ဒဒှ်ရဒက်ပ္တန်လဝ် ဂကောံပရေၚ်အုပ်ဓုပ် ပ္ဍဲပွိုၚ်ဍုၚ် လၟိဟ် (၁၇၀) ပြၚ် သ္ကိုပ်ဝန်ဇၞော် NUG ဟီု

မတ်မလီု – ဂျောန် (၃)

ပ္ဍဲမွဲကာလပၠန်ဂတး ပွိုၚ်(၂)သၞာံပြၚ်ဏံ တိဍာ်ထိၚ်ဒဝ်ဂမၠိုၚ် သၠဲတြးတိုန်ကၠုၚ်ကီု ပ္ဍဲပွိုၚ်ဍုၚ် (၁၇၀)ပွိုၚ်ဍုၚ်ပြၚ်ဂှ် ဒက်ပ္တန်လဝ် ဂကောံပရေၚ်အုပ်ဓုပ်တုဲ ခါန်ကၞက်လဝ်တာလျိုၚ်သွာၚ်ဇဳ ရေၚ်တၠုၚ်ဒၟံၚ် ကဏ္ဍနာနာရဂှ် သ္ကိုပ်ဝန်ဇၞော် NUG မာန်ဝေန်ခိုၚ်တာန် ဟီုသ္ဂးလဝ်ရ။

ပ္ဍဲကောံဓရီုကဝ်မတဳဓမံက်ရုပ်ရဴ ပရေၚ်အုပ်ဓုပ်ညးဍုၚ်ကွာန် ဒေသန္တရ ကာလအကြာ၊ အလဵုအသဳပရေၚ်ညဳသၟဟ်ကောန်ဂကူ မကၠောန်ဗဒှ်လဝ် ပ္ဍဲဂိတုဂျောန် စၟတ်တ္ၚဲ (၁)တုဲကၠုၚ်ဏံဂှ် ဟီုသ္ဂးးလဝ်ရ။

“သွက်ဂွံစန်ပကောံအကာဲ အရာဍာံ ပွိုၚ်ဍုၚ်မွဲမွဲ သၞောတ်စှ်ေစှ်ေကီု သွက်ဂွံသၠာဲဂတးချပ်ဂၞန်သဳကၠဳ အကြာဌာနဝန်ဇၞော်ရေၚ်သ္ကအ်ဂှ် မိက်ဂွံဗတိုက်ဖ္အောဝ်ဏာရ။ ပ္ဍဲကောံဓရီုကဝ်မတဳဗဟဵုကဵု ပွိုၚ်ဍုၚ်တအ် ဆဵုဂဗလဝ်ဂှ် ဆၜိုတ်သဳကၠဳ လၟေၚ်ကမၠောန်ပရေၚ်အုပ်ဓုပ်၊ ပရေၚ်စဵုဒၞာ၊ ပရေၚ်သၞောဝ်ဓဝ်၊ ပရေၚ်ဗ္စာ ရဏာပရေၚ်မၞိဟ်သၟးဟွံသေၚ်တုဲ စဵုကဵုပရေၚ်သဳကၠဳ နှဲစပ်ကဵုပရေၚ်ဍုၚ်ကွာန် သဳကၠဳဒၟံၚ် ဂွံညာတ်ကေတ် လဝ်ရ” ဂှ် သ္ကိုပ်ဝန်ဇၞော်မာန်ဝေန်ခိုၚ်တာန် ဟီုသ္ဂးလဝ်ရ။

သ္အာၚ်နူဂှ်ပၠန် ပရေၚ်အလဵုအသဳခိုဟ်မွဲတန် ကၠောန်ရေၚ်တၠုၚ်ကဵုဂှ် နူကဵုက္လၚ်ကေတ်ရမျှာၚ် ညးဍုၚ်ကွာန် မွဲကဆံၚ် ဒၟာနူက္တဵုဒှ်ကၠုၚ်ဂှ်ရ ကိစ္စစပ်ကဵု အရာလဵုဒှ်ဒှ် ယဝ်ရညးဍုၚ်ကွာန် ဟွံဒုၚ်တဲမ္ဂး ညံၚ်ဟွံဂွံဓမံက် ရုပ်ရဴ ဒှ်ဟွံမာန်တုဲ နကဵုညးကေတ်လဝ်တာလျိုၚ် ရေၚ်တၠုၚ်ဒၟံၚ် ပ္ဍဲပွိုၚ်ဍုၚ်တိုက်ရိုက်တအ်ဂှ် က္လၚ်ရမျှာၚ်ညးဍုၚ်ကွာန်တုဲ သွက်ဂွံရေၚ်တၠုၚ် စဳမာန်ကဵုဗွဲမပြဟ်ဂှ် ဟီုသ္ဂးလဝ်ဏီရ။

ဒၟာနူကာလပၠန်ဂတးဂၠိၚ်သ္ၚောဲကၠုၚ်ဒၟံၚ်ဂှ်ရ အကာဲအရာညးဍုၚ်ကွာန် ထံက်ပၚ်ညးဍုၚ်ကွာန်ဂှ် ကၠိုဟ်ကေတ်လဝ် သီုညးဖအိုတ်တုဲဂှ်ရ ညံၚ်သြန်ဘဏ္ဍာဟွံဂွံဒှ်အာသၟးသၟးကီု ညံၚ်ဂွံသုၚ်စောဲအာ သၞောတ်စှ်ေစှ်ေမာန်ကီု ပၟိက်ဇၞော်ဒၟံၚ်ရဂှ် ဟီုသ္ဂးလဝ်ရ။

ဟိုတ်နူပရေၚ်ကံၚ်ဇြဳပၞာန် ဗတိုက်ပန်ပှော်လဝ်တုဲ မ္ၚးနူချိုတ်ဂျိုၚ်၊ ဇီုကပိုက်၊ ဒးဘဲဝပ်၊ ဒးဒုၚ်စံၚ်လဝ် သီုကွာန်ဂှ်တုဲ ဟိုတ်နူလဗိုတ်ကျာမိုဝ်ခါတုဲ သွက်ဂွံကလေၚ်ပြုပြေၚ်ပလေဝ်ပလေတ် တိဍာ်ဩဇာ တဵုလွဳ၊ ပြေၚ်ဂၠဴ၊ ကၟိုန်၊ မြံၚ်တြးဍာ်၊ ဂၠံၚ်ဍာန် လီုလာ်ဆောံလေၚ်အာဂှ် သွက်ဂွံစဳမာန်ရေၚ် တၠုၚ်ဖန်ဇန် ကဵုအာ ဗက်ကဵုပရေၚ်အာတ်မိက်ဗာတ်ဂျေတ်ဂှ်လေဝ် ဗတိုက်ဖ္အောဝ်လဝ်ရ။

ဆက်တုဲပၠန် ညးလုပ်ဂကောံကဝ်မတဳဓမံက်ရုပ်ရဴပရေၚ်အုပ်ဓုပ်ညးဍုက်ကွာန် ဒေသန္တရ ကာလအကြာတိုန်စိုပ်ကၠုၚ်ဂမၠိုၚ်တအ်ဂှ် စပ်ကဵုတၚ်သ္ဂုတ်သွာတ် ဖျေံလဝ် ပ္ဍဲ(၂၁/၂၃)၊ လၟေၚ်ကမၠောန်အဓာန်ဂတတုဲ သဳကၠဳလဝ် အကာဲအရလၟေၚ်ကမၠောန်အာစိုပ်ဒတုဲ ကေုာံ သွက်ဂွံဒးဆက်ရေၚ်တၠုၚ် သှ်ေသၟေဟ်ဒၟံၚ်ဂမၠိုၚ်ရဂှ် ဂွံတီကေတ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – NUG