စၟဳစၟတ် မၞုံပ္ဍဲဒဒန်ဒုံသမိ ပယျဵုတွဵုရးကရေၚ် ကေုာံ တွဵုရးဍုၚ်မန် (၂)သၞေဟ် ဒးဒုၚ်ဗတိုက်လဝ်ဂှ် လ္ပာ်ကံၚ်ဇြဳပၞာန် သီုဒုသ္ကိုပ်ဗၠာဲသၟိၚ် ဒးချိုတ်လဝ် (၈)တၠရဂှ် ဥက္ကဋ္ဌကဝ်မတဳ ကောပ်ကာဲကေၚ်ကာမိတ် KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သၞေဟ်ကၚ်စၟဳစၟတ် ဗၠာဲသၟိၚ်ကဵုပၞာန်ပံၚ်တောဲ မၞုံပ္ဍဲဒဒန်ဒုံသမိ (၂)သၞေဟ်ဂှ် ပ္ဍဲဂိတုဂျောန် စၟတ်တ္ၚဲ (၁) အခိၚ်နူဂယး ၜိုတ် (၆) နာဍဳ ဒပ်ပံၚ်တောဲ ဒပ်ပၞာန်ဗၠးၜးကောန်ဂကူကရေၚ် KNLA ၊ PDF တအ် လုပ်စိုပ်ဗတိုက်လဝ် နကဵုလွဟ်ဇၞော်ဍောတ်ရ။

ပ္ဍဲပေါဲဗတိုက်ၜါလ္ပာ်ဂှ် ဒုသ္ကိုပ်ဗၠာဲသၟိၚ်သဳဟဇြဝ် နူတံဒပ်ဗၠာဲသၟိၚ်ကံၚ်ဇြဳပၞာန် (၂၂) ကီု သီုကောန်ဒပ်ဗၠာဲ သၟိၚ် (၇)တၠ ဒးချိုတ်လဝ်တုဲ လ္ပာ်ဒပ်ပၞာန်လေဝ် အကြာပ်ဒပ်မွဲတၠ ဒးချိုတ်လဝ်ကီု ညးဒးလဝ်ဘဲဝပ် ဗ္ဒာဲ (၁၀)တၠ နွံဒၟံၚ်ရဂှ် ဟီုသ္ဂးလဝ်ရ။

သ္အာၚ်နူဂှ်ပၠန် ပ္ဍဲပေါဲဗတိုက်ဂှ် သီဂွံလဝ် လွက်စက်ဍောတ်မွဲဒကိုအ် သီုလွဟ် (၅)ဒကိုအ်၊ ဖုၚ် (၂)မ၊ မကမ် AK (၃၁၀) မ၊ ဖျေဲကမ် (၈)ဖျေဲ ကေုာံကပေါတ်ဆေၚ်စပ် နူကဵုကံၚ်ဇြဳပၞာန်ရဂှ် ဂွံတီကေတ်ရ။

ပ္ဍဲပရေၚ်ပရေၚ်ဗတိုက်လဝ်ဂှ် သ္ဂံၚ်လ္ပာ်ဒပ်ပံၚ်ကောံ KNLA (၂)တၠ ဒးပြဟ်လလုဲလဝ်တုဲ ဒးလဝ်ဘဲဝပ်ဟွံဒးဒှ်ဓဝိၚ် (၁)တၠရဂှ် ဥက္ကဋ္ဌကဝ်မတဳကောပ်ကာဲကေၚ်ကာမိတ် ခရိုၚ်သဓီု KNU ဟီုသ္ဂးလဝ်ရ။

ပ္ဍဲပေါဲဗတိုက်ဒုံသမိဂှ် ကောန်အရာပ် (၂)တၠ ဒးချိုတ်လဝ်တုဲ ဒးလဝ်ဘဲဝပ် (၂)တၠကီု သီုဗ္ဒမ်ကဵုဂဥုဲ ကွာန်ဒူယျေန်ဇြုက် သ္ၚိဒၟံၚ် (၂) မ ဇီုကပိုက်ဒးလီုလာ်လဝ်ရ။

ကြဴနူပေါဲဗတိုက်ဒုံသမိဂှ် နူလ္ပာ်ကံၚ်ဇြဳပၞာန်ပတေၚ်ဂြတ်လပရေၚ်ဂီုကၠီု ဂၠံၚ်ကွဳစက် ဘာအၚ်-သဓီုတုဲ ပရေၚ်ကၟာတ်ဒၞာစၟဳစၟတ် ညးဍုၚ်ကွာန်အာကၠုၚ် အကြာဂၠံၚ်ဍာန် နွံဒၟံၚ်ရဂှ် ဂွံတီကေတ် နူညးဒေသတအ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-Non Aung

Leave a Reply

Your email address will not be published. Required fields are marked *