သဵု(လ်) ၊ ဂျောန် (၄)
ပွမသ္ပဒၟံၚ်မၛ္ဇဟ် ကုပြဝဟွံဒးရးတံဂှ်ဝွံ လ္ဂောံကဵုသၞောဝ် ကိုဝ်ရဳယျာသၟဝ်ကျာမ္ဂး သ္ကဵုက္တဵုဒှ်ပွဘပဠ ကု ကုလသမဂ္ဂ မဒစဵုဒစးဒၟံၚ် အစဳဇန်နျူကလဳယျာ ကေုာံ ကမ်လှောဝ် ထိၚ်သၞေဝ်တံရောၚ်ဂှ် ဝန်ဇၞော်ကာစဵုဒၞါ ကိုဝ်ရဳယျာ သၠုၚ်ကျာ ဟီုဂးလဝ် ပ္ဍဲဂိတုဂျောန် (၃) တေံရ။
အမေရိကာန် အာတ်မိက်လဝ် ကံၚ်ဇြဳဂီုကၠီုကုလသမဂ္ဂ သွက်ဂွံဟီုဖျေံကဝု ကုအစဳဇန်ကိုဝ်ရဳယျာသၟဝ်ကျာ သ္ဂောံဗလးပ္တိုန်ဂြိုဟ်ပ္တောံ မရေၚ်တၠုၚ်ဒၟံၚ်လၟုဟ်တံဂှ်ဝွံ ကြုက် ကေုာံ ရုယှာတံ တးပါဲလဝ်ရ။ သ္အာၚ်နူဂှ်ပၠန် နူကဵုၜါဍုၚ်ဏံ ပါ်ပါဲလဝ် ကၟိန်ဍုၚ်အမေရိကာန် ဒဒှ်ရရေၚ် တၠုၚ်ဒၟံၚ် ညံၚ်ပရေၚ်ကြံၚ်မ္ၚိုဟ် လ္တူတ္ကအ်ကိုဝ်ရဳယျာ ဂွံသၠုၚ်တိုန်ရောၚ် မဒှ်ရ။
“အကာဲအရာဏံဝွံ သ္ကဵုက္တဵုဒှ်တဴ တၚ်နွံပၟိက် လ္တူပရေၚ်ကၟာတ်လဒဵုတပ်ဒဏ် ပရေၚ်ကိုဝ်ရဳယျာ သၟဝ်ကျာ မသ္ဂုတ်သွာတ်လဝ် ပ္ဍဲကံၚ်ဇြဳဂီုကၠီု ကုလတုဲတံဂှ်ရောၚ်” သာ်ဝွံ ဝန်ဇၞော်ကာစဵုဒၞါ ကိုဝ်ရဳယျာသၠုၚ်ကျာ ဟီုဂးလဝ် ပ္ဍဲ Shangri La Dialogue မဒှ်ပေါဲသဳကၠဳကဆံၚ်လ္တူ ပရေၚ်ဂီုကၠီုအာယှ မကၠောန်ဗဒှ်လဝ် ပ္ဍဲဍုၚ်သေန်ကာပေါဝ်ဂှ်ရ။

ပ္ဍဲတ္ၚဲဗုဒ္ဓဝါတုဲကၠုၚ်တေံ ကိုဝ်ရဳယျာသၟဝ်ကျာဝွံ ဗလးပ္တိုန် လဝ် ဂြိုဟ်ပ္တောံထံၚ်ပရိုၚ်တုဲ ၜိုန်ရဟွံအံၚ်ဇၞးလဝ်ကီု လေဝ် အပ္ဍဲအခိၚ်ခြာဟွံလအ်ဏံ ထပ်ဗလးပ္တိုန် ပၠန်ဏောၚ်ဂှ် ဟီုဂးလဝ်ရ။
ဝန်ဇၞော်ကာစဵုဒၞါကိုဝ်ရဳယျာသၠုၚ်ကျာ လဳဂှ် “ပွမရုဲစှ်ထောံ မံၚ်အကြာ ပ္ဍဲပြဝကိုဝ်ရဳယျာသၟဝ်ကျာ မဟွံမွဲကဵုသၞောဝ် တံဂှ်ဝွံ သ္ကဵုပရေၚ်ဂီုကၠီု တ္ကအ်ကိုဝ်ရဳယျာသၟးဟွံက သီုကဵုဒေသပသိဖေခ်တံ သာတုဲပရေံကၠုၚ်ဏောၚ်” ဂှ် ဟီုဂးလဝ်ရ။
သွက်ဂွံတာဒၞါ ကိုဝ်ရဳယျာသၟဝ်ကျာဂှ် ပရေၚ်ပံၚ်တောဲရေၚ်တၠုၚ် ကုအမေရိကာန်၊ ဂျပါန်တံလေဝ် ဒဒှ်ရပၟိက်ဇၞော်တဴဂှ် ထပ်ဟီုဂးလဝ်ရ။
အပ္ဍဲသၞာံတံဏံ စပ်ကဵုအစဳဇန်ကမ် လှောဝ်ထိၚ်သၞေဝ် ကိုဝ်ရဳယျာသၟဝ်ကျာဂှ်တုဲ သွက်ဂွံပါ်ပရအ် တၚ်ကဵုသတိ ဂမၠိုၚ် မွဲအခိၚ်ဓဝ်ဂှ်လေဝ် တုပ်လဝ်စိုတ်အိုတ်ရ။
Reuters

