ပ္ဍဲတၞၚ်သြဳကဵု တယျေတ်ချောၚ် ကောန်အရာပ် (၂) တၠ ဒးဒုၚ်ပြိုက်ဂစိုတ်လဝ်

တၞၚ်သြဳ၊ ဂျောန်(၃)

ရးဒေသဇၞော်တၞၚ်သြဳ ပဋိပက္ခပၞာန်ကြံၚ်မ္ၚိုဟ်ဒၟံၚ်ဂှ်၊ ပ္ဍဲပွိုၚ်ဍုၚ်တၞၚ်သြဳ ကေုာံ ပွိုၚ်ဍုၚ်တယျေတ်ချောၚ် ကောန်အရာပ်ညးဍုၚ်ကွာန် (၂)တၠ ဟိုတ်နူဒးဒုၚ်ပန်လဝ်နကဵုလွဟ်တုဲ ဒးချိုတ်လဝ်ရဂှ် ညးဒေသဂမၠိုၚ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲဂိတုဂျောန် စၟတ်တ္ၚဲ (၂) အခိၚ်သဝ်တ္ၚဲ ၜိုတ် (၃) နာဍဳဂှ် ကိုဝ်အောၚ်ကျဝ် ကောန်ကွာန်ကာန်တိုဝ် ပွိုၚ်ဍုၚ်တၞၚ်သြဳ သီုသ္ကအ်ညးမွဲတၠ ဒဳကၠုၚ်ဂၠုၚ် ပ္ဍဲကြုၚ်ကွာန်ညံၚ်ပေန်ကုမ်ဂှ် ကောန်ဒပ်ကံၚ်ဇြဳပၞာန် ပန်လဝ်ကဵုလွဟ် သီုဟိုတ်ဟၟဲမွဲသာ်ရ။

ဟိုတ်နူဒးဒုၚ်ပန်လဝ်ကဵုလွဟ်ဂှ် ကိုဝ်အောၚ်ကျဝ် ဒးလဝ်ဘဲဝပ်မကမ်တုဲ ဒတုံစှ်ေအာ ပ္ဍဲဍာ်ကီု ညးဒှ်သ္ကအ်အဖဝ်ဂှ်မ္ဂး ၜိၚ်ဍာ်ဗၠးတိတ်လဝ်ရဂှ် ဂွံတီကေတ်ရ။

ဇွကိုဝ်အောၚ်ကျဝ်ဂှ် တ္ၚဲဏံ ဂိတုဂျောန် စၟတ်တ္ၚဲ (၃) အခိၚ်နူဂယးဂှ် ကလေၚ်ဆဵုလဝ် ချိုတ်ဒၟံၚ် ပ္ဍဲကြုၚ် ကွာန်ဇြေန်ဒေန်ရ၊ ပ္ဍဲတ္ၚဲဂှ် ဗ္တံ အခိၚ် (၉) နာဍဳဂှ်လေဝ် ကွဳစက်ဖ္ဍိုက်ပညောန် နူထဝါဲ ဒဳကၠုၚ်ဍုၚ်ဗိက်ဂှ် ဟိုတ်နူဒးဒုၚ်ပန်လဝ်တုဲ သၟာဒဳကွဳစက်ဥူသာန်နဳ ဒၟံၚ်ကွာန်စန္ဒာဝေါတ် ပွိုၚ်ဍုၚ်ဗိက် ဒးလဝ်မကမ် ဒးချိုတ်အာရဂှ် ဂွံတီကေတ်ရ။

သၟာဒဳကွဳစက် ဒးဒုၚ်ပန်လဝ်တုဲ ပ္ဍဲလ္တူပရေၚ်ဒးချိုတ်လဝ်ဏံ နူဂကောံလဵု ပန်ပှော်လဝ်ရောဟီုဂှ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာဟွံမာန်ရ။

ပ္ဍဲရးဒေသဇၞော်တၞၚ်သြဳဂှ်မ္ဂး ပ္ဍဲမွဲကာလ ဒပ်ပၞာန်သီအဝဵု ပွိုၚ်(၂)သၞာံပြၚ်ဏံ ကောန်အရာပ် ဗ္ဒာဲ (၄၀၀) တၠ ဒးဒုၚ်ပြိုက်ဂစိုတ်လဝ်ရဂှ် ဂွံတီကေတ် အတိုၚ်တၚ်ဂၞၚ် ဂကောံသုတေသနဒေသဂှ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-CJ

Leave a Reply

Your email address will not be published. Required fields are marked *