ကံၚ်ဇြဳပၞာန်ကဵု ဂကောံမဟာမိတ်ကောဒေံပိဂကောံ ပေါဲသဳကၠဳလီု

မိုၚ်လာ၊ ဂျောန်(၄)

ပေါဲဆဵုဂဗသဳကၠဳ ဂကောံသဳကၠဳပရေၚ်ၜိုဟ်လလံကံၚ်ဇြဳပၞာန် (NSPNC)ကဵု ဂကောံရပ်လွဟ် ကောန်ဍုၚ် အရၚ် မဟာမိတ်ကောဒေံပိဂကောံတအ် လီုလာ်အာရဂှ် ဂွံတီကေတ် အတိုၚ်တၚ်ဓမံက် ထ္ၜးလဝ် ပ္ဍဲမဳဒဳယာဒေသဂှ်ရ။

ပ္ဍဲမွဲကာလသီအဝဵု ပွိုၚ်(၂)သၞာံပြၚ်ဏံ အတိုၚ်ကြုက်လုပ်အကြာပ္ညဳပ္ညပ်ကဵုလဝ်ဂှ် ကံၚ်ဇြဳပၞာန်ကဵု ဂကောံ ကောဒေံမဟာမိတ် ပိဂကောံတအ် သွက်ဂွံဆဵုဂဗသဳကၠဳ ပ္ဍဲဍုၚ်မိုၚ်လာ တွဵုရးဍုၚ် သေံသ္ကုတ်ဗၟံက် အလန်ပထမ နူဂိတုဂျောန် စၟတ်တ္ၚဲ (၁) စဵုကဵုစၟတ်တ္ၚဲ (၃) ဂှ် စဳဇန်လဝ်ရ။

ပ္ဍဲဂိတုဂျောန် စၟတ်တ္ၚဲ (၁) တ္ၚဲပထမဂှ် ဂကောံၜါလ္ပာ် ပ္တိုန်ထ္ၜးလဝ် ပရောပရာမိက်ဂွံသဳကၠဳရၚ်သ္ကအ်တုဲ ဂကောံမဟာမိတ်ပိဂကောံတအ် ကိစ္စစပ်ကဵုပရေၚ်ဍုၚ်ကွာန် ကံၚ်ဇြဳပၞာန်ပ္တိုန်ထ္ၜးလဝ်ဂှ် ဟွံက္လေၚ်သဳကၠဳ ရောၚ်ဂှ် ညးမၞုံအခေါၚ်ဟီုဂး ဒပ်ပၞာန် (AA) ခိုၚ်သုခ ဟီုကဵု မဳဒဳယာလ္ၚဵုဂှ်ရ။

ဆ္ဂးပ္ဍဲပရေၚ်သဳကၠဳ တ္ၚဲမရနုက်ကဵုဒုတိယဂှ် ၜိုန်ရကံၚ်ဇြဳပၞာန် မိက်ဂွံသဳကၠဳကိစ္စ ဆေၚ်စပ်ကဵုပရေၚ် ဍုၚ်ကွာန်ကီုလေဝ် ဒၟာနူလ္ပာ်ဂကောံမဟာမိတ်ပိဂကောံ ဟွံမိက်သဳကၠဳဂှ်ရ ဟိုတ်နူပရေၚ် ပ္ညဳပ္ညပ်ၜါလ္ပာ် ဟွံပြေပြံၚ်တုဲ ဒးဒေါံဇူလဝ် ပေါဲသဳကၠဳရ။

လ္ပာ်ကံၚ်ဇြဳပၞာန်ဂှ်မ္ဂး ကိစ္စပရေၚ်သဳကၠဳလဝ် ပ္ဍဲတ္ၚဲပထမ ဂိတုဂျောန် စၟတ်တ္ၚဲ (၂) ဟွံတုဲဒှ်ဏီဂှ် ဆက်သဳကၠဳပ္ညဳပ္ညပ်လဝ်တုဲ အခိၚ်ပြေပြံၚ်သီုၜါလ္ပာ်မ္ဂး ဆက်ဆဵုဂဗသဳကၠဳအာရောၚ်ဂှ် လလောၚ်တြး လဝ် ပရိုၚ်ရ။

ပ္ဍဲလ္တူဂကောံမဟာမိတ်ကောဒေံပိဂကောံ ဒေါံဇူလဝ် ပရေၚ်သဳကၠဳဂှ် နကဵုသြၚ်လောန်တိုၚ်(မ်) ၜိုန်ရ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ဒပ်ပၞာန်ရခေၚ် (AA) ကီုလေဝ် စဵုကဵုလၟုဟ်ဏံ ဟွံဂွံ ကလေၚ်ကဵုနၚ်လဝ် ပရိုၚ်ဏီရ။

ဂကောံမဟာမိတ်ကောဒေံပိဂကောံ ဒပ်ပၞာန်ရခေၚ် (AA)၊ ဒပ်ပၞာန်ဗၠးၜးကောန်ဂကူတအာၚ်(ပလံၚ်) (TNLA) ကေုာံ ဒပ်မဟာမိတ်ဒဳမဝ်ကရေတ်တေတ်ကောန်ဂကူဗၟာ ကိုဝ်က (MNDAA) တအ်ပါလုပ် ဒၟံၚ်ဂှ် ဒးဒုၚ်လလောၚ်တြးလဝ် နဒဒှ်ဂကောံဟွံလုပ်သၞောဝ်ရ။

ဟိုတ်ဂှ်ရ ပ္ဍဲပရေၚ်သဳကၠဳကဵုကံၚ်ဇြဳပၞာန်တ္ၚဲပထမဂှ် သွက်ဂွံနုက်ပ္တိတ်ကဵု နူဒဒှ်ဂကောံဟွံလုပ်သၞောဝ်ကီု သွက်ဂွံကလေၚ်ဗလးကဵု ညးဒးဒုၚ်ရပ်လဝ်ကီု သီုကဵုအရီုဗၚ်ဗ္စာရဏာပရေၚ်မၞိဟ် သ္ဂောံစိုပ် ဇရေၚ် ညးဍုၚ်ကွာန် ဒးဒုၚ်လဝ်ဘဲဒဏ်လဗိုတ်ကျာမိုဝ်ခါ ကလိတ်ကလောတ် ဗွဲမပြဟ်မာန်ဂှ် ဂကောံ ကောဒေံပိဂကောံတအ် ပ္တိုန်ထ္ၜးလဝ်ရ။

လ္ပာ်ကံၚ်ဇြဳပၞာန်ဂှ် သွက်သၞောတ်ပရေၚ်ဍုၚ်ကွာန်ဒဳမဝ်ကရေဇြဳဗော်ဇဳ ဂွံခိုၚ်ဗိုန်ကီု၊ သွက်ဂွံကလေၚ် ဒက်ပ္တန်ကၟိန်ဍုၚ် ဒုၚ်သ္ဇိုၚ်ကဵု သၞောတ်ဒဳမဝ်ကရေဇြဳဖေတ်ဒရေဝ်ကီု၊ သွက်ဂွံပံၚ်တောဲ ပ္ဍဲပရေၚ်ၜိုဟ် လလံ ကေုာံပရေၚ်ဖောအ်ဗြေဝ်တဴတက်မာန်ကီု သီုကဵုသွက်ဂွံဒက်ပ္တန်ပရေၚ်ပတှ်ေစှ်ေစိုတ် ကုဂကောံ ရပ်လွဟ်ကောန်ဍုၚ်အရၚ်တအ် သောၚ်ကလးလဝ်ရဂှ် လလောၚ်တြး လဝ်ရ။

ဂကောံမဟာမိတ်ကောဒေံပိဂကောံဂှ် ဗ္တောန်ကဵုဒၟံၚ်ကွတ်ပၞာန် ထံက်ပၚ်ကဵုဒၟံၚ်လွဟ်လက်နက်မကမ် ရီုဗၚ်ကဵုဒၟံၚ် ကုဒပ်စဵုဒၞာညးဍုၚ်ကွာန် (PDF) ဗတိုက်ဒၟံၚ်ကဵုကံၚ်ဇြဳပၞာန်ကီု ပံၚ်တောဲကဵု ဂကောံပၠန်ဂတး လ္ၚဵုတအ်တုဲ ဗတိုက်သရိုဟ်အာ သၞောတ်တၠအဝဵုပၞာန်ရောၚ်ဂှ် လလောၚ်တြးလဝ် ပ္ဍဲဂိတုဂျာန္နဝါရဳ စၟတ်တ္ၚဲ(၁)ဂှ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-MOI

Leave a Reply

Your email address will not be published. Required fields are marked *