NUG စဒက်ပ္တန် တိုက်သြန်ဗဟဵု ကာလအကြာ

မတ်မလီု – ဂျောန်(၃)

သွက်ဂွံပ္တဝ်ကဵုဂၠံၚ်ကမၠောန်တိုက်သြန်ကၟိန်ဍုၚ်ဗၟာ ဗွဲမစိုပ်တရဴမာန်ဂှ် ဒဒှ်ရအပ်ပြာပ်ကဵုလဝ်အဝဵု ကုဌာနဝန်ဇၞော်ကိုန်စဳမာန်၊ ပရေၚ်ဘဏ္ဍာ ကေုာံပရေၚ်ဓလိုက်တံရိုဟ် နဒဒှ်တိုက်သြန်ဗဟဵု ကာလအကြာ (Interim Central Bank)ဂှ် အလဵုအသဳပရေၚ်ညဳသၟဟ်ကောန်ဂကူ NUG လလောၚ်တြးလဝ်ရ။

ကုဌာနဝန်ဇၞော်ကိုန်စဳမာန်၊ ပရေၚ်ဘဏ္ဍာ ကေုာံပရေၚ်ဓလိုက်တံရိုဟ်၊ ဝန်ဇၞော်ကၟိန်ဍုၚ်ဂှ် နဒဒှ်ဥက္ကဋ္ဌ တိုက်သြန်ဗဟဵု ကာလအကြာ မ္ၚးနူတာလျိုၚ်ယိုက်ဂၠေၚ်ဒၟံၚ်လၟုဟ် ပ္အပ်ကဵုလဝ်တာလျိုၚ်ရဂှ် ဟီုသ္ဂးလဝ်ရ။

သ္အာၚ်နူဂှ်ပၠန် ဒက်ပ္တန်ဂကောံဒါရိုတ်တာတိုက်သြန်ဗဟဵု ကာလအကြာတုဲ ဥက္ကဋ္ဌသွက်ဂွံဖန်ဇန်ပြုပြေၚ် ကေုာံ ဂကောံတာရိုက်တာဂှ် ဒှ်ဥက္ကဋ္ဌတိုက်သြန်ဗဟဵုရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

တၚ်တိုက်သြန်ဗဟဵု ဒးကၠောန်ရေၚ်တၠုၚ်ကဵုဂမၠိုၚ်တအ်ဂှ် သွက်ဂွံဓမံက်အာရုပ်ရဴ လၟေၚ်ကမၠောန် တာလျိုၚ် ဒးရေၚ်တၠုၚ်ကဵု နဒဒှ်တိုက်သြန်ဗဟဵု ဗွဲမတုပ်သၟဟ်ကဵု တိုက်သြန်ဗဟဵုကၟိန်ဍုၚ်နာနာ ကေုာံ တိုက်သြန်ပ္ဍဲဒေသဂမၠိုၚ်ရောၚ်ဂှ် ဂွံတီကေတ်ရ။

တိုက်သြန်ဗဟဵုကံၚ်ဇြဳပၞာန်ထိၚ်ဒဝ်လဝ် အခိၚ်လၟုဟ်ဂမၠိုၚ်ဏံဂှ် ဟွံထံက်ရံၚ်ကဵု ဒတုဲမြမောဝ်ညး ဍုၚ်ကွာန် မပ္အပ်ပြာပ်လဝ်သြန် နကဵုတိုက်သြန်မွဲ ဒးဒထိၚ်ဒဝ်မၚ်မွဲဂှ်တုဲ ဒၟာနူရေၚ်တၠုၚ်ကဵုဒၟံၚ် အတိုက် ပၟိက်ဒပ်ပၞာန်ဂှ်ရ သွက်ဂွံလွဳလွတ် ပရေၚ်ညးဍုၚ်ကွာန်ဂမၠိုၚ် ဒးဒုၚ်ဂိဓဇောတ်လဝ် ဗွဲမဂတာပ်အခိၚ် မာန်ဂှ် ပ္အပ်ကဵုလဝ်တာလျိုၚ်ကု ဌာနဝန်ဇၞော်ပရေၚ်ဘဏ္ဍာ ကေုာံပရေၚ်ဓလိုက်တံရိုဟ်ရ။

ဒပ်ကံၚ်ဇြဳပၞာန်ဂှ် သြန်အရန်ဍုၚ်သ္အာၚ် ညးဍုၚ်ကွာန်ပိုၚ်ပြဳလဝ်ဂှ် သုၚ်စောဲဒၟံၚ် ပ္ဍဲအရာပြိုက်ဂစိုတ် ပ္ကီုပရာပ်ဂှ် သွက်ဂွံဆေဝ်တာ တာဒၞာ ပရေၚ်ရပ်စပ်သုၚ်စောဲဒၟံၚ် အခိၚ်ရာန်ကေတ်ကပေါတ် လွဟ်လက်နက် ကေုာံပရေၚ်ကၠောန်ပ္တိတ်လွဟ်လက်နက် မပါလုပ်သီုကၠေၚ်က္ၜၚ်ကျာရဂှ် NUG ဟီုသ္ဂးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – NUG