ပ္ဍဲထံၚ်ဗဟဵုကျာ်မြဟ်ဂှ် စၞောန်ပ္ညုၚ်ကၠုၚ် သွက်ဂွံစကာကမၠောန် ကုကောန်ထံၚ်ပရေၚ်ဍုၚ်ကွာန်ဂမၠိုၚ်

မတ်မလီု၊ ဂျောန် (၃)

ညးတာလျိုၚ် နူကဵုဌာနက္ဍိုက်ပ်ထံၚ်စာတ်ကံၚ်ဇြဳပၞာန်တံ စၞောန်ပ္ညုၚ်ကဵုကၠုၚ်အမိၚ်နကဵုပါၚ် သွက်ဂွံစကာကမၠောန်ဇြိုၚ်ၚ် ကုကောန်ထံၚ်ပရေၚ်ဍုၚ်ကွာန် မဒးဒၟံၚ်ထံၚ် နကဵုၝောံပိုဒ်ပရေၚ်ဍုၚ်ကွာန် ပ္ဍဲကဵုထံၚ်စာတ်ဗဟဵုကျာ်မြဟ်၊ တွဵုရးဍုၚ်မန်တံဂှ်ရောၚ် ညးမစုက်လုက်ကဵု ထံၚ်စာတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကံၚ်ဇြဳပၞာန်ဝွံ ကၠာတေံဂှ် မၞိဟ်ကလိလောန်လဝ်ဒုဟ်ဒဏ် နကဵုဒုဟ်တၞဟ်သ္အာၚ်တံတုဲ မဒးဒၟံၚ်ထံၚ် သီုကမၠောန်တံဂှ်ဟေၚ် စကာကၠုၚ်လဝ်ကမၠောန်တံနွံတုဲ အခါလၟုဟ်ဂှ် စၞောန်ပ္ညုၚ်ကၠုၚ် သွက်ဂွံစကာကမၠောန် သီုကဵုကောန်ထံၚ်ပရေၚ်ဍုၚ်ကွာန်တံရ။

ပ္ဍဲအရာစၞောန်ပ္ညုၚ်ကဵုအမိၚ် နကဵုပါၚ်တံဂှ် ညးမဒးဒုၚ်ဒၟံၚ်ထံၚ် နကဵုၝောံပိုဒ်ပရေၚ်ဍုၚ်ကွာန်လဵုဟွံဟီု သွက်ဂွံစကာကမၠောန်ဇြိုၚ်ၚ် အရိုဟ်တ္ၚဲဂှ်ကီု ကုညးမကယျာန်ပါဲ သွက်သ္ဂောံကၠောန်ကမၠောန်တံဂှ် သုၚ်စောဲနဲကဲနာနာတုဲ သွက်ဂွံဍဵုဍိုက်ဂှ် စကာကၠုၚ်လဝ်ရ။

ညးမဆက်စပ်ကဵု ထံၚ်စာတ်မွဲတၠဂှ် လ္ပာ်ကံၚ်ဇြဳပၞာန် ဟိုတ်နူစၞောန်ပ္ညုၚ်ကၠုၚ် သွက်ဂွံစကာကမၠောန် တံဂှ်ရ နကဵုကောန်ထံၚ်ပရေၚ်ဍုၚ်ကွာန်ဂမၠိုၚ် သာတုဲဒးဒုၚ်ဍဵုဍိုက်ကၠုၚ်ဏောၚ်ဂှ် ဟီုရ။

“ကၠာတေံဟီုမ္ဂး ပ္ဍဲထံၚ်ကျာ်မြဟ်ဏံတှ်ေ ကောန်ထံၚ်ပရေၚ်ဍုၚ်ကွာန်တံဂှ် ဟွံကဵုကၠောန်ကလောန်ပုဟ်။ ဒးကရေက်အှော် ပ္ဍဲတ္ၚဲကာတ်တ်ဂှ်ကီု၊ ဒးၜံက်ချဲ၊ ဒးတဵုကၠအ်၊ ဒးချာဲအသုဘ၊ ဒးချာဲပဿဴတံဂှ် ဂဗုတ်ဂဥုဲၜူမာဲတံ၊ ဂဗုတ်တၞဟ်ဟ်တံဏောၚ် ဒးကၠောန်။ ကောန်ထံၚ်ပရေၚ်ဍုၚ်ကွာန်တံ ဟွံဒးကၠောန်ပုဟ်။ လၟုဟ်ဂှ် စကာကဵုကၠောန် ပ္ဍဲကဵုဂကောံအှော်တံ၊ ဂကောံသဗုၚ်သ္ၚုတံ၊ ဂကောံပရန်တံဂှ်တုဲ အမိၚ်နကဵုပါၚ်ဂှ် စှ်ေကၠုၚ်ရ။ ဒးကၠောန်ကမၠောန်တံဏံမ္ဂး ပရေံမံၚ်ဏောၚ်။ မၞိဟ်မွဲမ္ဂး နူကဵု(၆) နာဍဳဂယးဂှ် ဒးရေၚ်ပၞောန်ယျဏောၚ်၊ ရေၚ်တုဲမ္ဂး စကာကမၠောန်ယျ၊ တ္ၚဲကာတ်တ် ဗြဲဂူဂူ မုဒှ်ဒှ် ကလောန်ဍေံတံဟွံသေၚ်ပုဟ်။ ဇူထောံ နူကလောန်ဂှ်ဟွံဂွံပုဟ်။ ကၠတ်ဇူ ဗက်ဍာ်သာမ္ဂး တက်ကဵုလေံ လ္ပာ်စးဏောၚ်။ စကာဏောၚ် ဟွံစကာပုဟ်ဟီုဂှ် ဟွံတီ ချိုတ်တ်ပၠိုတ်တ်ဏီပုဟ်၊ စကာဏောၚ်ဂှ် ဟီုလဝ် နကဵုပါၚ်တုဲယျ” သာ်ဝွံ သ္ဂးရ။

သ္အာၚ်နူဂှ်ပၠန် ကောန်ထံၚ်ပရေၚ်ဍုၚ်ကွာန်ဂမၠိုၚ်ဝွံ အခိၚ်လၟုဟ်ဂှ်လေဝ် ပ္ဍဲအခိၚ်လဒေါဝ်တ္ၚဲ အခိၚ်ကၟာတ်တံဂှ် အခိၚ်ဇူ၊ အခိၚ်တိက်တံ နွံကီုလေဝ် ယဝ်ရဒးကၠောန်ကမၠောန်ဇြိုၚ်ၚ်မ္ဂး အခိၚ်ဂွံဇူ၊ အခိၚ်ဂွံတိက် ဗီုကၠာတေံဂှ် နွံဟွံသေၚ်ရတုဲ ဒးကၠောန်အာကမၠောန် ကၠိုဟ်တ္ၚဲဂှ်ရ အခက်အခုဲနွံကၠုၚ်မာန်ရောၚ် ညးသ္ဂးရ။

ညးမစုက်လုက်ကဵု ထံၚ်စာတ်မွဲတၠဂှ်လေဝ် ကံၚ်ဇြဳပၞာန်ဝွံ ဟိုတ်ဟွံမွဲမွဲသာ် အရိုဟ်ဒဒှ်တ္ၚဲ ပရေၚ်ဂၠိုက်ဂၠါဲဂးတုဲ လုပ်စိုပ် ဗ္ဒမ်ကောန်ထံၚ်ပရေၚ်ဍုၚ်ကွာန်တံတုဲ ကဵုဒၟံၚ်ပလာပ်ပထုဲတံတုဲ ကၠောန်သ္ပဍဵုဍိုက်ဒၟံၚ်ရောၚ် ဟီုရ။

“ပ္ဍဲထံၚ်ကျာ်မြဟ်ဂှ် ပြဟ်ဟ်ဏံ လုပ်ဂၠါဲဒၟံၚ်အရိုဟ်တ္ၚဲဏောၚ်။ ပ္ဍဲဗ္ဒမ်ပိုယ်တံတှ်ေ ၜိုတ် (၄၀) တၠနွံဏောၚ်။ စွံလဝ် ဒၞါဲသတိက်ဇကုကဵုဇကုရ။ ဍေံတံလုပ်စိုပ်ကၠုၚ်တှ်ေ ဟရူထောံအိုတ်။ ဂၠိက်ယာတ်တံဂှ်ကၠဟ်ထောံ ဟရူထောံတုဲ မိက်ဂွံဂၠါဲဂှ် ဂၠါဲတုဲမှ ဂအုံလဝ်အတိုၚ်ဂှ်။ ဍေံတံဂၠိုက်ဂၠါဲတုဲမ္ဂး ကပေါတ်ဇကု ဇကုကလေၚ်ဂိုၚ်။ အေညအ် ကၠေံတံ၊ လီုတံဂှ် နွံဒၟံၚ်ဏီ။ မွဲသတ္တာဟမွဲဝါ ဂၠါဲတှ်ေ မွဲဗီုလေဝ်။ ဗ္ဒမ်တၞဟ်ဟ်တံဂှ် ဍေံဟွံဂၠါဲဗီုဏံပုဟ်။ ဆ္ဂး ဗ္ဒမ်ကောန်ထံၚ်ပရေၚ်ဍုၚ်ကွာန်တံဂှ် နွံ (၃)တုဲ အဏံတှ်ေ အရိုဟ်တ္ၚဲရဏောၚ်၊ ဟိုတ်ဍေံဂှ် မုဟွံသေၚ်ပုဟ်၊ မိက်ဂွံကဵုဒဒိုက်စိုတ်ရ” သာ်ဝွံ သ္ဂးရ။

အခိၚ်လၟုဟ်ဂှ် ကံၚ်ဇြဳပၞာန်ဝွံ ပ္ဍဲကဵုထံၚ်စာတ်တံဂှ် ပလေဝ်ပလေတ်ကၠုၚ် သွက်ဂွံကၠောန်သ္ပဍဵုဍိုက် ကောန်ထံၚ်ပရေၚ်ဍုၚ်ကွာန်တံ လ္တူနူကၠာတေံတုဲ ယဝ်ရအာတ်မိက် အခေါၚ်အရာထေက်ကဵု ဂွံတံဂှ်မ္ဂးလေဝ် ကၟာတ်တိုက်၊ ပြံၚ်ထံၚ်တၞဟ်သ္အာၚ်တံဂှ် ကၠောန်ၜိုတ်ဒၟံၚ်ရ။

သ္အာၚ်နူဂှ်ပၠန် ပ္ဍဲထံၚ်စာတ်တံဂှ် ဟွံကဵုလဝ် ကောန်ထံၚ်ပရေၚ်ဍုၚ်ကွာန်တံ ပရေၚ်မၚ်မွဲရံၚ်စံၚ် ပရေၚ်ထတ်ယုက် ဍိုက်က်ပေၚ်ၚ်တုဲ ဝးပ္ကဝ်အခေါၚ်အရာမၞိဟ် နကဵုနဲကဲနာနာသာ်တုဲ ၜုၚ်တက်ပျဲပျာံတံဂှ်လေဝ် ကၠောန်ဒၟံၚ်အဆက်က်ရ။

ပ္ဍဲတွဵုရးဍုၚ်မန်ဂှ် ကောန်ထံၚ်ပရေၚ်ဍုၚ်ကွာန်တံဂှ် စွံလဝ် ပ္ဍဲထံၚ်စာတ်ဗဟဵုကျာ်မြဟ်ကဵု ထံၚ်သဓီုတုဲ အခိၚ်လၟုဟ်ဂှ် ကောန်ထံၚ်ပရေၚ်ဍုၚ်ကွာန်တြုံ၊ ဗြဴ ဗ္ဒါဲ (၄၀၀) မဒးဒုၚ်ရပ်လဝ် နကဵုၝောံပိုဒ်ပရေၚ် ဍုၚ်ကွာန် နူကဵုဌာန်ဒေသနာနာ သီုကဵုလ္ဂုၚ်၊ မာန္တလေဝ်၊ ဗဂေါ၊ တွဵုရးကရေၚ် ပါလုပ်သီုကဵု တွဵုရးဍုၚ်မန်တံ နွံဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Shwe Win