လ္ပာ်ကံၚ်ဇြဳပၞာန်တံ အပ္ဍဲပွိုၚ်တြဴဂိတု ကၠောန်သ္ပကၠုၚ် ပရေၚ်ပြုပြေၚ်ပၞာန်ပံၚ်ကောံ မသ္ကာတ်မြဟ်မာန်

လ္ဂုၚ်၊ အဝ်ဂါတ် (၂၀)

ကံၚ်ဇြဳပၞာန်သီအဝဵုဂှ် ကၠုၚ်စိုပ်အပ္ဍဲပွိုၚ်တြဴဂိတုဏံ ကၠောန်သ္ပကၠုၚ် ပရေၚ်ပြုပြေၚ်ပၞာန်ပံၚ်ကောံ မသ္ကာတ်မြဟ် ကုဂကောံဇြဟတ်ပၠန်ဂတးတံ နကဵုဂၠံၚ်ဍာ်၊ ဂၠံၚ်တိုက်တံမာန်ရောၚ်ဂှ် ဗိုလ်ဇၞော် CDM တံကဵု ညးလ္ၚတ်သ္ၚဳဂၠိပ် ပရေၚ်ဍုၚ်ကွာန်တံ ဟီုဂးလဝ်ရ။

ကံၚ်ဇြဳပၞာန် မပလှ်ဖျေံလဝ် အလဵုအသဳအရာပ် ညးဍုၚ်ကွာန်တံ မကဵုလဝ်မာဲဂှ်တုဲ သီလဝ်အဝဵုကၟိန်ဍုၚ်ဂှ်ဝွံ တုဲကၠုၚ် ဂိတုဂျူလာၚ် (၃၁) တေံ ထပ်ပပဵုပ္တိုန်လဝ် အာယုက်ကာလတၟေၚ် (၆) ဂိတုပၠန်တုဲ ပွမပပဵုပ္တိုန်အာယုက် အလန်ဏံဂှ်ဝွံ ဒှ်အလန်လက္ကရဴအိုတ်ရ။

အတိုၚ်သၞောဝ်သ္ဇိုၚ်ဒက်ပ္တန် ၂၀၀၈ ဂှ်မ္ဂး အာယုက်ကာလကာတၟေၚ် အလန်လက္ကရဴအိုတ် ကံၚ်ဇြဳပၞာန်ဂှ်ဝွံ ကၠုၚ်စိုပ် ဂိတုဖေဖဝ်ဝါရဳ (၁) သၞာံ ၂၀၂၃ ဏံ အာယုက်အိုတ်ဏောၚ်တုဲ အခိၚ်ကာလကာတၟေၚ်တုဲမ္ဂး နကဵုကံၚ်ဇြဳပၞာန် ဟွံဒေါအ်ဟွံဂွံ ဒးကၠောန်ကဵု ပေါဲရုဲမာဲရောၚ်။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် သွက်ဂွံကၠောန်ဗဒှ်ပေါဲရုဲမာဲဂှ် ကၠုၚ်စိုပ်အပ္ဍဲတြဴဂိတုဏံ ညံၚ်ပရေၚ်ဍုၚ်ကွာန်၊ ပရေၚ်ပိုန်ဒြပ်တံ ဂွံကလေၚ်ယာက္ဍိုပ်မာန်ဂှ် ကၠောန်သ္ပအာရောၚ် ဟီုဂးလဝ် ပ္ဍဲကောံဓရီု မကၠောန်သ္ပလဝ် ပ္ဍဲဂိတုအဝ်ဂါတ် စၟတ်တ္ၚဲ (၁၆) တုဲကၠုၚ်တေံရ။

ဗိုလ်ဇၞော် CDM လေန်ထက်အံၚ်ဂှ် သွက်ဂွံကၠောန်ဗဒှ် ပေါဲရုဲမာဲမာန် လ္ပာ်ကံၚ်ဇြဳပၞာန်တံ ကၠုၚ်စိုပ်အပ္ဍဲတြဴဂိတုဏံ စကာဒပ်ကျာ၊ ဒပ်အမၠံက်၊ ဒပ်ယာန်ခြပ်ပသဲ ကေုာံ ဒပ်ကမ်လှောဝ်တံတုဲ ကၠောန်သ္ပကၠုၚ် ပရေၚ်ပြုပြေၚ်ပၞာန်ပံၚ်ကောံ မသ္ကာတ်မြဟ် ကုဂကောံဇြဟတ်ပၠန်ဂတးတံမာန်ဂှ် သ္ၚဳဂၠိပ်လဝ်ရ။

“ဍေံတံဂှ် ဂိုတ်ဒၟံၚ်အိုတ်အစောန်ရ၊ ကၠောန်ပရေၚ်ပြုပြေၚ်ပၞာန်တံ သာဂၠိုၚ်နူဏံမာန်ဏောၚ်၊ အဓိကဂှ်တှ်ေ ပရေၚ်ပြုပြေၚ်ပၞာန်ပံၚ်ကောံဂမၠိုၚ် ဥပမာ ဒပ်ကျာ၊ ဒပ်အမၠံက်၊ ဒပ်ယာန်ခြပ်ပသဲ၊ ဒပ်ကမ်လှောဝ်တံ ဒှ်တမ် စကာကၠုၚ် သီုကဵု ၝတံဏံမာန်ဂှ် နကဵုအဲ ထေၚ်ရ၊ တၚ်ချိၚ်ခယျမွဲရ၊ လ္ပာ်ဍေံတံ ကၠောန်ကၠုၚ် ပရေၚ်ပြုပြေၚ်ပၞာန်တံ ဂၠိုၚ်နူဏံမာန်ဏောၚ်၊ ၜိုန်ရတရးလဝ် ဇြဟတ်ဍေံတံ အလုံမွဲကၟိန်ဍုၚ်ပြးပြးဇးဇးကီုလေဝ် ထပ်ပံၚ်ထောံ ကဵုဇြဟတ်ဒပ်ပၞာန်ဍေံတံ (လက်ရုံးတပ်) တုဲ အပ္ဍဲပွိုၚ်တြဴဂိတုဏံ ပွမသၠဲပ္တိုန်တံ သာကၠောန်ကၠုၚ်မာန်ဂှ် ပိုယ်တံ ချိၚ်ခယျလဝ်ရ” ဂှ် သ္ဂးရ။

သ္အာၚ်နူဂှ်ပၠန် ကံၚ်ဇြဳပၞာန်ဂှ် ညံၚ်ဂကောံဇြဟတ်ပၠန်ဂတးတံ ဆက်ဒတူလိုၚ်ဂွိုအ်မာန် နကဵုနဲကဲဗျူဟာ မကဵုဇြဟတ်ဂရိုဟ် ကုညးဍုၚ်ကွာန်တံဂှ် သာကၠောန်ကၠုၚ် ပွပကီုပရာပ်တံမာန်ရောၚ်ဂှ်လေဝ် ဗိုလ်ဇၞော် CDM လေန်ထက်အံၚ် သ္ဂးရ။

ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် ဥူတာန်သဵုနာၚ်ဂှ်လေဝ် ကံၚ်ဇြဳပၞာန်ဂှ် ၜိုန်ရဇြဟတ်ပရေၚ်ဂီုကၠီု သ္ဂောံသၠုၚ်ပ္တိုန်အသိၚ် ပွပကီုပရာပ်တံ ဍိုက်က်ပေၚ်ၚ်မာန် ဟွံမွဲကီုလေဝ် ပေါဲရုဲမာဲဂှ် ဆန္ဒညးဍုၚ်ကွာန်တံ ဟွံပါမွဲသာ် ကၠောန်သ္ပကၠုၚ်အတေၚ်မာန်ရောၚ် သာ်ဝွံ သ္ပလဝ်တၚ်စၟတ်တံရ။

“ကိစ္စ ပကီုပရာပ်တံဂှ်တှ်ေ သၠုၚ်ပ္တိုန်အသိၚ်တုဲ ကၠောန်ၜိုတ်ဒၟံၚ် စဵုကဵု လၟုဟ်ရ၊ လၟုဟ်ဂှ် ဇြဟတ်ပရေၚ်ဂီုကၠီု သ္ဂောံသၠုၚ်ပ္တိုန်အသိၚ် ပွပကီုပရာပ်တံ ဍိုက်က်ပေၚ်ၚ်မာန် ဟွံမွဲရဂှ် နကဵုပိုယ်တံ ခါတ်ရံၚ်အကာဲရ၊ ဆ္ဂး  ဍေံတံ သွက်ပေါဲရုဲမာဲဂှ် ဂၠံၚ်ဍာန် ဇြဟတ်ဟွံသၟဟ်တံ၊ ဆန္ဒညးဍုၚ်ကွာန်တံ ဟွံပါမွဲသာ် ပွမကၠောန်သ္ပအတေၚ်တံ မၞုံကၠုၚ်မာန်ရဂှ် ပိုယ်တံ ချိၚ်ခယျကေတ်မာန်ရ” သာ်ဝွံ ညးသ္ၚဳဂၠိပ်လဝ်ရ။

ပြဟ်ဟ်ဏံဂှ် ကံၚ်ဇြဳပၞာန်ဝွံ သွက်ဂွံကၠောန်သ္ပ ပရေၚ်ပြုပြေၚ်ပၞာန် မသ္ကာတ်မြဟ် ပ္ဍဲတွဵုရးကရေၚ်ဍာဲ ကဵု တွဵုရးကရေၚ်တံဂှ် ပဠေဝ်ပဠေတ်ကၠုၚ်တုဲ ပ္ဍဲကဵုရးသေတ်ကိုၚ် ကေုာံ ရးမကွေတံဂှ် စကာကၠုၚ် သီုဂၠံၚ်ကျာ၊ သီုဂၠံၚ်တိုက်တံတုဲ ဗ္တိုက်ကၠုၚ်ဒၟံၚ်ရ။

သ္အာၚ်နူဂှ်ပၠန် ပ္ဍဲတွဵုရးကချေၚ်၊ တွဵုရးချေၚ် ကေုာံ တွဵုရးရခေၚ်၊ တွဵုရးဍုၚ်မန်တံဂှ်လေဝ် လ္ပာ်ကံၚ်ဇြဳပၞာန် သွက်ဂွံထ္ပက်ကရောၚ်ပၞာန် နဇြဟတ်လၟိဟ်ဗွဲမဂၠိုၚ်ဂၠေၚ်ဂှ် စပလေဝ်ပလေတ်ကၠုၚ်ရ။

ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် ဥူယျေဝ်ထောန် (တဳပဝ်) ဂှ် နကဵုကံၚ်ဇြဳပၞာန် နူကၠာတေံရ ညံၚ်ဂကောံဒပ်စဵုဒၞါညးဍုၚ်ကွာန်တံ ဖျေံသ္ဇိုၚ်ဂွိုအ်ဂွံဂှ် ပွမဗ္တိုက်ကၠုၚ်တံ နွံဂှ်ရ တန်တဴကဵု လ္တူဇြဟတ်ရုမ်မ်ဂပ်ပ် နွံ၊ ဟွံမွဲတံတုဲ ပွမဗ္တိုက်ဖလှေက်တံ ကၠောန်ၜိုတ်ကၠုၚ်မာန်ဂှ် သ္ဂးရ။

“နူစတေံရ ကၠောန်လဝ် ညံၚ်ဖျေံသ္ဇိုၚ်ဂွိုအ်ဂွံတုဲ လုပ်ကၠုၚ်ပၠန်လဝ် ထ္ပက်ကရောၚ်ပၞာန်တုဲ ဗ္တိုက်ဖလှေက်တံဂှ် ကၠောန်ၜိုတ်ဒၟံၚ်ရ၊ အေဇှ်ဂှ် ထပ်တုဲ သွက်ဍေံတံ ဂွံကၠောန်ဟီုဂှ် သွက်ဂွံထပ်ဗပေၚ်ဇြဟတ် ရုမ်မ်ဂပ်ပ် ဇြဟတ်နွံ၊ ဟွံမွဲ လ္တူဏံဂှ်လေဝ် တန်တဴဒၟံၚ်ရ၊ ဣဏံ မုကၠောန်ရောဟီုဂှ် တန်တဴကဵု လ္တူဇြဟတ်မၞုံဒၟံၚ်ပ္ဍဲဇကုတုဲမှ ဟီုဂွံဏောၚ်၊ ဇြဟတ်အရန်တံ နွံ၊ သွက်ဂွံထပ်ပ္တိတ်တံ နွံမ္ဂး ထပ်ပပဵုပ္တိုန်ဏောၚ်၊ ဟွံမွဲပုဟ်ဟီုမ္ဂး ၜိုတ်နွံဂှ် ဒးကၠောန်အာဏောၚ်” သာ်ဝွံ ညး ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဗိုလ်ဇၞော် CDM လေန်ထက်အံၚ်ဂှ်လေဝ် ဂၠံၚ်တရဴဒပ်ပၞာန် မထ္ပက်ပၞာန်တံဂှ် နူကဵုအခိၚ်လၟုဟ် ဒစးဒုၚ်ချပ်ဗ္စာလဝ်တုဲ ပွမဗ္တိုက်အကြာဂၠံၚ်တံဂှ် ဒးကၠောန်လဝ်ထေက်တုဲ နူကဵုဂၠံၚ်တရဴ ကံၚ်ဇြဳပၞာန် မဇက်ကၠုၚ်မာန်တံဂှ် တာဒၞါမာန်ရောၚ် မိက်ဂွံကဵုကသပ်ရ။

သမ္မတယာယဳ အလဵုအသဳညဳသၟဟ်ဂကူ NUG ဒူဝါလယှဳလဂှ် သွက်ဂွံပလီု ပေါဲရုဲမာဲ ကံၚ်ဇြဳပၞာန်ဂှ် ဟိုတ်နူဒှ်အခိၚ် ပၟိက်ဇၞော်တုဲ သွက်ဂွံဗ္တိုက်ဖလှေက် ကံၚ်ဇြဳပၞာန် နကဵုပရေၚ်ဍုၚ်ကွာန်၊ ပရေၚ်ပၞာန် သီုၜါဂှ် ဒးကၠောန်ၜိုတ်အာရောၚ် သာ်ဝွံ ဟီုဂးလဝ် ပ္ဍဲဂိတုဂျောန် (၁၄) တုဲကၠုၚ်တေံရ။

ပရိုၚ်−သြၚ်လောန်တိုၚ်(မ်)